Osea 9 - Ebaibul

Kisicanae Ŋisirael aŋuna ka asecit kec

¹ Okoe Ŋisirael, nyilelyana! Nyicelut ilakara, lopite ŋolo itiyaata ŋituŋa a ŋakwapin, anerae imalaaka iyes, imyekis iyes Akuj kus, iminakis iyes eropit ŋolo iryamununeete analosin a daadaŋ.

² Nyeryamunete nabo ŋituŋa ŋikinyom analosin ka epiini aneni ecuyere, nyeryamunete epiini ŋolokitete.

³ Nyidoŋete ikes iboiyete anakwap a ŋina ke Ekapolon, nai eboŋorete ŋituŋa a Epuraim Ijipit, imujete ikes anakwap ka Asiriya ŋamuja ŋuna italeo ikes akinyam.

⁴ Nyepedorete ikes ainakin ŋainakineta ŋuna a epiini neni ke Ekapolon, nyitalakarete ŋamuronisya kec iŋes, ikwaanikin ŋamuronisya ŋun aneni kec ka akiriŋ ŋina ka apunyas, ŋituŋa daadaŋ ŋulu enyamete akiriŋ a ŋamuronisya a ŋun itoroniyaryo ikes, anerae eruwor akimuj ŋin ŋina kec, nyemaikina yaunae Kai ke Ekapolon.

⁵ Ani bo moi edoli ŋarwa ŋuna a ŋasuban a ŋuna emaikina iyes kitiyaneneete ka edoli akoloŋit ŋina a ŋasuban a Ekapolon?

⁶ Tari kebucarosi ikes anamunyaro, ecunarete Ŋijipitian ikes ka enukio ikes Mempis. Erupunete ŋinya aneni sek ayai abaru kec ŋina a esilipa, erupunete ŋikukwa alorerya kec.

⁷ Adolut ŋirwa ŋulu ka akisicanio, adolut ŋirwa ŋulu a ŋinyaŋ, igworosi ŋituŋa a Isirael ebasi, “Erae ekadwaran ebaŋ, irumito ŋikerep ituŋanan ŋini eyakar etau ŋolo ka Akuj.” Aŋuna a ŋasecisya kus a ŋuna alalak, elalak daŋ ŋiminan kus.

⁸ Erae ekadwaran eketen akwap aŋuna ka Akuj kaŋ aneni a ŋituŋa a Epuraim, kikote neni daŋ, elokitae iŋes alorotin keŋ a daadaŋ ka imanito iŋes ŋituŋa ŋulu eya Kai ka Akuj.

⁹ Aroketa ikes nooi aloticisyo a ŋulu itiyaete ikes, etiyata lopite ŋolo etiyaata alo Gibea. Etamuni Ekapolon aronis kec ka isicani ikes aŋuna a ŋasecisya kec.

¹⁰ Apaki ŋina arukaunia ayoŋ Ŋisirael abu ayoŋ orukau ikes lopite ŋolo erukaunere ŋikito a epiini analoŋisat, abu daŋ orukau atapapaa kec lopite ŋolo erukaunere ŋaboboryo ŋuna esyaunak ekokito alokitoe. Nai ani edolete ikes Baal-Peor, tosodi kitaleikinos nibore ŋinicaryoit ŋini a ŋileec, apotu Ŋisirael toroketa a nen atipei, kikwaanikin aronis kec ka ŋina a ŋakujo a ŋuna apotu ikes tominakis.

¹¹ Eporori apolou aneni a ŋituŋa a Epuraim lopite ŋolo epororya ikenyit, nyeuruunete nabo ikes ŋidwe ŋice, nyepotiyete nabo ŋaberu kec, nyeryamunete nabo ŋaberu kec ŋakookyes.

¹² Tari kitopolout ikes ŋidwe kec, eturuwori ayoŋ ikes ŋulu emam ikoku ipei daŋ. Ŋuna kec ŋun, epote ŋican ŋulu apolok neni kec apaki ŋina emyekinia ayoŋ ikes.

¹³ Ete paaran ayoŋ ŋituŋa a Epuraim ejokak ŋawat, ikwaan ka idukanit ŋini edupakinitae nakadipaalat ŋina ajokan. Nai tokona erikorete ŋituŋa a Epuraim ŋidwe kec nakibois ŋina eŋolere ŋidwe kec.

¹⁴ Okoe Ekapolon, inak ŋituŋa a Epuraim ibore ŋini iinakini iyoŋ ikes. Nyo iinakini iyoŋ ikes? Inak ikes ŋakookyes ŋuna ebwaŋunun ka ŋikisin ŋulu emam ŋakile.

¹⁵ Ageuni aronis kec daadaŋ alo Giligal, abu ayoŋ ogeu akitidiŋ ikes a nen. Aŋuna ka aronis a ŋiticisyo kec, eritari ayoŋ ikes alo Kai kaŋ, nyeriŋa nabo ayoŋ aminakini ikes, akaŋero ayoŋ ŋikapolok kec daadaŋ.

¹⁶ Aryamut ŋituŋa a Epuraim akisicanet, aono ataagorete kec, nyeriŋa ikes eryamunete ŋidwe. Tari keuruut ikes ŋidwe, aari ayoŋ ŋidwe kec ŋuluminan ŋul,

¹⁷ Aŋuna aŋerioto ikes akiirar ŋakiro a Ekapolon Akuj kaŋ, eŋeri Akuj kaŋ daŋ ikes, eruworosi ikes ŋikerimitok anakwapin.