Osea 8 - Ebaibul

Toŋero Ŋisirael akiwuapit Akuj

¹ Iyes ŋulu iyokiyete ŋituŋa a Ekapolon, tokutakisi ŋabureryaŋae. Abu emoit lotuŋa ŋulu ke Ekapolon iuwuauna esibit egole, anerae nyiwuapa ikes Acamunet kaŋ ka ikes, ka abila ŋikisila kaŋ.

² Ekegworonokini ayoŋ Isirael ebala, “Okoe Akuj, ikinupit isua iyoŋ.”

³ Nai eŋerito Ŋisirael ŋakiro ŋuna ajokak, ido iwuapete ŋimoe ikes.

⁴ Apotu Ŋisirael toseununut ŋirwosi, nai pa acamakinit ayoŋ, apotu ikes kiwuanakis ŋikepukak, nai pa ayeni ayoŋ. Apotu ikes kitiyaununut ŋitorubei a ŋakujo a esilipa ka egolid, ŋakujo ŋuna apotu yaut amunyaro neni kec.

⁵ Okoe Samaria, aŋer ayoŋ etorube a itaok a ŋini itiyaunit iyoŋ erae akuj kon, aŋoikinit ayoŋ ŋituŋa a Samaria nooi. Tari ori itiyaete ikes aronis?

⁶ Arae Esiraelit ŋolo eyeni akitiya ŋiboro iŋes etiyauni etorube a itaok ŋol, meere etorube a Akuj nai etorube koŋin. Ebwaŋabwaŋaaryo etorube a itaok a ŋituŋa a Samaria, toruwor ŋakanyilinyili.

⁷ Eeyanakinete ŋituŋa a Isirael ekuwuam ŋolo ekusi iwadio lomanikorin kec, aŋun, elemunete ekuwuam ŋolo ekusi nooi kipiripiri, nyesuronorete ŋikinyom alomanikorin kec, emam akimuj eryamunio alomanikorin kec, ani kerae toraunito, keponito ŋituŋa ŋuluce alemar.

⁸ Ekwaanikin Isirael ka ŋakwapin ŋunace, aruworosi daadaŋ ŋacaryo,

⁹ anerae apotu ikes kitipeiyosi Asiriya, ekwaanikin ikes ka esigirya ŋolo itiaŋaara, ka adaut akitac ŋakwapin ŋunace ikotere iŋarakinete ikes.

¹⁰ Tari daŋ kelosito ikes akiŋita akiŋarakinet aneni a ŋituŋa a ŋakwapin, acununi ayoŋ ikes iwapei esican, alotooma apaki ŋina euruwuana isicanete ŋirwosi ka ŋikapolok ikes.

¹¹ Aŋuna abunio Epuraim kitalala ŋamuroeta aŋuna ka akitiyaa ŋamuronisya ŋuna emookunor anasecit, aruwor ŋamuroeta ŋun ŋuna eseceneneere.

¹² Tari kainak ayoŋ ikes ŋikisila ŋulu alalak igiritae lokitaabo, iteete ikes ŋikisila ŋul esibit ibore ŋini egelaana.

¹³ Tari keyaut ikes neni kaŋ ŋamuronisya ŋuna ajokak ka tonyama akiriŋ a ŋamuronisya a ŋun, nyacamuni ayoŋ ŋamuronisya ŋun. Nai atamuni ayoŋ aronis kec, ido esican ikes aŋuna a ŋasecisya kec. Eboŋorete ikes Ijipit.

¹⁴ Emuryak ŋituŋa a Isirael ekasubunan kec, adukokis ikes ŋakais a ŋapukasinei kec, alalata ŋitaunio a Yudaya ŋulu eyakatar ŋaduketa ŋunajiet, nai ecunyari ayoŋ a akim ŋitaunio ŋul daadaŋ, enomiyari akim ŋaduketa ŋunajiet ŋun.