Osea 4 - Ebaibul

Kisitak Akuj Isirael

¹ Kiirasi ŋakiro a Ekapolon, okoe Ŋisirael; isitakinit Ekapolon ŋituŋa ŋulu ka akwap a Isirael, anerae emam akikinyomit, kori akitopoloorit, kori ayenut Akuj anakwap kec.

² Ŋuna eya nakwap ikes nu: Akikoŋ ŋuna nyiwuapitae, alyokonu, akiar, akoko, elomi ka a ŋinapaki daadaŋ eyai abukonor ŋaokot.

³ Aŋun, idoŋi Isirael emam ibore eyai, emunyar ŋituŋa daadaŋ ŋulu eya nen, kaapei ka ŋityaŋ daadaŋ ka ŋikyeny tari ŋikolya emunyarosi.

⁴ Kikote neni daŋ nyemaikina idiotuŋanan yau asitan, nyisitak idiotuŋanan ŋinice, anerae ekesitakinit ayoŋ iyes, okoe ŋisacaradotin.

⁵ Ikibuli iyes naparan, ŋikadwarak daŋ ebuli kaapei ka iyes nakwaare, ido enyasuni ayoŋ isirael akwap kus.

⁶ Amunyarosi ŋituŋa kaŋ aŋuna amamukatar ayenut, anerae iŋero iyes ayenut, akaŋer ayoŋ daŋ iyes anarakau ŋisacaradotin kaŋ. Aŋuna ikimuryakiniata iyes ŋikisila a Akuj kus, ayoŋ daŋ ekemuryakinete ŋidwe kus.

⁷ Ani ilalakunete iyes ŋisacaradotin, tolalata ŋasecisya daŋ ŋuna eseceseceneneo neni kaŋ, eturuwori ayoŋ apolou kus acaryoonut.

⁸ Imujakis iyes nasecesya a ŋituŋa kaŋ, aŋun, icamito iyes ikes eseceneneete jik.

⁹ Ikwaanikinosi iyes daadaŋ ŋisacaradotin ka ŋituŋa ŋuluce; ekesicani ayoŋ iyes daadaŋ aŋuna a ŋakiro a ŋuna iwuapito iyes, ekesicani ayoŋ iyes aŋuna a ŋiticisyo kus.

¹⁰ Imujete iyes, nai nyimwokete, itiyaete iyes ŋuna ka amalao, nai nyipitunete, anerae imyekis iyes Ekapolon aŋuna ka akiwuap ŋakujo ŋace ka aŋuna ka amalao.

Akilipenen a Ŋisirael neni a ŋakujo

¹¹ Ebala Ekapolon, “Alema epiini ŋoloŋorot, kori ŋolokitete aosou alotuŋa kaŋ.

¹² Eloseneneete ŋituŋa kaŋ akiŋita ŋakiro aneni ka akuj a ŋina erae akitoe, elimonokini ikes ebela ŋolo ke etal ŋakiro ŋuna emaikina kitiyata, anerae etooliyo ikes etau ŋolo ka amalao, etiyata ikes ŋuna ka amalao emyekis akikinyomit Akuj kec.

¹³ Einanakinete ikes ŋamuronisya alokidiama ŋimoru ka einanakinete ŋainakineta alokidiama ŋikamukumukui, einanakinete ŋainakineta alokwap ŋikuyono, alokwap ŋikito ŋulu enyaritae popilari ka alokwap ŋimuturunyo, anerae ejokak ŋitolimon a ŋikito a ŋul. “Aŋun, itiyaete ŋidwe kus ŋulupesur amalao ka elomeneneete ŋaterak kus.

¹⁴ Nyesicani ayoŋ ŋidwe kus aŋuna itiyaata amalao, kori ŋaterak kus ŋuna elomianeneeta ikes, anerae ŋikilyok ŋikulepek ikes eloseneneete namalaae, einanakinete kaapei ka ŋamalaae ŋuna ka akai ka akuj ŋamuronisya. Aŋun, emunyar ŋituŋa ŋulu emam aosou.

¹⁵ “Okoe Ŋisirael, tari pa kimalaaniarito iyes aneni kaŋ, nyiinakis ŋituŋa a Yudaya ekaile ŋolo ka asecit. Nyilomasi Gilgal, kori nyitipeiyosi Bes-Apen ka nyikoŋo ibasi, ‘Ikwapei eyarya Ekapolon.’

¹⁶ Isyaana Isirael lopite ŋolo isyaania ataok. Epedori tokona Ekapolon akitan ikes lopite ŋolo iyokiyere ikale ŋinimesek a neni elolom, neni eya ŋinya.

¹⁷ “Emorikinosi Epuraim ka ŋakujo, kimyekisi iŋes bon.

¹⁸ Ani kedaut ikes akimat tomerakin, erubakinete itiyaete ŋuna ka amalao, eminasi ŋikarikok kec ŋakiro ŋuna a ŋileec.

¹⁹ Iwokoryo ikes lopite ŋolo iwokorya ekuwuam ibore ŋini eook, ido irumete ikes ŋileec aŋuna a ŋamuronisya kec.”