Osea 2 - Ebaibul

¹ Aŋun, tolimok ŋituŋa kon Ŋisirael ebe erae ikes, “Ŋituŋa ŋulu ka Akuj” ka “Ŋiminan ŋulu ke Ekapolon.”

Aŋerenen a Ŋisirael Akuj ka akisicanio ta alakuno.

² Ŋidwe kaŋ, kisirworiutu toto kus, kisirworiutu iŋes, anerae nyeriŋa iŋes erae aberu kaŋ ka nyeriŋa ayoŋ arae ekile keŋ. Tolimokisi tojoŋo alaerekinit amalao keŋ, tojoŋo alomenen.

³ Ani pa kitiya iŋes ŋun, alacari ayoŋ ŋilowi aneni keŋ, emyek iŋes eleri lopite ŋolo aleryo akoloŋit ŋina edounere iŋes, emyekini ayoŋ iŋes toler, kikwaanikin ka aloŋisat ŋina emam ŋikito, esikwaanikini ayoŋ iŋes ka akwap ŋina eonit, ido emyek akure toar iŋes.

⁴ Nyesyoni ayoŋ tari ŋidwe keŋ, anerae erae ikes ŋidwe ŋulu auruunio anamalao.

⁵ Abu toto kec tomalaan topotiu ikes anamalao ka ŋileec. Abu iŋes tema, “Ewarari ayoŋ ŋikilyok ŋulu amina ayoŋ, ŋulu akainakinete ayoŋ akimuj ka ŋakipi kaŋ, ŋulu akainakinete ayoŋ ŋilowi ŋulu edonyunitoe a ŋajul a ŋamesekin ka ŋilowi ŋulu amilimilak, ŋikilyok ŋulu akainakinete ayoŋ akimyet ka epiini.”

⁶ Aŋun, awakini ayoŋ awas ŋina a ŋikukwa neni itorenene iŋes; adukokini ayoŋ arwatata ŋina ewauni iŋes, ikotere todaun iŋes neni itori.

⁷ Iwuapi iŋes ŋikilyok ŋulu emina iŋes, nai nyerukauni ikes; iwari iŋes ikes, nai nyeryamuni ikes. Ekaku etemari iŋes, “Aboŋori ayoŋ neni alokile kaŋ a ŋolo a ekiŋaren, anerae ajok paaran akiyar kaŋ ikirukit ka iŋes akilo tokona.”

⁸ Abu aberu ŋin nyeyenu atemar ayoŋ abu oinak iŋes ŋikinyom, epiini ka akimyet ka arae ayoŋ abu etepetu esilipa ka egolid ŋolo ayaanarete ikes neni a Baal.

⁹ Aŋun, enyakari ayoŋ ŋikinyom kaŋ apaki ŋina ekokyoto ka epiini kaŋ anapaki a ŋina ekonio, enyakari ayoŋ ŋilowi kaŋ ŋulu itiyaunitae a ŋajul a ŋamesekin ka ŋilowi ŋulu amilimilak ŋulu enapit iŋes.

¹⁰ Tokona, esileereuni ayoŋ aleeco keŋ alokiŋaren ŋikilyok ŋulu emina iŋes, mam ituŋanan epedori aiun iŋes anapedor kaŋ.

¹¹ Etasaluni ayoŋ alelyanu keŋ, ŋasuban keŋ ŋuna a ŋolokaru, ŋasuban keŋ ŋuna a elap a ŋolokitete, ŋasuban keŋ ŋuna a ŋirwa a ŋulu a Sabato ka ŋasuban keŋ daadaŋ ŋuna emaikina iŋes kitiya.

¹² Amunaari ayoŋ ŋikito keŋ ŋulu ke epiini ka ŋiboboryo ŋulu einakinito iŋes akirworo ebe, “Erae lu etacit kaŋ ŋolo akainakinete ayoŋ ŋikilyok kaŋ ŋulu amina ayoŋ.” Eturuwori ayoŋ ŋikito ŋul amoni ka irikarete ŋityaŋ ŋulu ka ariet ikes.

¹³ Esicani ayoŋ iŋes aŋuna a ŋarwa a ŋuna etiyaa ŋasuban neni ata Baal, ŋirwa ŋulu ainanakinia iŋes ekinyate neni ata Baal, tosirite akuwan keŋ a ŋikadoŋidoŋ ka ŋinapen ŋulu epol egyelit, ido tolosenenee neni a ŋikilyok a ŋulu amina iŋes, tosodi ekemuryak ayoŋ.

¹⁴ Aŋun, amodiuni ayoŋ iŋes oya naloŋisat, erwor neni keŋ a arimao a ŋina apolon.

¹⁵ A nen, enyakakini ayoŋ iŋes ŋimanikorin keŋ ŋulu ke epiini, eturuwo akadipaalat ŋina ka Acor neni egeunia akigeno, iwuapi iŋes ŋakiro kaŋ a nen lopite ŋolo ewuapitor apaki ŋina ariŋaakar iŋes esorokana ka iwuapi lopite ŋolo etiyaa iŋes apaki ŋina abunio iŋes anakwap a Ijipit.

¹⁶ Alimu Ekapolon atemar, akoloŋit ŋin, ikinyarae iyoŋ ayoŋ, “Ekile kaŋ”, nyeriŋa nabo iyoŋ ikinyarae ayoŋ, “Baal kaŋ.”

¹⁷ Alemari ayoŋ ŋirorwa ata Baal anakituk keŋ, ido nyenyarao nabo jik ata Baal a ŋirorwa.

¹⁸ Ewuakini ayoŋ aŋuna kus akoloŋit ŋin acamunet, ikotere tomaikin iyes ka ŋityaŋ ŋulu adedeŋak, ŋikyeny ŋulu eporete ka ŋiboorei ŋulu elyato alokwap, ekisari ayoŋ anakwap akau a ŋikaleŋeleŋe, ekileŋ ka ejie, ido akainakini ayoŋ iyes kiboikinos emam ŋace.

¹⁹ Akayai ayoŋ iyoŋ toruwor aberu kaŋ ŋikaru ka ŋikaru, iruwor iyoŋ aberu kaŋ anakiyookino, anacamit ka anamina a ŋina nyiryaŋiryaŋa ta anakisyon.

²⁰ Akayai ayoŋ iyoŋ toruwor aberu kaŋ anakikinyoma, tosodi iyenuni iyoŋ Ekapolon.

²¹ Ebala Ekapolon, “Akoloŋit ŋin aboŋokini ayoŋ ŋakilipasinei a Ŋisirael, emyekini ayoŋ akiru kilim nakwap.

²² Erupunete alokwap ŋikinyom, epiini ka ŋikito ŋulu ka olipa.

²³ Tosodi ewuakini ayoŋ ŋituŋa kaŋ nakwap ka ainakini ayoŋ ikes arereŋu. Etoodikini ayoŋ amina kaŋ neni a ŋini sek anyaritae ebe, ‘Lo-Ruami,’ ido atemari neni a ŋini sek anyaritae ‘Lo-ami’ ebe, ‘Irae iyoŋ ŋini kaŋ’. Etemari iŋes ‘Irae iyoŋ Akuj kaŋ.’”