Osea 1 - Ebaibul

¹ Erae nu ŋakiro ŋuna ka Akuj ŋuna abu Ekapolon tolimok Osea lokoku a Beeri, alorwa a ŋulu a ŋirwosi a Yudaya a lu: Usia, Yasam, Aas ka Esekia ka alorwa a ŋulu a Yeroboam a ŋolo a Isirael a ŋolo arae lokoku a Yoas.

Ekal ŋolo ka Osea

² Ani egeuni Ekapolon akirwor neni a Ŋisirael aneni ka Osea, abu tolimok Osea tema, “Ape toryamu aberu ŋina erae amalaat toruwor aberu kon, toryamu ŋidwe aneni a amalaat, anerae etiyata Ŋisirael amalao ŋina apolon aŋuna aŋerioto Ekapolon.”

³ Aŋun, abu Osea tolot toryamu Gomer nakoku a Dibilaim ya iŋes toruwor aberu keŋ. Abu Gomer topoti, kidou ikoku ŋinisapat.

⁴ Tolimok Ekapolon Osea tema, “Tolimok ikoku kon ŋin ekiro Yesireel, anerae alotooma apaki ŋina euruwuana, esicani ayoŋ ŋituŋa a ekal a Yeu aŋuna aaryata ŋituŋa alo Yesireel, emyekini ayoŋ todaun apukan ŋina a Isirael.

⁵ Akoloŋit ŋin amunyari ayoŋ ŋikajiok a Isirael anakadipaalat a ŋina a Yesireel.”

⁶ Abu Gomer topoti nabo, kidou ikoku ŋinipese. Tolimok Ekapolon Osea tema, “Tolimok ikoku ŋin ekiro Lo-ruama, anerae nyeriŋa ayoŋ esyoni ŋituŋa a Isirael, kori etoodikini ikes amina kaŋ.

⁷ Nai esyoni ayoŋ ŋituŋa a Yudaya aiuni ayoŋ ikes, nyaiuni ayoŋ ikes a akau a ŋina a ŋikaleŋeleŋe, kori a ekileŋ, kori a ŋiboro a ŋulujiet; nyaiuni ayoŋ ikes a ŋaŋolei, kori a ŋasigarya a ŋuna edokito ŋaŋolei nai aiuni ayoŋ ikes a apedor a Ekapolon Akuj kec.”

⁸ Ani ejoŋoe Lo-ruama akinak, topoti nabo Gomer, kidou ikoku ŋinisapat.

⁹ Tolimok Ekapolon Osea tema, “Tolimok ikoku kon ŋin ekiro Lo-ami, anerae nyeriŋa iyes iraakasi ŋituŋa kaŋ ka nyeriŋa ayoŋ arae Akuj kus.”

Akinyakakino a apukan a Isirael

¹⁰ Kikote neni daŋ, elalakiata ŋituŋa a Isirael ikwa asinyon ŋina ka anam, ŋina nyipimun, kori nyimarun, ido anakibois a ŋina abookore ikes “Meere iyes ŋituŋa kaŋ,” elimokinio ikes ebe, “Irae iyes ŋidwe ŋulu ka Akuj a ŋina eyari.”

¹¹ Imorikinosi nabo ŋituŋa a Yudaya ka ŋulu a Isirael, eseunete nai ikes ekarikon kec epei, ikamarete ikes akwap kituruwosi ŋina kec. Kire, eruwor akoloŋit ŋina itiyakinotor ŋakiro ŋun alo Yesireel akoloŋit ŋina apolon nooi.