Obad. 1 - Ebaibul

Eruwor Edom akwap ŋina ituro akoŋinait

¹ Erae nu ŋakiro ŋuna abu Obadia todwar, ŋuna abu Ekapolon ŋolo Etiron kirwor aŋuna ke Edom; adaun isua akiirar ŋakiro aneni ka Akuj, ido eyakiyar ekiyakia nakwapin alimokin ŋakwapin ebe, “Tonyoutu! Emana akwap ke Edom, etijioto!”

² Ebala Ekapolon neni ke Edom ebe, “Iyoŋ Edom, eketiditeuni ayoŋ iyoŋ anakwapin a ŋunace; ikijamuwaryo iyoŋ nooi.

³ Ikimodik iyoŋ akituro alotau kon, iyoŋ ŋina iboi anaitae a ŋimoru, iyoŋ ŋina erae neni eoya alomoru erae ere kon. Ibala iyoŋ alotau kon, ‘Ŋae epedori acakun ayoŋ kwap?’

⁴ Tari daŋ kiyai iyoŋ kidiama nooi ikwa egole, ka tari daŋ kidukit iyoŋ ŋakais kon lokacer, akacakuni ayoŋ iyoŋ kwap a nen.

⁵ “Ani mono kepotu neni kon ŋikokolak, nyekokoiyarete mono ikes etyae ŋolo ecamito ikes a? Ani mono kepotu neni kon ŋikenyasak nakwaare, etya mono ai akinyasuno ŋina iryamuni iyoŋ! Ani mono kepotu neni kon ŋikalemak epiini, nyimyekinete mono ikes epiini edio cici a?

⁶ “Okoe, etya mono ai epite ŋolo eŋatarere ŋiboro a ateker a Esau! Adaun aŋatar ebari keŋ ŋolo ewuait iŋes.

⁷ “Adaut ŋituŋa daadaŋ ŋulu iponiata iyoŋ tocamunotor akiritar iyoŋ anakwap kon; ikimodikis iyoŋ ŋituŋa ŋulu iponiata iyoŋ kisilyata, ido adaut akiloun iyoŋ. Adaut ŋulu apotu kimuja aneni kon alokakin aloc aŋuna kon; ebasi ikes, ‘Mam ŋuna eyeni iŋes.’ ”

⁸ Ebala Ekapolon, “Akoloŋit ŋin, nyamunyari mono ayoŋ ŋikaosok alotooma Edom a? Nyamunyari mono ayoŋ alomoru a ŋulu ke Esau ŋulu epatana ayenun ŋakiro a?

⁹ “Ekuryakiata ŋikajiok kon ŋulu etirok ŋulu a Teman, ido earyo ŋolokile daadaŋ ŋolo eyai lomoru ŋulu ke Esau.”

Isicani Akuj Edom aŋuna ka aryenyeo keŋ

¹⁰ “Aŋuna ibunio iyoŋ toarya iryanyana ŋiletok a Yakob, ikirumete iyoŋ ŋileec ka ikitoŋopiyaryo iyoŋ jik.

¹¹ “Akoloŋit ŋina ekamaryata ŋituŋa ŋulugelae ŋajorei a Yakob erae ŋirikon, ibu iyoŋ nyiŋarak ikes, akoloŋit ŋina alomaryata ŋituŋa ŋulugelae lotaun kilamilama aŋuna ka aŋatar Yerusalem, ibu iyoŋ nyiŋarak ikes. Aŋun, ibu iyoŋ daŋ kikwaanikin ka ŋimoe ŋul apaki ŋin.

¹² “Nai pa etemokino iyoŋ towo kiteo ŋiletok alokaato kon, akoloŋit ŋin ŋina ekamaryata ŋituŋa ikes; pa etemokino iyoŋ tolakar aŋuna ka amunyaryo, a ŋidwe a Yuda a ŋulusapa, akoloŋit ŋin; pa etemokino iyoŋ torem ikes, akoloŋit ŋin ŋina ayakatar ikes locan.

¹³ Pa etemokino iyoŋ toloma tooma alopukei a ŋituŋa kaŋ tokienar ikes akoloŋit ŋin ŋina aponiata ŋatyokisyo todolokis ikes; pa etemokino iyoŋ kite aronis ŋina etiya neni kec akoloŋit ŋin ŋina aponiata ŋatyokisyo todoikis ikes. Pa etemokino iyoŋ toŋata ebari keŋ, akoloŋit ŋin ŋina aponiata ŋatyokisyo todoikis.

¹⁴ Pa etemokino iyoŋ towo anakiryamiryamet a ŋirotin kikama ŋituŋa ŋulu asiito anatyokisyo. Ibu iyoŋ kipotok neni a ŋimoe ŋituŋa ŋulu aris kesiwa, ŋituŋa ŋulu apotu toiunos alocan, akoloŋit ŋin ŋina aponiata ŋican todoikis ikes.

¹⁵ “Eapi akoloŋit ŋina ke Ekapolon, aŋuna a ŋakwapin a daadaŋ. Epite ŋolo itiya iyoŋ Edom, itiyakinio neni kon daŋ ikwaŋinapei. Ikiboŋokinete iyoŋ ŋiticisyo kon a alope.

¹⁶ Ikwapei iponiata iyes ŋituŋa kaŋ toryamut ŋican, alomukura kaŋ a ŋolo asegan, erubakinete ŋakwapin daadaŋ eryamununeete ŋican; kire jik, eryamunete ikes ŋican ŋulu apolok nooi, ido etakanuni esibit pa keyakasi sek ikes nen.”

Akiloun a Ŋisirael ŋimoe kec ŋina esidyon

¹⁷ “Nai eyakaun ŋulu esiyete anatyokisyo a ŋun lomukura ŋolo a Sion, ido eruwor nen neni eseg; eryamunete ŋituŋa a ekal a Yakob ŋiboro a ŋulu apotu sek ŋimoe kec todemasi ikes.

¹⁸ Ededeŋiar ekal a Yakob ikwa akim, ededeŋiar ekal a Yosepu ikwa arira, ido eruwor ekal ke Esau ŋolo icunyo; icunyarete ikes ekal ke Esau kitoŋopiyasi, mam ituŋanan idoŋi eyari alokal ke Esau, anerae adau Ekapolon alimun ŋun.

¹⁹ “Eruwor ŋimukura ŋulu ke Esau, ŋulu a ŋituŋa a ŋulu eya Negeb. Eruwor akwap a Ŋipilistin ŋina a ŋituŋa a Sepela, eruwor akwap ke Epuraim ka Samaria ŋina a Ŋisirael, eruwor Gilead akwap a Benjamin.

²⁰ Anyoun alo Poenicia akitodol Sarepat, eruwor nen neni a Ŋisirael a ŋulu eya Kanaan, a ŋulu ielaritae analup kec; eruwor ŋitaunio ŋulu Negeb, ŋulu a ŋituŋa a Yerusalem a ŋulu eya Separad, a ŋulu ielaritae alo Yerusalem.

²¹ Itipeiyorete ŋikaiunak, lomukura ŋolo a Sion, kipukata Edom, ido eruwor Ekapolon elope erae Erwosit.”