Ŋitic. 6 - Ebaibul

Ŋikeŋaranakinak ŋulukanikaarei

¹ Alorwa a ŋulu eyatakinor ekimar ŋolo a ŋikasyomak a Yesu, kiŋuruŋurakinos Ŋiyudayan ŋulu erworosi Ŋagirik neni a Ŋiyudayan a ŋulu erworosi Ŋaburaniyae. Abasi ŋulu erworosi Ŋagirik ebe nyemitakinitae ŋapuseru kec a ŋinakoloŋit apaki ŋina ekorere akimuj.

² Tonyaraut Ŋikiyakia ŋulutomon ka ŋiarei ŋikasyomak daadaŋ temasi, “Nyitemokino isua oesikisi akitatam ŋakiro ŋuna ka Akuj, ido olomakisi akikor akimuj.

³ Aŋun ŋikaitotoi, toseutu alokidiŋ kus ŋikilyok ŋikanikaarei ŋulu ajokak, ŋulu ileleba Etau ŋolo Asegan ka aosou, ŋulu itemokino oinakisi etic lo.

⁴ Nai ericakisi isua akilip ka etic ŋolo ka akitatam ŋakiro ŋuna ka Akuj.”

⁵ Tocamu asepic daadaŋ akirot na. Toseut ikes Stepano, ekile ŋolo ayai anupit nooi, ŋolo eleleba Etau ŋolo Asegan. Toseut nabo Pilipo, Prokoro, Nikanor, Timon, Parmena ka Nikolao ŋolo anakwap a ŋina ka Antiokio, ŋolo aris kibelekin toruwor ŋolo alodin a Ŋiyudayan.

⁶ Yaasi ŋituŋa ikes neni a Ŋikiyakia, kilipakis Ŋikiyakia ikes ka kidokokis ŋakan nakyes akiterereŋ ikes.

⁷ Kielakin nai akirot ka Akuj nen, kiyatakin nooi ekimar a ŋikasyomak alo Yerusalem. Apotu daŋ ŋisacaradotin ŋulu alalak kiwuapa Ŋakiro ŋuna Ajokak, tonupa Yesu.

Akikamuno a Stepano

⁸ Kitiya Stepano, ŋolo ainakinit Akuj ajokis ka apedor, ŋaumonokineta ka ŋakujuwuanisya alotuŋa.

⁹ Nai kitepega ŋituŋa ŋice iŋes. Arae ikes ŋituŋa ŋulu ke esinagoga a ŋolo enyaritae, “Ŋituŋa ŋulu Elacakina”. Arukito ikes ka ŋulu alo Kurene, Alekisandaria, Cilicia ka Asia.

¹⁰ Nai inak Etau ŋolo Asegan Stepano aosou ŋina pa apedoryata ikes akitepeg, kilouniata iŋes.

¹¹ Kicocoa nai ikes anakimunono ŋikilyok ŋice alimun atemar, “Ikiira isua Stepano irworo ŋakiro ŋuna a ŋiyany neni a Moses ka neni ka Akuj!”

¹² Kisiguryakis ikes ŋituŋa, ŋikatukok ka ŋiketatamak a Ŋikisila, toporokis iŋes yaasi neni ka Atukot.

¹³ Yaut ŋisuudae ŋulu esudete ŋakiro ŋulu abasi, “Nyieŋununui ekile lo erwor ŋuna aronok Kai ka Akuj na ŋina asegan ka Lokisila ŋulu ka Akuj;

¹⁴ anerae ikiira isua iŋes ebala ebe inyasuni Yesu lo ŋolo a Nasaret Akai ka Akuj ka kijulak ŋitalyo ŋulu abu Moses ikiinak iwon!”

¹⁵ Kitekis ŋituŋa daadaŋ ŋulu ka Atukot Stepano, kiŋolikis ereet keŋ ecai ikwa ŋolo ke emalaika.