Ŋitic. 4 - Ebaibul

Petero ka Yoana alokiŋaren Atukot

¹ Ani eriŋa Petero ka Yoana isirworete ŋituŋa, todolut ŋisacaradotin ka ekapolokiniton ŋiketeok ŋulu ka Akai ka Akuj ta Ŋisadukayon.

² Aŋoito ikes, anerae etatamete ka eseraete Ŋikiyakia ŋuluarei ŋul ŋakiro ŋuna ka ayarun alokatwak aŋuna abaakatar ayaru Yesu.

³ Kikamunae nai ikes, togolokinoe mabus akitodol taparacu, anerae abu towar.

⁴ Nai apotu ŋituŋa ŋulu alalak, ŋulu apotu kiirasi ŋakiro a Ŋikiyakia tonupa; toapik ekimar a ŋikilyok ŋalipyo ŋakan.

⁵ Ani iwalari, potu ŋikepukak ŋulu a Ŋiyudayan ka ŋikatukok ta ŋiketatamak a Ŋikisila tocunakinos Yerusalem.

⁶ Kiryamiryama ikes ka Esacaradoti ŋolo Apolon nooi ŋolo anyaritae Anas ka Kaipa, Yoana, Alekisanda ta ŋice ŋulu arae ŋiyeneta ŋulu ke Esacaradoti a ŋolo Apolon nooi.

⁷ Kitowua ikes Ŋikiyakia alokiŋaren Atukot kec, kiŋita temasi, “Ikokinete iyes itiyaete ŋakiro ŋun ai? Apedor ani iyakatar iyes, kori ekiro a ŋae itiyaata iyes ŋakiro ŋun?”

⁸ Toboŋok Petero ŋolo eleleba Etau ŋolo Asegan ikes tema, “Ŋikepukak ŋulu a ŋituŋa ka ŋikatukok!

⁹ Ani kikiŋisitae isua nakoloŋit na ŋakiro ŋuna ajokak ŋuna etiyakin neni ke ekaŋwalan ka epite ŋolo etaŋaleunere iŋes,

¹⁰ itemokino nai iyes daadaŋ ka ŋituŋa ŋulu a Isirael daadaŋ toyenut atemar, ewuoi ekile lo alokiŋaren kus eŋale nooi aŋuna ka apedor a ŋina ke ekiro a Yesu a ŋolo a Nasaret. Yesu ŋol, iŋes ŋolo ipotu iyes kibubukis lomusalaba, nai abu Akuj kiteyaru.

¹¹ Erae Yesu igiritae ŋakiro keŋ Nakigireta atemar, ‘Amoru ŋina koloŋ ipotu iyes ŋikadukok toŋero, iŋes tokona itogogoŋit akai alokoona.’

¹² Emam aiuno aneni a ice a daadaŋ, anerae emam ekiro ece anakwap a daadaŋ ŋolo einit Akuj ŋituŋa, ŋolo epedoryata ŋituŋa aiunor.”

¹³ Toumok Atukot iŋolikini atitinyu a Petero ka Yoana, a ŋulu tari pa asyomito ka torae ŋikoŋinae ka toyenut daŋ atemar arae ikes ŋirukitos a Yesu.

¹⁴ Nai ani iŋolikinete ikes ekile ŋolo etaŋaleunio erukito ka Ŋikiyakia, todaun ŋuna elimunete.

¹⁵ Aŋun, kitolomarae ikes a Natukot, kidoŋo ikes atuko make.

¹⁶ Kiŋitas ikes make temasi, “Ikikokini iwon ŋikilyok lu ai? Eyenete ŋituŋa daadaŋ alo Yerusalem atemar etiyata ikes akujuwuanut ileere ka nyikipedori iwon akipeg ŋun.

¹⁷ Nai ani pa kikicamit ibore en kielakin lotuŋa, ecika ŋikilyok lu nyisirwor ikes nabo jik idiotuŋanan alokiro a Yesu.”

¹⁸ Aŋun, tonyaraut nai ikes Petero ka Yoana Natukot, kicika ikes atemar nyirworo kori nyitatama nabo jik alokiro a Yesu.

¹⁹ Nai toboŋokis Petero ka Yoana temasi, “Totubutu iyes ŋilopeyek ŋuna iyookino alokiŋaren Akuj--akiwuap ŋakiro kus kori ŋuna ka Akuj.

²⁰ Anerae nyeesikinio isua erwor ŋuna ikiŋolik ka ikiira.”

²¹ Tosodi Atukot kicik ikes nabo nooi, kimyek nai ikes toloto. Todaun Atukot epite ŋolokisicanet ikes, aŋuna epurotor ŋituŋa daadaŋ Akuj, ikotere ŋakiro ŋuna apotu kitiyakinos;

²² anerae aŋwalit ameun anakidouno ekile ŋolo etiyakinio akujuwuanut ŋina ka aŋaleun neni keŋ ka adeparito ŋikaru keŋ ŋatomoniomwon.

Kilipa ŋikanupak atemar totitinyokiata ikes

²³ Ŋinapei alakakinere Petero ka Yoana, toboŋosi ikes neni aya ŋikanupak a Kristo ŋuluce, tolimokis ikes ŋakiro ŋuna alimokinete ŋisacaradotin ŋulu apolok ka ŋikatukok ikes.

²⁴ Ani iirarete ikes ŋakiro ŋun, kikeut daadaŋ ŋitoilon kec kaapei, kilipa neni ka Akuj temasi, “Ekapolon ka ekasuban nakuj, akwap ka anam ta ŋinibore eyai tooma kec daadaŋ!

²⁵ Ibu iyoŋ koloŋ alotooma Etau kon kirwor anakituk ke eketiyan kon a papaa kosi Daudi itema, ‘Kaanukiro elemaritotor ŋibukui ŋulu ka akwap? Kaanukiro etukyoto ŋituŋa akitiya ŋakiro ŋuna koŋinae?

²⁶ Acunakinosi ŋirwosi ŋulu ka akwap ka ŋikepukak iwapei akitepeg Ekapolon Akuj ka ŋoloseuna keŋ.’

²⁷ Anerae kire alotaun a lo, apotu Erode ka Ponitio Pilato ka ŋibukui ŋulu pa arae Ŋiyudayan ta ŋituŋa ŋulu a Isirael kitepega Yesu, eketiyan kon ŋolo asegan ŋolo ibu iyoŋ kituruwo Messia.

²⁸ Apotu ikes tocunakinos akitiya ŋakiro daadaŋ ŋuna koloŋ itubuni iyoŋ ka apedor ka acamit kon atemar itiyakin.

²⁹ Tokona Ekapolon, kiŋolik epite ŋolo ikitukuryaniata ikes isua. Kitepedoroe isua ŋiketiyak kon akirwor ŋakiro kon ka atitinyu a daadaŋ.

³⁰ Torwaa akonikan, kitaŋaleu ŋituŋa ka kitiya ŋakujuwuanisya ka ŋaumonokineta alokiro ke eketiyan kon Yesu a ŋolo asegan.”

³¹ Ani irikakinete ikes akilip, tomaranik akibois ŋina elipyata ikes, kilelebikin ikes daadaŋ Etau ŋolo Asegan, kiserata ŋakiro ŋuna ka Akuj ka atitinyu.

Amorete ŋikanupak ŋiboro kec

³² Arae atukot ŋina a ŋikanupak ŋina atami ka anupit ŋakiro ŋapei. Amam tari idio ŋini abala arae ŋiboro keŋ ŋulu keŋ ke elope, nai amorete ikes ŋiboro daadaŋ ŋulu ayakatar.

³³ Kiteyenut Ŋikiyakia ka apedor a ŋina apolon ŋakiro ŋuna ka ayarun ke Ekapolon Yesu, ido kiterereŋ Akuj ikes daadaŋ nooi.

³⁴ Amam alokidiŋ kec ituŋanan ŋini acanaana, anerae ŋulu ayakatar ŋamanat kori ŋakais, apotu togyelanasi yaut ŋisiliŋa ŋulu agyelanarere,

³⁵ inakis Ŋikiyakia; tosodi tokorakinae ŋinituŋanan lopite ŋolo ayakar akiitanit keŋ.

³⁶ Ayai daŋ ekile ŋolo anyaritae Yosepu ŋolo anateker a Lepi ŋolo edounitoe alo Kupuro. Anyarito Ŋikiyakia iŋes Baranaba (iŋes atemar “Ŋolo esimukekinan”)

³⁷ Togyela iŋes emanikor keŋ, yau ŋisiliŋa inak Ŋikiyakia.