Ŋitic. 3 - Ebaibul

Kitaŋaleunoe ekile ŋolo aŋwalit

¹ Apeikoloŋit, toloto Petero ka Yoana Kai ka Akuj ŋisaae ŋikanikaomwon ŋulu ka apaaran ŋulu elipeneneere.

² Ayai lopuke ŋolo anyaritae “Epuke ŋolo Ebusan” ŋolo ka Akai ka Akuj, ekile ŋolo aŋwalit ŋinapei anakidounet. A ŋinakoloŋit, adakanaryo iŋes lopuke ŋol akilipanar ŋainakineta alotuŋa a ŋulu alomanarete Kai ka Akuj.

³ Ani iŋolikini iŋes Petero ka Yoana eapikinit alomar Kai ka Akuj, kiŋit iŋes ikes daŋ ainakinet.

⁴ Kitekis Petero ka Yoana iŋes, tolimu Petero tema, “Kiŋolikinae isua!”

⁵ Kitek nai iŋes ikes ebala kori eyai idiobore aryamuni aneni kec.

⁶ Nai tolimok Petero iŋes tema, “Emam ŋisiliŋa ayakar ayoŋ, nai akainakini ayoŋ iyoŋ ibore ŋini ayakar; alokiro a Yesu Kristo a ŋolo a Nasaret, abala ayoŋ iyoŋ, torotok!”

⁷ Kikamu Petero iŋes akan ŋina aloteten, kitonyou, towo. Togogoŋioto atipei ŋakejen ka ŋitobolae keŋ;

⁸ toporu iŋes kidiama towo, ido torotok tolomasi ka ikes Kai ka Akuj, epori ka ipuro Akuj.

⁹ Kiŋolikis ŋituŋa daadaŋ ŋulu aya nen iŋes elosi ka ipuro Akuj.

¹⁰ Ani eyenunete ikes atemar erae iŋes ekile ŋolo sek elipanar “Alopuke a ŋolo Ebusan” a ŋolo ka Akai ka Akuj, tobul ikes daadaŋ, toumokis a ŋakiro a ŋuna kepotu kitiyakinos neni keŋ.

Erwor a Petero alo Kai ka Akuj

¹¹ Ani eriŋa ekile ŋol imiidikina neni a Petero ka Yoana aneni anyaritae Ebarasan a Solomon, toumokis ŋituŋa daadaŋ, tomotunos neni aya ikes.

¹² Ani iŋolikini Petero ŋun, tolimok ikes tema, “A ŋituŋa a Isirael, nyo ikituumokinitotor iyes ŋun? Nyo ikiteoto iyes isua esibit erae apedor na ŋina kosi, kori esibit erae aŋuna ekeritere isua Akuj iŋes ikitorotokinio isua ekile lo?

¹³ Akuj ŋina atapapaa yok ŋina ka Aburaam, Isaka ka Yakobo, iŋes ainaki eketiyan keŋ Yesu apolou ŋina ka Akuj. Ipotu iyes kipotokis Yesu ŋolopei ŋol neni a ŋikepukak ka toŋero iŋes alokiŋaren Pilato, tari daŋ ketubu Pilato atemar itemokino iŋes tolacakinae.

¹⁴ Arae iŋes ŋolo ka Akuj ka eyookino, nai ipotu iyes toŋero ka kiŋita Pilato alacakin ekaaran.

¹⁵ Ido toara ekainakinan akiyar ŋolo abu Akuj kiteyaru alokatwak. Ikirae isua ŋisuudae ŋulu a ŋakiro a ŋun.

¹⁶ Aŋuna ka anupit ekiro a Yesu, aponi kitaŋaleunoe ekile lo ŋolo iteete ka ŋolo iyenete iyes. Anupit Yesu iŋes ainaki ekile lo aŋaleun kire ikwaŋina iteoto iyes daadaŋ.

¹⁷ “Ŋikaitotoi kaŋ, ayeni ayoŋ tokona atemar pa iyenete iyes ka ŋikepukak kus ŋuna ipotu iyes kitiyata.

¹⁸ Tari kikote neni daŋ, alimunit Akuj koloŋ alorwor a ŋikadwarak a daadaŋ atemar etemokino kisicanae Kristo keŋ ka esiyook Akuj ŋun alorot a lo.

¹⁹ Tokiwa nai, kibelekinos neni ka Akuj, ikotere ikisari iŋes ŋasecisya kus. Kitiyata ŋun, ikotere epote aneni ke Ekapolon ŋarwa ŋuna itogogoŋere ŋitai kus.

²⁰ Iyakuuni nai iŋes Yesu, ŋolo erae Kristo, ŋolo aseu iŋes aŋuna kus.

²¹ Itemokino Kristo kiboi anakuj akitodol apaki ŋina ituruworya Akuj ŋiboro daadaŋ ŋikitet, lopite ŋolo koloŋ alimunitor iŋes alorwor a ŋikadwarak keŋ a ŋulu asegak.

²² Alimunit Moses ebe, ‘Akuj Ekapolon kus iŋes iyakuuni ekadwaran aŋuna kus, lopite ŋolo ekeyakuunia ayoŋ, elomuni iŋes alotuŋa kus pei. Itemokino iyes kiwuapa ŋakiro daadaŋ ŋuna ikilimokini iŋes iyes.

²³ Ituŋanan daadaŋ ŋini nyiwuapi ŋakiro ŋuna irworo ekadwaran ŋol, etyakaryo alotuŋa a ŋulu ka Akuj, kinyasunae.’

²⁴ Kire, ŋikadwarak daadaŋ ŋulu erwor ameun aneni a Samuel adwara ŋuna a ŋirwa a lu.

²⁵ Erae ŋuna kus ŋakiikineta ŋuna ka Akuj ŋuna ekobunete ŋikadwarak keŋ ka imarakina iyes Nacamunet keŋ ikwaŋina alimokinia iŋes Aburaam ebe, ‘Eterereŋi ayoŋ ŋituŋa ŋulu ka akwap daadaŋ aŋuna a ŋiletok kon.’

²⁶ Aŋun, abu Akuj toseu eketiyan keŋ, kiyaku mono neni kus akiterereŋ iyes; kibelekinos iyes daadaŋ alopitesyo kus a ŋulu aronok.”