Ŋitic. 26 - Ebaibul

Kirwor Paulo aŋuna keŋ alokiŋaren Agripa

¹ Tema Agripa neni a Paulo, “Ikicamakinitae iyoŋ akirwor aŋuna kon.” Kikia Paulo akeekan, kiikiikok, kirwor aŋuna keŋ ikona:

² “Atami ayoŋ atemar ayakar arereŋu nakoloŋit na aanyun ebe erae kiŋaren kon erwosit Agripa erworor ayoŋ aŋuna kaŋ, akirwor ŋakiro daadaŋ ŋuna ekesitakinitotor ayoŋ Ŋiyudayan.

³ Iyookino nu, anerae iyeni iyoŋ nooi ŋitalyo a Ŋiyudayan ka ŋiburasyo kec. Aŋun, ekelipit ayoŋ iyoŋ totitinyik, topupok ŋakiro kaŋ.

⁴ “Eyenete Ŋiyudayan daadaŋ epite ŋolo ka akiyar kaŋ ameun ŋinapei eriŋa asorokana, anerae apolouni ayoŋ anakwap kaŋ ka alo Yerusalem.

⁵ Eyenete ikes ŋinapei koloŋ atemar apolounit ayoŋ arae Eparisayot alopite a ŋolo ka atukot a ŋina elelakinit nooi ŋakiro ŋuna ke edin yok. Ani kecamito, epedorete akisuuda nu.

⁶ Tokona awoi ayoŋ a ne akisitakino, aŋuna egenor ayoŋ anakiikinet a ŋina ainaki Akuj neni atapapaa yok.

⁷ Erae na akiikinet ŋinapei igenosi ŋatekerin ŋunatomon ka ŋaarei ŋuna a Ŋisirael aanyun akisiyookino keŋ, ikwaŋina ilipyata ka agogoŋu jwi jwi. Erwosit Agripa, erae Ŋiyudayan pei ekesitakinito ayoŋ aŋuna ka akigeno a na!

⁸ Kaanukiro egogoŋio iyes akinup atemar epedori Akuj akiteyarun ŋikatwak?

⁹ “Abu ayoŋ elope ekiŋaren emukek atemar itemokino etiya ŋuna alalak ŋuna itepegito ekiro a Yesu a ŋolo a Nasaret.

¹⁰ Erae ŋun ŋuna abu ayoŋ etiya alo Yerusalem. Anapedor a ŋikepukak ka ŋisacaradotin ŋulu apolok, abu ayoŋ oeneene alomabus ŋituŋa ŋulu ka Akuj ŋulu ewuapito Yesu. Meere ŋun bon, abu daŋ oriwo ka ŋulu atubonokinete ikes atwanare.

¹¹ Abu ayoŋ jwi jwi esican ikes alosinagogae a daadaŋ aŋuna ka akitiŋakin ikes akiŋer anupit kec; ido anyunyurikina ayoŋ ikes nooi, esican tari alotaunio a ŋulu agelaaka.

Kirwor Paulo epite ŋolo anupya iŋes Yesu

¹² “Ŋakiro ŋun abunio ayoŋ olosyo Damasko ka acamakinet ka apedor aneni a ŋisacaradotin a ŋulu apolok.

¹³ Erwosit Agripa, ani edoli kidiŋ apaaran, abu ayoŋ oanyua eriŋa alosi alorot akica ŋina aŋesun atipei anakuj, ŋina acai akilo akoloŋ. Tocau ekenuak ayoŋ kaapei ka ŋulu ikirukitor.

¹⁴ Ani kikidau isua daadaŋ akimasakin kwap, abu eira etoil ebala neni kaŋ a Ŋaburaniyae, ‘Saulo, Saulo! Kaanukiro ikisicanitor iyoŋ ayoŋ? Erae iyoŋ iwana bon erae kirubak ikitepegi ayoŋ. Ikwaan ka neni epetepeteo esigirya ebela ŋolo icumucumuyere iŋes.’

¹⁵ Eŋit ayoŋ otema, ‘Ŋae iyoŋ, Ekapolon?’ Tema Ekapolon, ‘Arae ayoŋ Yesu ŋolo isicanit iyoŋ.

¹⁶ Nai tonyou, towo. Anerae atakanu ayoŋ neni kon, akaseuni iyoŋ aruwor eketiyan kaŋ, akiteyenikin ŋituŋa ŋakiro ŋuna iŋolik iyoŋ nakoloŋit na ka ŋuna akalimokini ayoŋ iyoŋ moi alokiŋaren.

¹⁷ Ekeyakiyari ayoŋ iyoŋ lotuŋa a Isirael ka neni a ŋulu nyerae Ŋiyudayan, ido euryari ayoŋ ikes nyikiwan iyoŋ.

¹⁸ Iŋaari iyoŋ ŋakonyen kec, ikotere kibelekinos anakiryonut nakica ka anapedor a ŋina a Satan, pena neni ka Akuj; toryamut nai aŋuna ka anupit kec akisyonio ŋina a ŋasecisya ka akibois aneni a ŋituŋa a ŋulu eturuwo Akuj ŋulu keŋ.’

Kirwor Paulo ŋuna ke etic keŋ

¹⁹ “Aŋun, erwosit Agripa, abu ayoŋ nyawou akiwuap atakanikinet ŋina anakuj.

²⁰ Nai abu esileereu nu, neni a ŋituŋa a daadaŋ akisyakin mono alo Damasko, tosodi nai alo Yerusalem ka akwap daadaŋ ŋina a Yudeya tari lobukui ŋulu nyerae Ŋiyudayan. Abu olimonok atemar itemokino ikes tokiwa ŋakecesecisya kibelekinos neni ka Akuj, kitiyata ŋuna itoodiunete atemar kekiwa ikes.

²¹ Ŋakiro ŋun ikes ekekamuniata ayoŋ Ŋiyudayan alo Kai ka Akuj ekekatakinito akiar.

²² Akitodol nakoloŋit na, ekeŋarakinit Akuj ayoŋ a ŋun, awoi ayoŋ a ne akiteyenun nu neni a daadaŋ, neni a ŋulu caryo kaapei ka ŋulu arwok. Nyerworo ayoŋ ŋace, nai ŋuna abasi ŋikadwarak ka Moses etakanunete.

²³ Abasi ikes ebe itemokino Kristo kisicanae ka toruwor ŋolo ke ekiŋaren ayarun alokatwak, kiserau nai akica ŋina ka aiuno neni a Ŋiyudayan ka ŋulu nyerae Ŋiyudayan daŋ.”

²⁴ Ani irworikini Paulo aŋuna keŋ alopite a lo, kiŋenyak Pesto iŋes tema, “Ikikerepikinit iyoŋ Paulo! Kikimunaiya iyoŋ asyomit kon ŋina apolon!”

²⁵ Nai tema Paulo, “Ekapolon Pesto, nyekekerepikinit ayoŋ! Nai erworo ayoŋ ŋakiro ŋuna a kire ŋuna ecayete.

²⁶ Eyeni tari erwosit ŋakiro ŋun ka erworo ayoŋ neni keŋ emam akuryanu. Ayeni kire atemar emam ŋakiro ŋun ŋuna ebucara aneni keŋ, anerae nyetakanuna ŋakiro nu anakimunono.

²⁷ Erwosit Agripa, inupit iyoŋ ŋuna irworosi ŋikadwarak a? Ayeni ayoŋ atemar inupit iyoŋ!”

²⁸ Tema Agripa neni a Paulo, “Emam ŋuna alalak ŋuna ebucara anakiro kon akituruwor ayoŋ Ekristoit!”

²⁹ Tema Paulo, “Kerae ŋuna alalak kori ŋuna ekudyoko, elipit ayoŋ Akuj atemar meere ayoŋ bon anupi Kristo, nai tari daadaŋ ŋulu epupete ŋakiro kaŋ nakoloŋit na, itemokino ikes kikokis ayoŋ--alemar nyitemokino toenae!”

³⁰ Tonyout nai erwosit ka Pesto ekepukan ka Berenike ta ŋituŋa ŋuluce daadaŋ,

³¹ torotokis kirworikinos make temasi, “Emam ŋakiro itiyat ekile lo, ŋuna itemokino toarere kori kiwuakinere mabus.”

³² Tema nai Agripa neni a Pesto, “Kelacakinitae ekile lo, kerae nyiŋitakinit alosit neni ke ekepukan a Roma.”