Ŋitic. 11 - Ebaibul

Ŋakiro ŋuna erworo Petero natukot a Ŋikristo alo Yerusalem

¹ Kiirasi Ŋikiyakia ka ŋikanupak ŋulu alo Yudaya daadaŋ atemar kecamut ŋituŋa ŋulu pa arae Ŋiyudayan daŋ ŋakiro ŋuna ka Akuj.

² Aŋun, ani elosi Petero Yerusalem, kitepega iŋes Ŋiyudayan ŋulu eitanito kileŋerae ŋituŋa ŋulu nyerae Ŋiyudayan temasi,

³ “Kaanukiro ilosyo iyoŋ lotuŋa ŋulu nyileŋeritae, akimuj ka ikes?”

⁴ Nai kisyak Petero alimonokin ikes ŋakiro daadaŋ ereunit a ŋapeipei tema:

⁵ “Apeikoloŋit eriŋa ayoŋ elipi alotaun a ŋolo enyaritae Yoppa, abu oanyuwa atakanikinet. Eŋolik ibore ŋini ekoni anaŋga ŋina apolon, iyooliunitoe anakuj kwap alocileta a ŋuluomwon, bu towo alodiyete kaŋ.

⁶ Abu eŋolik kojokan, oanyuwa ŋityaŋ ŋulu ka ariet, ŋulu alyatok ka ŋikyeny.

⁷ Eira etoil ebala neni kaŋ, ‘Petero, tonyou, toar, tonyam!’

⁸ Nai otema ayoŋ, ‘Ekapolon, mam! Anerae nyenyama ayoŋ ŋinapei idiobore ŋini italeo kori ŋini nyeseg.’

⁹ Nai kirworik nabo etoil anakuj tema, ‘Ibore ŋini etesegu Akuj, nyitemokino iyoŋ ibala nyeseg.’

¹⁰ Kitiyakin ŋun ŋakitiyakinet ŋauni, ido kinyakarae nai ibore ŋin nakuj.

¹¹ Apaki ŋinapei, todolunete ŋikilyok ŋiuni, ŋulu eyakuunitae neni kaŋ alo Kaisaria kai ŋina ayai ayoŋ.

¹² Okolimok ayoŋ Etau ŋolo Asegan arukor ka ikes pa aŋayaŋayat. Orukosi daŋ ayoŋ ka ŋikaitotoi ŋulukanikapei lu, tolotoi kai a Kornelio.

¹³ Ikitatamik iŋes isua epite ŋolo keanyuwaritor iŋes emalaika ewuoi alokai keŋ ebala, ‘Kiyakiya ŋikilyok Yoppa, tonyaraut Simoni ŋolo erae Petero.

¹⁴ Ikilimokini iŋes iyoŋ ŋakiro ŋuna iunor iyoŋ kaapei ka ekal kon daadaŋ.’

¹⁵ Ani ageuni ayoŋ erwor, min Etau ŋolo Asegan neni kec, lopite ŋolo aminio neni yok anageunet.

¹⁶ Otamu nai ayoŋ ŋakiro ŋuna ke Ekapolon ŋina abaakar, ‘Abu Yoana kibatisa a ŋakipi, nai ikibatisao iyes a Etau a ŋolo Asegan.’

¹⁷ Ani nai keinakinit Akuj ikes ainakinet ŋina ikoni ŋina abu ikiinak iwon apaki ŋina anupere Ekapolon Yesu Kristo, karae nai ayoŋ ŋae ekatakini akiretakin Akuj?”

¹⁸ Ani iirarete ikes ŋun, tojoŋoto apega. Kipuro Akuj temasi, “Ainaki nai Akuj ŋulu nyerae Ŋiyudayan daŋ apaki ŋina ekiyata, toyara!”

Atukot a Ŋikristo alo Antiokio

¹⁹ Toloto ŋikanupak ŋulu aponi kielarae aŋuna ka akisicanio a ŋina atakanuni kelunyar atwanare a Stepano, todolo Poenikia, Kupuro ka Antiokio. Kitatama ikes Ŋakiro ŋuna Ajokak neni a Ŋiyudayan make.

²⁰ Nai apotu ŋikanupak ŋice ŋulu arae ŋulu alo Kupuro ka Kurene toloto Antiokio, kirworo tari lotuŋa ŋulu pa arae Ŋiyudayan, tolimonokis ikes Ŋakiro ŋuna Ajokak ŋuna ke Ekapolon Yesu.

²¹ Ayai apedor ŋina ke Ekapolon neni kec, kibelekinos ka tonupa ŋituŋa ŋulu alalak Ekapolon.

²² Todolo ŋakiro nu natukot ŋina a ŋikanupak a Yesu alo Yerusalem, ido kiyakiya atukot Baranaba alosit Antiokio.

²³ Ani edoluni iŋes ka iŋolikini epite ŋolo kebunio Akuj kiterereŋio ikes, tolakar iŋes. Kicikak ikes arubakin anupit Ekapolon a ŋitai kec a daadaŋ.

²⁴ Arae Baranaba ekile ŋolo ajokan, ŋolo eleleba Etau ŋolo Asegan ka anupit. Kiyatakin nooi ŋituŋa, potu neni ke Ekapolon.

²⁵ Tolot nai Baranaba Taso akiwarit Saulo.

²⁶ Ani eryamuni, yau iŋes Antiokio. Yaasi ikes ekaru daadaŋ iryamiryameneneete ka ŋikanupak, kitatama daŋ ŋituŋa ŋulu alalak. Arae Antiokio esyakinere anyarare ŋikasyomak atemar Ŋikristo.

²⁷ Alorwa a ŋul, aponeneete ŋikadwarak alo Yerusalem tari Antiokio.

²⁸ Tonyou epei alokidiŋ kec ŋolo anyaritae Agabo, todwar ka apedor a ŋina ke Etau a ŋolo Asegan atemar ebuni eron ŋolo apolon nakwap daadaŋ. Abu nai eron ŋol bu apaki ŋina araakar Klauda ekepukan a Roma.

²⁹ Totyakut ŋikasyomak a Yesu atemar itemokino ŋinituŋanan alokidiŋ kec tolemu alopite a ŋolo apedorya alemun idiobore ŋini kiŋarakinet ŋikanupak alo Yudaya.

³⁰ Kitiyata ikes ŋun, kiyakiyasi Baranaba ka Saulo yaasi ŋisiliŋa, inakis ŋikatukok ŋulu ka atukot a Ŋikristo alo Yudeya.