Ŋitic. 1 - Ebaibul

Emalas

¹ Ekapolon Teopilo: Alokitaabo a ŋolo ke ekiŋaren, egirit ayoŋ ŋiticisyo daadaŋ ŋulu abu Yesu kitiya ka ŋakiro ŋuna etatami iŋes apaki ŋina esyakinia etic keŋ,

² akitodol akoloŋit ŋina ayaarere iŋes kidiama nakuj. Ani eriŋa iŋes nyeyaara nakuj, abu kicik Ŋikiyakia keŋ, ŋulu sek aris iŋes keseu alotooma apedor ŋina ke Etau a ŋolo Asegan.

³ Alotooma ŋirwa ŋatomoniomwon kelunyar atwanare keŋ, totakanu iŋes neni kec alopitesyo a ŋulu alalak a ŋulu etoodiunito kire atemar eyari iŋes; ido tolimok ikes ŋakiro ŋuna ka Apukan ka Akuj.

Yaarae Yesu kidiama nakuj

⁴ Apeikoloŋit erukito iŋes ka ikes, kicik iŋes ikes tema, “Nyirotokis alo Yerusalem, nai kidarutu ainakinet ŋina abu ayoŋ okolimok iyes--Etau ŋolo Asegan ŋolo ikiikinit iyes Papa kaŋ.

⁵ Anerae ebatisae Yoana a ŋakipi, nai alorwa a ŋidi a ŋulu alokiŋaren, ikibatisao iyes a Etau a ŋolo Asegan.”

⁶ Aŋun, kiŋita ikes iŋes temasi, “A Ekapolon, inyakakini iyoŋ ŋirwa lupei lu apukan lotuŋa a Isirael a?”

⁷ Tolimok Yesu ikes tema, “Etubunit Akuj Papa ŋirwa ka ŋapakio keŋ. Nyerae ŋuna kus ayenut ŋuna itemokinit iŋes anapedor keŋ.

⁸ Nai iryamunete iyes apedor apaki ŋina ebunio Etau ŋolo Asegan neni kus; iruworosi iyes ŋisuudae kaŋ alo Yerusalem, alo Yudaya daadaŋ ka Samaria tari neni isalya akwap.”

⁹ Ani kedau iŋes alimun ŋakiro nu, yaarae iŋes kidiama nakuj iteete ikes; torapuwa edou iŋes nyiŋolikis ikes.

¹⁰ Ani eriŋa ikes ireorito kidiama eyaaryo iŋes, apotu ŋikilyok ŋiarei towua alodiye kec, enapito ŋilowi ŋulu akwaŋak kya

¹¹ temasi, “Ŋikilyok ŋulu alo Galileya, nyo iwuatar iyes kireorito kidiama? Yesu lo ŋolo ayaar nakuj aneni kus, eboŋuni alopite a ŋolopei iŋolikiniata iyes iŋes elosi nakuj.”

Kilunyokinae Matia lokimar a Yuda

¹² Toboŋosi nai ikes alomoru a ŋikito a ŋulu enyaritae Olipa, toloto Yerusalem. Erae emoru ŋol apeikilomita alotaun.

¹³ Ani kelomut ikes lotaun, toloto todokasi nagule ŋina ayai kidiama, neni eboiyoto ikes; araakasi ikes Petero, Yoana, Yakobo, Anderia, Pilipo ka Tomas, Batolomayo ka Matayo, Yakobo lokoku ka Alipayo, Simoni ŋolo arae Eseletoit ka Yuda lokoku a Yakobo.

¹⁴ Acunakina ikes daadaŋ kilipeneneete kaapei ka ŋaberu ka Maria daŋ toto a Yesu ta ŋikaitotoi a Yesu.

¹⁵ Kelunyar ŋirwa ŋidikudyo, tocunakin ŋikanupak ŋulu aapikinito amiat ka ŋatomoniarei. Tosodi Petero tonyou kirworik

¹⁶ tema, “Ŋikaitotoi kaŋ, itemokino Ŋakigireta kiyookin lopite ŋolo koloŋ adwaritor Etau ŋolo Asegan anakituk a Daudi. Adwarit iŋes aŋuna a Yuda, a ŋolo etenuni ŋituŋa ŋulu ekamunete Yesu.

¹⁷ Arae iŋes epei alokimar yok, anerae etiyat iŋes daŋ etic lo.”

¹⁸ (Togyel iŋes emanikor a eropit a ŋolo ka aronis a ŋina abu iŋes kitiya. Alomanikor a ŋol, toramakin iŋes, tobwaŋa akook, kiyesunos ŋiboro ŋulu ka akook daadaŋ kiŋa.

¹⁹ Kiirasi ŋituŋa daadaŋ ŋulu aya Yerusalem ŋakiro ŋun, ido tolimokis a aŋajep kec ekiro a emanikor a ŋol “Akel Dama,” iŋes atemar, “Emanikor ŋolo a ŋaokot.” )

²⁰ “Anerae igiritae lokitaabo ŋolo a Ŋieosyo ebe: ‘Kipasakin akai keŋ koŋin; nyeloma ituŋanan idio akiboi tooma keŋ.’ Igiritae nabo ebe, ‘Kilunyokin ituŋanan ice lotic keŋ.’

²¹ “Aŋun, itemokino toseunae epei a ŋikilyok a ŋulu ikirukit ka iwon ŋapakio daadaŋ ŋuna ikirukitor iwon ka Ekapolon Yesu,

²² ameun apaki ŋina ebatisaa Yoana, akitodol ŋina ayaarere Yesu kidiama aneni yok. Itemokino iŋes oruko ka iwon oruworos ŋisuudae ŋulu ikibala ayaru Yesu alokatwak.”

²³ Aponi nai tolimunoe ŋikilyok ŋiarei: Yosepu ŋolo anyaritae Barisaba (ŋolo arae ekiro keŋ ece Yusito) ka Matia.

²⁴ Tosodo kilipa temasi, “Ekapolon, iyeni iyoŋ etau a ŋinituŋanan, kitoodikinae tokona isua alokilyok a ŋuluarei a lu ŋolo iseu iyoŋ.

²⁵ Itemokino iŋes kitiya etic ŋolo ke Ekiyakia, kilunyokin lotic ŋolo aesikini Yuda ŋolo abu tolot neni etemokino iŋes toyai.”

²⁶ Kilamilama ikes ŋamoru ŋuna egiritae ŋirorwa, kilo ekiro a Matia; toseunae nai iŋes kimorikinae Lokiyakia ŋulutomon ka epei.