Ŋirom. 7 - Ebaibul

Akitaanyikinet alotooma ekiitanu

¹ Ŋikaitotoi kaŋ, ayeni ayoŋ atemar ipedorete iyes ayenun ŋuna alosi ayoŋ alimun. Anerae iyenete iyes daadaŋ ŋuna ikamunito Ŋikisila. Ipukato Ŋikisila ituŋanan ŋirwa ŋulu eyarya iŋes.

² Akitaanyikinet iŋes na: aberu ŋina iisitae erae iŋes ŋina a lokile keŋ alokisila ŋirwa ŋulu eyarya lokile keŋ; nai ani ketwana lokile keŋ, elacakin iŋes alokisila a ŋulu eraakar iŋes ŋina alokile keŋ.

³ Aŋun nai, ani keruko iŋes ka ekile ece eriŋa lokile keŋ eyari, enyarao iŋes akaloman; nai ani ketwana lokile keŋ, eruwor iŋes ŋina elacakina alokisila a ŋul ka nyeruwor iŋes akaloman erae keruko ka ekile ece.

⁴ Ikote iyes daŋ nenipei nen ŋikaitotoi kaŋ. Apaki ŋina iponiata iyes tomoryata atwanare a Kristo ipotu iyes tolacakinos aneni a Ŋikisila ka itwakito tokona alokiŋaren Ŋikisila. Irae iyes tokona ŋulu a Kristo a ŋolo aponi kiteyarunae alokatwak, ikotere itiyaete ŋuna ajokak aŋuna ka Akuj.

⁵ Anerae apaki ŋina ikiboiyo iwon ikiwuapit ekibure yok bon, etiyae ekibure ŋolo aronon ŋolo isiguryakinito Ŋikisila anawat yok ka ikipotu iwon oruworos ŋulu ikitiyae ŋuna ikirikorete natwanare.

⁶ Nai tokona, ikilacakina iwon aneni a Ŋikisila, anerae ikipotu iwon otwaka alokiŋaren Ŋikisila ŋulu sek ikituruworito iwon ŋimabus. Nyeriŋa tokona iwon ikitiyae etic ŋolo ka Akuj alopite a ŋoloŋorot a ŋolo ke ekisil a ŋolo igiritae, nai alopite a ŋolokitete a ŋolo ke Etau ka Akuj.

Epite ŋolo isitiyaa asecit Ŋikisila ayaunia atwanare

⁷ Ikitemari nai tokona iwon Ŋikisila ikes erae asecit a? Mam jik! Nai arae Ŋikisila apotu eketeyenut ayoŋ ibore ŋini erae asecit. Pa kayenunit ayoŋ atemar erae akiŋobel icebore, kerae nyebasi Ŋikisila ebe, “Nyiŋobel.”

⁸ Nai abu asecit toryamu anakiciket a na apaki ŋina kisiguryakinet aneni kaŋ ŋipitesyo daadaŋ ŋulu ka akiŋobel. Anerae ani emam Ŋikisila, etwanit asecit.

⁹ Ayari koloŋ ayoŋ elope eriŋa nyepona Ŋikisila. Nai ani ebuni akiciket, toyaru asecit,

¹⁰ ido otwana ka abu akiciket ŋina etemokino yau akiyar neni kaŋ, yau atwanare.

¹¹ Abu asecit toryamu apaki keŋ, tosodi okomodik ayoŋ anakiciket a na; abu asecit kisitiya akiciket aŋuna ka aarya ayoŋ.

¹² Aŋun, nyerae Ŋikisila asecit, nai eponito aneni ka Akuj ka eponito ŋakiciketa kec daŋ aneni ka Akuj, nabo iyookino ka ejokak.

¹³ Akeepolou mono atemar ŋuna ajokak ŋuna erae Ŋikisila, ikes apotu yaut atwanare neni kaŋ a? Mam jik! Arae asecit abu kitiya ŋun. Abu asecit yau atwanare alotooma akisitiya ŋuna ajokak, ikotere eyenunere ibore ŋini kire erae asecit. Aŋun, alotooma akiciket, itoodiunitae asecit esecana nooi tari adepar.

Ejiye ŋolo eyai tooma yok

¹⁴ Ikiyeni iwon atemar erae Ŋikisila ŋulu eponito aneni ka Akuj, nai arae ayoŋ ituŋanan ŋini apalag ŋini akagyelaritae nasecit arae epito.

¹⁵ Nyayeni ayoŋ ŋuna etiyae; anerae nyetiyaenene ayoŋ ŋuna acamit, nai etiyaenene ŋuna aŋerit.

¹⁶ Ani etiyae ayoŋ ŋuna nyacamit akitiya, itoodiunito ŋun atemar acamunit ayoŋ atemar ejokak Ŋikisila.

¹⁷ Aŋun, nyerae ayoŋ kire etiyaenene ŋuna aronok, nai erae asecit ŋina eyai tooma kaŋ.

¹⁸ Ayeni ayoŋ atemar nyeyakasi ŋuna ajokak tooma kaŋ--iŋes atemar, alopite kaŋ a ŋolo araakar ituŋanan. Anerae tari keyai tooma kaŋ acamit akitiya ŋuna ajokak, nyapedorit akitiyakin.

¹⁹ Anerae nyetiyae ayoŋ ŋuna ajokak ŋuna acamit akitiya; nai, etiyae ŋuna aronok ŋuna nyacamit akitiya.

²⁰ Ani etiyae ayoŋ ŋuna nyacamit akitiya, nyerae ayoŋ kire etiyaenene ŋuna aronok, nai erae asecit ŋina eyai tooma kaŋ.

²¹ Aŋun, aanyu ayoŋ atemar alotooma kaŋ, itiyae ekisil lo: ani acamit ayoŋ akitiya ŋuna ajokak, ŋuna aronok bon apedori ayoŋ aseun akitiya.

²² Elakara ekaatau nooi aŋuna a Ŋikisila a ŋulu eponito aneni ka Akuj.

²³ Nai ete ayoŋ ekisil ŋolo egelaana itiyae aloticisyo kaŋ--ekisil ŋolo isiiryae ekisil ŋolo iyookino anatameta kaŋ. Eketuruworit ayoŋ emabus ŋolo a ekisil a ŋolo ka asecit--ekisil ŋolo a ŋiticisyo kaŋ.

^24-25 Erae nai epite ŋolo ayakar ayoŋ lo: Ayoŋ elope anaosou kaŋ ewuapit ekisil ŋolo ka Akuj, nai alopite a ŋolo araakar ituŋanan, ewuapit ekisil ŋolo ka asecit. Okoe nyipeituŋanan a ŋipapan ayoŋ! Ŋae akaiuni ayoŋ anakuwan a na, a ŋina akarikorit natwanare? Alakara ayoŋ neni ka Akuj a ŋina epedori aiun ayoŋ alotooma Ekapolon yok Yesu Kristo!