Ŋirom. 11 - Ebaibul

Epite ŋolo isyonitotor Akuj ŋituŋa a Isirael

¹ Eŋita nai ayoŋ atemar, abu Akuj toŋer ŋikeetuŋa a? Mam jik! Arae ayoŋ elope Esiraelit, lopapait ka Aburaam ka arae ŋolo anateker a Benjamin.

² Nyeŋero Akuj ŋituŋa keŋ, ŋulu abu iŋes toseu anakisyakinet. Iyenete iyes ŋuna igiritae Nakigireta ŋuna edyekitor Eliya Akuj aŋuna keŋ itoroniyarit ŋituŋa a Isirael ebala,

³ “Ekapolon, adaut ŋituŋa lu akiar ŋikadwarak kon ka abwaŋabwaŋaasi ŋamuroeta kon, ayoŋ bon edoŋ ka iwarito ikes akiar ayoŋ.”

⁴ Aniboŋokinet abu Akuj tolimok Eliya? Abu toboŋok tema, “Adau ayoŋ akisidoŋ ŋikilyok ŋalipyo ŋakanikaarei aŋuna kaŋ ŋulu nyeryediko kilipa neni ka akuj a ŋina koŋinait, a ŋina enyaritae Baal.”

⁵ Ikote tokona daŋ nenipei: eyakasi ŋituŋa ŋidikudyo ŋulu adau Akuj aseun aŋuna ka ajokis keŋ.

⁶ Eseunit Akuj ikes kire aŋuna ka ajokis keŋ, meere aŋuna adaut ikes akitiya. Anerae kerae toseununuye Akuj ŋituŋa aŋuna a ŋiticisyo kec, pa kerae ajokis keŋ ŋina a kire.

⁷ Aŋakiro a ŋun, meere Ŋisirael daadaŋ apotu toryamut ibore ŋini ewarito, nai ŋidikudyo bon ŋulu abu Akuj toseu apotu toryamut; apotu ŋuluce kitogogoŋo ŋakyes towuout akiirar ŋakiro ŋuna ka Akuj.

⁸ Ikwaŋinapei igiritere Nakigireta ebe, “Abu Akuj kitililimiyo ŋitai kec, kitabaŋaan ŋatameta kec. Akitodol tari tokona, nyepedorete ikes akiŋolikin a ŋakonyen kec kori akiirar a ŋaki kec.”

⁹ Ido ebala Daudi ebe, “Elipi ayoŋ neni ka Akuj toruwor ŋasuban kec ŋaunoi ŋuna isirumere ikes; elipi ayoŋ kisican Akuj ikes.

¹⁰ Elipi ayoŋ atemar kitumudukan Akuj ikes, ikotere nyiŋolikis ka tokudos ŋigurae kec jik anakiwokit ŋiboro aŋuna ka apitoonut kec.”

¹¹ Eŋita nai ayoŋ atemar apaki ŋina aoliyoritotor Ŋiyudayan, apotu mono ikes torubakis eoliyorito jik a? Mam jik! Nai aŋuna asecitotor ikes, abu aiuno neni a ŋituŋa a ŋulu nyerae Ŋiyudayan, ikotere erakaakiata Ŋiyudayan aŋuna kec.

¹² Abu asecit ŋina a Ŋiyudayan yau ŋarereŋisyo ŋuna alalak nakwap ka abu atwaniyar kec aiuno yau ŋarereŋisyo ŋuna alalak lotuŋa ŋulu nyerae Ŋiyudayan. Etyaunete nai ŋarereŋisyo ai ŋina imarakinere Ŋiyudayan daadaŋ etya neni etya aruwor ŋikanupak a Kristo!

Aiuno ŋina a ŋituŋa a ŋulu nyerae Ŋiyudayan

¹³ Ekesirwori tokona ayoŋ iyes ŋulu nyirae Ŋiyudayan, ikwaŋinapei araakar ayoŋ ekiyakia lotuŋa ŋulu nyerae Ŋiyudayan, enisakin ayoŋ nooi alotic kaŋ.

¹⁴ Acepaki apedori ainakin arakao lotuŋa kaŋ, Ŋiyudayan, ikotere aŋuna kaŋ toiunia Akuj ikes ŋice.

¹⁵ Anerae ŋina aŋerere ikes, aponi kituruworoe akwap ekone ŋolo ka Akuj. Ikokini nai ai apaki ŋina ecamunia Akuj Ŋiyudayan? Eyarunete ŋikatwak!

¹⁶ Ani keinakin Akuj anyilet ŋina ke ekiŋaren anamugati, erae nai amugati daadaŋ ŋina keŋ ka ani keinakin Akuj ŋataagor ŋuna ke ekitoe, erae ŋaten daŋ ŋuna keŋ.

¹⁷ Adaun abilanar ŋaten ŋace ŋuna ke ekitoe a ŋolo ka akimyet a ŋolo edupitae ka adaun akiderakin neni keŋ ateni ŋina ke ekitoe a ŋolo ka ariet, a ŋolopei erae ŋolo ka akimyet. Ikote iyes ŋulu nyiraakasi Ŋiyudayan ateni ŋina ke ekitoe a ŋolo ka ariet ka imorete tokona agogoŋu ka akiyar ŋina ileleba ŋina ke ekitoe a ŋolo edupitae, ŋolo erae Ŋiyudayan.

¹⁸ Aŋun nai, nyitemokino iyes isoloete Ŋiyudayan ŋulu abilanaritae ikwa ŋaten. Inisasi iyes aŋuna ainyo? Iraakasi iyes ŋaten ca; meere iyes igaŋito ŋataagor--ŋataagor ikigaŋito iyes.

¹⁹ Nai itemarete iyes, “Aponi tobilibilaarae ŋaten ikotere ikityeikis isua.”

²⁰ Erae ŋun kire! Aponi tobilanarae ikes, anerae pa anupito, tosodi ikilunyokin iyes nen, anerae inupito. Nai nyiturokinosi a ŋun; akilo, itemokino toyakatar akerit.

²¹ Abu Akuj nyerimak Ŋiyudayan, ŋulu isikwaanitae ka ŋaten ŋuna lopeyek; itamete iyes atemar ikirimakini iŋes iyes a?

²² Anakiro a ŋun ikiyenuni epite ŋolo erimaania Akuj ka epite ŋolo ededeŋia. Ededeŋ iŋes aneni a ŋulu adaut atwakiar, nai erimaana aneni kus--erae kirubakis iyes iyakasi narimaanut keŋ. Nai ani pa kirubakis, ikibilaryo iyes daŋ.

²³ Ŋiyudayan daŋ, ani keŋero ikes ŋakiro ŋuna nyenupitotor, iderakinio ikes nenipei paaran ayakasi; anerae epedori Akuj akiderakin ikes nabo.

²⁴ Iyes ŋituŋa ŋulu nyirae Ŋiyudayan, ikote iyes ateni ŋina ebilaryo ŋina ke ekitoe a ŋolo ka ariet a ŋolopei erae ŋolo ka akimyet, ŋina ereikinio kiderakinae lokitoe ŋolo edupio ŋolo ka akimyet tari sek pa kitiyaeneneo ikoŋina. Ikote Ŋiyudayan ŋaten ŋuna ke ekitoe a lo a ŋolo edupio; iŋes atemar epatanikini Akuj nooi akiderakin ŋaten ŋun ŋuna ebilaritae pena lokitoe kec.

Epite ŋolo isyonitotor Akuj ŋituŋa daadaŋ

²⁵ Ŋikaitotoi kaŋ, eya ŋakiro ŋuna a kire ŋuna ka akimunono ŋuna acamit ayoŋ iyes toyenut. Ikitojoŋoe nen iyes akitam atemar kori iosok iyes. Ikote ŋakiro ne: nyerae akisyaanua Ŋisirael a ŋice ŋinaruba, nai edaun anapaki a ŋina ecamuniata daadaŋ ŋulu eseunitae aneni a ŋulu nyerae Ŋiyudayan ŋakiro ka Akuj.

²⁶ Erae epite ŋol iŋes eiunotor Ŋisirael daadaŋ, ikwaŋina igiritere Nakigireta ebe, “Ebuni Ekaiunan alo Sion, tolema aronis daadaŋ aneni a ŋiletok a Yakobo.”

²⁷ Ebala Akuj ebe, “Ikicamun ayoŋ ka ikes anakiro a nu apaki ŋina alemarya ayoŋ ŋasecisya kec.”

²⁸ Aŋuna eŋeritotor Ŋiyudayan Ŋakiro ŋuna Ajokak, eraakasi ikes ŋimoi ŋulu ka Akuj ikotere iyes ŋulu nyirae Ŋiyudayan. Nai aŋuna aseunia Akuj ikes, eraakasi ikes ŋikonei keŋ aŋuna atapapaa kec.

²⁹ Anerae nyiloconokini Akuj ŋatameta keŋ alotooma ŋuna ikamunito ŋini adau iŋes aseun kori akiterereŋ.

³⁰ Nai iyes ŋituŋa ŋulu nyirae Ŋiyudayan, ipotu koloŋ iyes toŋero Akuj; nai tokona iryamut akisyon ŋina ka Akuj, anerae apotu Ŋiyudayan toŋero Akuj.

³¹ Ikwaŋinapei, eŋerito tokona Ŋiyudayan Akuj; nai aŋuna ka akisyon a ŋina iryamut iyes, eryamunete ikes daŋ akisyon ŋina ka Akuj.

³² Anerae agoloki Akuj ŋituŋa daadaŋ tooma aŋerit ŋakiro keŋ, ikotere itoodikinia akisyon keŋ neni kec a daadaŋ.

Itemokino kipuroe Akuj

³³ Okoe, kelalaar nooi ebari ŋolo ka Akuj, epol nooi aosou ka ayenut keŋ! Ŋae epedori akitacaun ŋuna etubununui iŋes? Ŋae epedori ayenun ŋakiro ŋuna itiyae iŋes.

³⁴ Ikwapei ebaakatar Ŋakigireta ebe, “Ŋae eyeni ŋatameta ŋuna ke Ekapolon, ŋae epedori akitatamyanakin iŋes ŋakiro?

³⁵ Ŋae mono ainaki idiobore neni keŋ, ikotere nai iŋes inyaŋari?”

³⁶ Anerae abu iŋes tosub ŋiboro daadaŋ ka itorunito ŋiboro daadaŋ neni keŋ ka eyakasi aŋuna keŋ. Toyai apolou neni ka Akuj ŋikaru ka ŋikaru! Amen.