Ŋirom. 10 - Ebaibul

¹ Ŋikaitotoi kaŋ! Agasi ayoŋ alotau kaŋ a daadaŋ atemar toiun ŋituŋa kaŋ! Elipit ayoŋ Akuj aŋuna kec!

² Apedori ayoŋ aruwor esuuda kec atemar erae ikes ŋulu elelakinito anupit Akuj. Nai ibatara alelakinit kec.

³ Nyeyenete ikes epite ŋolo ituruwonorya Akuj ŋituŋa ŋulu iyookino alokiŋaren keŋ ka ekatakis ikes akisyakin erot kec a ŋilopeyek; aŋun, apotu ikes nyecamut erot ŋolo ka Akuj ŋolo ituruwori ŋituŋa ŋulu iyookino alokiŋaren keŋ.

⁴ Anerae adau Kristo ayaun ekisal ŋolo a Ŋikisila, ido nai ituŋanan ŋini enupit ituruworyo ŋini iyookino alokiŋaren Akuj.

Erae aiuno ŋina a ŋituŋa a daadaŋ

⁵ Ŋuna ikamunito akiyookino alokiŋaren Akuj anakiwuapit Ŋikisila, abu Moses kigir ŋakiro nu, “Ituŋanan daadaŋ ŋini itiyae ŋuna icikakinito Ŋikisila, eyari a ŋun.”

⁶ Nai ŋuna ikamunito akiyookino alokiŋaren Akuj anakiwuapit anupit, igiritae Nakigireta ebe, “Nyitema alotau kon, ŋae elosi kidiama nakuj?” (iŋes atemar aŋuna ka ayaun Kristo kwap.)

⁷ “Nyitema nabo daŋ, ŋae elosi Nakibois ŋina a ŋikatwak?” (iŋes atemar aŋuna ka ayaun Kristo alokatwak.)

⁸ Ŋuna irworosi Ŋakigireta ikes nu: “Eapiyete ŋakiro ŋuna ka Akuj aneni kon, alopon kon ka alotau kon” -- ikes ŋuna ka anupit a ŋina ikilimonokini isua.

⁹ Ani kilimu ka akituk kon atemar, “Erae Yesu Ekapolon” ka tonup alotau kon atemar abu Akuj kiteyaru iŋes alokatwak, iiun iyoŋ.

¹⁰ Anerae ikinupit iwon alotai yok, ido ikituruwor ŋulu ikiyookino alokiŋaren Akuj; ikilimu iwon a ŋakitukwa yok, ido ikiun.

¹¹ Ebasi Ŋakigireta ebe, “Ŋinituŋanan enupi iŋes, nyirumete ŋileec jik.”

¹² Anerae emam atyaketait eyai kidiŋ Ŋiyudayan ka ŋulu nyerae Ŋiyudayan; erae Akuj apei ka erae Ekapolon a daadaŋ, ido iterereŋi nooi daadaŋ ŋulu ilipete neni keŋ.

¹³ Ikwapei ebaakatar Ŋakigireta ebe, “Ŋinituŋanan ilipi alokiro a ŋolo ke Ekapolon, eiun.”

Emam Ŋisirael epite ŋolo peget

¹⁴ Nai ikokinete ikes ilipete neni keŋ ai, erae keriŋa nyenupa? Ikokinete ikes enupete ai, erae keriŋa nyiirara ŋakiro ŋuna ka Akuj? Nabo ikokinete ikes iirarete ai, erae pa kiserae ŋakiro ŋuna ka Akuj?

¹⁵ Ikokinio iserao ŋakiro ŋuna ka Akuj ai, erae pa kiyakiyar ŋikiyakia? Ikwaŋinapei ebaakatar Ŋakigireta ebe, “Ejok nooi abunore ŋina a ŋulu eyaunete Ŋakiro ŋuna Ajokak.”

¹⁶ Nai meere daadaŋ acamut Ŋakiro ŋuna Ajokak. Aŋun, abala ekadwaran Isaya ebe, “Ekapolon, ŋae enupi ŋakiro kosi?”

¹⁷ Aŋun nai, epedorete ŋituŋa akinup anakiirar ŋakiro ka epedorete akiirar analimonokin ŋakiro a Kristo.

¹⁸ Nai eŋita ayoŋ nu: erae mono kire atemar nyiirara ikes ŋakiro a? Kire apotu ikes kiirasi--ikwapei ebaakatar Ŋakigireta ebe, “Apotu ŋakiro ŋuna erworosi ŋikiyakia kielakin akwap daadaŋ; apotu ŋakiro kec tonaŋa nakisaleta ŋuna ka akwap.”

¹⁹ Eŋita nabo ayoŋ nu: pa ayenete Ŋisirael apolou a ŋakiro a ŋun a? Arae Moses elope abu kisyau aboŋokin ebe: “Ebala Akuj, eketuruwori ayoŋ iyes ŋituŋa ŋulu iyakatar arakao neni a ŋulu emamukatar ebuku. Eketuruwori ayoŋ iyes ŋituŋa ŋulu iŋoikinito ebuku ŋolo ebaŋaaka ŋituŋa keŋ.”

²⁰ Nyekuryana Isaya elimunit atemar, “Apotu ŋulu pa ekewarito ayoŋ okoryamut, abu ayoŋ otakanu neni a ŋulu pa ekeŋitasi ayoŋ.”

²¹ Nai arae a ŋuna a Ŋisirael abaakar Isaya ebe, ebala Akuj, “Ŋapakio daadaŋ abu ayoŋ ebaki ŋakan kaŋ neni a ŋituŋa a ŋulu nyakakerito ka ŋulu akaŋerito ayoŋ.”