Ŋipil. 4 - Ebaibul

Kicata anakiyar kus alotooma Ekapolon

¹ Aŋun ŋikaitotoi kaŋ ŋuluminan, ekeburit ayoŋ nooi aanyun ka iyes! Iraakasi iyes alelyan kaŋ ka ŋakiro ŋuna eturor ayoŋ. Epite ŋol itemokino torubakiniata aneni ke Ekapolon, ŋuluminan.

² Okoe emaimai ayoŋ ŋaberu nu, Oiyodiya ka Sintike toyakaunotor ŋatameta ŋuna imorikina alotooma Ekapolon.

³ Acamit ayoŋ iyoŋ daŋ Sisipo ŋolo irae erukitos kaŋ ananupit, kiŋarak ŋaberu ŋun; anerae ikitiya ayoŋ ka ikes ka agogoŋu nooi akisera Ŋakiro ŋuna Ajokak, kaapei ka Kilement ka ŋuluce daadaŋ ŋulu ikitiyae ka ayoŋ, ŋulu igiritae ŋirorwa kec Lokitaabo ŋolo ka Akiyar.

⁴ Tolelyanete jwi jwi anakimorikina kus ka Ekapolon. Alimuni ayoŋ nabo atemar: tolelyanete!

⁵ Kiyapara alotuŋa a daadaŋ. Aapuu apaki ŋina ebunio Ekapolon.

⁶ Nyiyaloloŋete aŋuna a idiobore, nai anakiro a daadaŋ, kimaimaa ka tolimokisi Akuj ibore ŋini iitanito iyes, tolimonokinete iŋes a ŋitai a ŋulu elakara neni keŋ.

⁷ Epedori ekisil ŋolo ka Akuj ŋolo iloit ayenut ŋina a ituŋanan akiyok ŋitai ka ŋatameta kus anakimorikina ka Yesu Kristo.

⁸ Aŋetakini ŋikaitotoi kaŋ, totamete ŋakiro nu ŋuna ejokak ŋuna emaikina yaut ekipuri: ŋakiro ŋuna erae kire ŋuna ekerer, ŋuna iyookino, ŋuna emam aronis, ŋuna ka amina ka ŋuna itojokitae.

⁹ Kitiyata ŋuna ipotu iyes kisisaut ka kijaut ka toanyut aneni kaŋ. Eyakaun neni kus Akuj ŋina erae alope ekisil.

Alakara a Paulo neni a Ŋipilipi aŋuna ka ainakinet kec

¹⁰ Anakiyar kaŋ alotooma akimorikina ka Ekapolon, alakara ayoŋ nooi, anerae igeut nabo iyes amitakinit ayoŋ kelunyar apaki ŋina alalan. Nyabala ayoŋ ipotu iyes tojoŋoto amitakinit ayoŋ, nai imamukatar ca kire apaki ŋinakitiyaet ŋun.

¹¹ Nyalimunit ayoŋ ŋun abala eitanit idiobore, anerae ayenu ayoŋ akimwonikina kan, ibore ŋini ayakar.

¹² Ayeni ayoŋ epite ŋoloyaret anakulyako ka ŋoloyaret alobari. Adau ayoŋ ayenun akimunono ŋinayaret alopitesyo ka anapakio a daadaŋ emwonikina--kemwonit kori kakanyamit akoro, kayakar ibore ŋini alalan nooi kori ŋini edit nooi.

¹³ Apedori ayoŋ akitiya ŋiboro daadaŋ alotooma Kristo ŋolo akainanakini ayoŋ agogoŋu.

¹⁴ Nai ipotu iyes kitiyata ejok ikiŋarakis ayoŋ anatyokisyo kaŋ.

¹⁵ Iyenete iyes Ŋipilipi atemar apaki ŋina arotokinio ayoŋ alo Makedonia ŋarwa ŋuna ke ekiŋaren ŋuna alimonokinere Ŋakiro ŋuna Ajokak, amam atukot a Ŋikristo ŋina arae ekeŋarak ayoŋ mati iyes make, ŋulu ipotu omora ka ayoŋ alotooma akijaunun ka ainanakin ŋisiliŋa.

¹⁶ Tari apaki ŋina eitanitor ayoŋ akiŋarakino alo Tesalonika, ipotu iyes ŋarwa ŋuna alalak ikiyakikis ayoŋ ŋainakineta kus.

¹⁷ Meere ŋun ca atemar acamit ayoŋ ŋainakineta, nai acamit ayoŋ ŋiticisyo kus ŋulu ajokak kiyatakis eropit kus aneni ka Akuj.

¹⁸ Adau ayoŋ aryamun ainakinet kaŋ, itemokino ka elal daŋ nooi! Ayakar tokona ayoŋ ibore ŋini eitanit daadaŋ, ikwapei ayaunia Epapurodito ŋainakineta ŋuna ipotu iyes kiyakuut. Erae ikes amuronot ŋina akukunyon, ŋina ecamuna ka ŋina italakarit Akuj.

¹⁹ Ido alotooma Yesu Kristo, ikiinakini iyes Akuj kaŋ ibore daadaŋ ŋini iitanito alobari keŋ a ŋolo apolon.

²⁰ Toyai neni ka Akuj Papa yok apolou ŋina nyedaun ŋikaru ka ŋikaru! Amen.

Ŋimalasyo ŋulu esidyok

²¹ Kimalata ŋituŋa ŋulu ka Akuj daadaŋ alotooma Yesu Kristo. Ikimalaete iyes ŋikaitotoi ŋulu ikirukit ka ayoŋ a ne.

²² Ikimalaete iyes nooi ŋituŋa ŋulu ka Akuj daadaŋ ŋulu eyakasi ne, akilo nooi ŋulu ke ekal ke Ekepukan a Roma.

²³ Toyai neni kus ajokis ŋina ke Ekapolon Yesu Kristo.