Ŋipil. 3 - Ebaibul

Akiyookino ŋina a kire

¹ Aŋetakini, ŋikaitotoi kaŋ, tolelyana anakimorikina kus ka Ekapolon. Nyakaupi ayoŋ akigir ŋuna aris ayoŋ kekegirak iyes, anerae ikiŋarakinete iyes ŋun.

² Tocoikinito ŋituŋa ŋulu itiyaete aronis, ŋiŋokwo ŋul, ŋikilyok ŋulu erubakinito iitanito atubutub ŋawat.

³ Iwon ikiryamu akileŋeryo ŋina a kire, anerae ilipyo iwon neni ka Akuj alotooma Etau keŋ ka ikituro anakimorikina ka Yesu Kristo. Nyikinyomitae iwon ŋitalyo ŋulu itiyanakinio kiŋa akuwan,

⁴ tari daŋ ŋina ikiyakar ayoŋ ŋakiro ŋuna ekinyomitor ŋuna itiyao kiŋa akuwan. Ani ketami ituŋanan ice atemar eyakar iŋes ŋakiro ŋuna ikinyomitor ŋun, ayakar ayoŋ ŋuna alalak akilo.

⁵ Aponi ekeleŋeri ayoŋ akoloŋit ŋina a ŋakanikauni kelunyar akidouno kaŋ. Arae ayoŋ Esiraelit ŋolo anateker a Benjamin, ŋolo arae Eburaniyat kire. Alotooma akiwuapit Ŋikisila ŋulu a Ŋiyudayan, arae ayoŋ Eparisayot

⁶ ka ayai ayoŋ ekibure ŋolo ka akisican ŋikanupak a Kristo. Alotooma ŋuna ikamunito akiyookino anakiwuapit Ŋikisila a Ŋiyudayan, amam ayoŋ asecit.

⁷ Nai ŋakiro ŋun daadaŋ ŋuna sek emarakinit ayoŋ atemar erae epoida aneni kaŋ, emarak ayoŋ tokona atemar erae atwaniyaret aneni kaŋ aŋuna a Yesu Kristo.

⁸ Meere ŋakiro ŋun bon; emarakinit ayoŋ ŋakiro daadaŋ erae atwaniaret ŋina aronon aŋuna a ŋakiro a ŋuna epolok nooi--ikes ayenut Yesu Kristo Ekapolon kaŋ. Aŋuna keŋ, ajal ayoŋ ŋakiro daadaŋ ka emarak ikes erae agasiya, ikotere aryamuni Kristo

⁹ ka emorikinos jik ka iŋes. Nyeryamuna ayoŋ akiyookino alokiŋaren Akuj aŋuna kaŋ ke elope, kori aŋuna ka akiwuapit Ŋikisila. Nai aryamu tokona ayoŋ akiyookino ŋin aŋuna ka anupit Kristo--akiyookino ŋina ebunit aneni ka Akuj, ŋina itorunit nanupit.

¹⁰ Eitanit ayoŋ ayenun Kristo ka aanyun apedor ŋina ka ayarun keŋ ka akimor alocan keŋ, ekwaanikinotor ka iŋes anatwanare keŋ;

¹¹ ido alopite a ŋol egeno ayoŋ akimor ka iŋes ayarun alokatwak.

Eropit ŋolo eryamunete Ŋikristo anakerit kec

¹² Nyabala ayoŋ adau aryamun ŋun daadaŋ kori adau jik ajokyar. Nai ekatakinit nooi aryamun eropit ŋolo eryamunete Ŋikristo anakerit kec ikwapei adaunia Yesu Kristo akituruwor ayoŋ ŋolo keŋ.

¹³ Kire ŋikaitotoi kaŋ, nyatami ayoŋ atemar aryamu ayoŋ iŋes; nai ipeibore ŋini etiyae ayoŋ erae aesikin ŋuna alunyarosi, akeri ka agogoŋu aŋuna eyakasi kiŋaren.

¹⁴ Aŋun, aŋirikinit nooi akerit kiŋaren akitodol tari naŋetakinet, ikotere oryamu eropit ŋolo erae anyarit ŋina ka Akuj alotooma Yesu Kristo, nakiyar ŋina alokidiama.

¹⁵ Itemokino iwon daadaŋ ŋulu ikiyeni ejok ŋakiro ŋuna ka Akuj opakito anatameta ikwaŋinapei. Nai ani kiyakatar iyes ŋice atametait ŋina egelaana, ikisileerekini Akuj iyes tari ŋun.

¹⁶ Tari kikote neni daŋ, oloto lopite ŋolo pei sek itiyaere iwon.

¹⁷ Ŋikaitotoi, torubakisi ikitupusete ayoŋ; kiteto, kiwuapa ŋikanupak ŋulu adaut akituput isua.

¹⁸ Anerae ikwapei akalimokinitor ayoŋ iyes ŋapakio ŋuna alalak, alimuni nabo tokona eyaloloŋi tari anakigworo, elalak ŋulu etoodiu akiyar kec atemar erae ikes ŋimoi ŋulu ke emusalaba a Kristo.

¹⁹ Inyasunio ikes, anerae ekibure ŋolo a ŋawat kec iŋes erae akuj kec; iturosi ikes kan ibore ŋini itemokino kirumyata ŋileec ikes, ka eyakasi ŋatameta kec loboro ŋulu ka akwap a na bon.

²⁰ Nai ikirae iwon ŋituŋa ŋulu anakuj ka idaritae Ekaiunan, Ekapolon Yesu Kristo abunore anakuj.

²¹ Ilocokini iŋes ŋawat yok ŋuna palag ka ŋuna etwakete, kituruwo ikes ŋuna ikwaan ka akuwan keŋ ŋina ka apolou a ŋina anakuj. Isitiyae iŋes apedor ŋina epedoritor akiwuakin ŋiboro daadaŋ Napukan keŋ.