Ŋilep. 27 - Ebaibul

Alakun ibore ŋini sek amaikina arae ŋini ke Ekapolon

¹ Tema Ekapolon neni a Moses,

² “Tolimok Ŋisirael ebe, ‘Ani ikiini Ekapolon ibore ŋini iriyan etiyae keŋ ka ŋolo a ituŋanan,

³ ekile ŋolo erae ŋikaru ameun ŋatomoniarei tari ŋatomonikanikapei, emaikina etyae ŋolo elakunere iŋes erae ŋicekelya ŋulu ke esilipa ŋatomonikan alotyae a ŋolo ecamunito ŋituŋa daadaŋ isitiyao anakibois a ŋina asegan.

⁴ Ani kerae ituŋanan ŋin aberu, emaikina etyae ŋolo elakunere iŋes erae ŋicekelya ŋatomoniuni.

⁵ Ani kerae ituŋanan ŋin isapat ŋini erae ŋikaru ameun ŋikan akitodol ŋatomoniarei, emaikina etyae ŋolo elakunere iŋes erae ŋicekelya ŋatomoniarei, ani kerae ipese ŋini a ŋikaru a ŋul, emaikina etyae ŋolo elakunere iŋes erae ŋicekelya ŋitomon.

⁶ Ani kerae ituŋanan ŋin ikoku ŋinisapat ŋini erae apolou keŋ ameun elap epei akitodol ŋikaru ŋikan, emaikina etyae ŋolo elakunere iŋes ŋicekelya ŋulu ke esilipa ŋikan; ani kerae ipese ŋini a ŋikaru a ŋul, emaikina etyae ŋolo elakunere iŋes erae ŋicekelya ŋulu ke esilipa ŋiuni.

⁷ Ani kerae ituŋanan ŋin ekile ŋolo erae ŋikaru ameun ŋatomonikanikapei ka ŋice, emaikina etyae ŋolo elakunere iŋes erae ŋicekelya ŋitomon ka ŋikan. Ani kerae aberu, ŋina a ŋikaru a ŋul ka ŋice emaikina etyae ŋolo elakunere iŋes erae ŋicekelya ŋitomon.

⁸ Ani kekulyakana ituŋanan ŋini ikoŋi, pa kepedori akitac etyae ŋol, emaikina yau ituŋanan ŋini ikoŋi iŋes aŋuna keŋ neni ke esacaradoti, ido etubokini esacaradoti iŋes etyae ŋolo epedori iŋes akitac.

⁹ “‘Ani kerae ibarasit ekoŋi iŋes ituŋanan ainakin ikwapei ainakinet keŋ neni ke Ekapolon, eruwor ibarasit ŋin ŋini eseg.

¹⁰ Nyemaikina ituŋanan kilokonyu ibarasit ice, kori tominak ŋini ejok yau ŋini nyejok, kori yau ŋini nyejok tominak ŋini ejok. Ani kilokonyu iŋes ibarasit ice, eruwor ŋibaren ŋul daadaŋ ŋulu esegak.

¹¹ Ani kerae ibarasit ŋini ikoŋit ituŋanan ainakin Ekapolon ŋini itoroniyaritae, pa kerae ŋini emaikina inakinae neni ke Ekapolon, emaikina yaarae ibarasit ŋin neni ke esacaradoti.

¹² Ajokis, kori aronis a ibarasit ŋin daadaŋ ŋini elimuni esacaradoti daadaŋ ŋunapei.

¹³ Ani kecamit ilope a ibarasit alakun ibarasit ŋin, emaikina kiyatak lotyae a ibarasit ŋolo atubun atutubet apei alotooma ŋikan.

¹⁴ “‘Ani italeuni ituŋanan akai keŋ toruwor ŋina ke Ekapolon, etubuni esacaradoti epei ŋolo eyakar akai ŋin kejok, kori kerono. Ŋuna daadaŋ elimuni esacaradoti, daadaŋ ŋunapei ka erubakinete ikote nenipei.

¹⁵ Ani kecamit ituŋanan ŋini abu inak akai keŋ neni ke Ekapolon alakun akai keŋ, emaikina kiyatak lotyae ka akai ŋolo atubunitoe atutubet apei alotooma ŋikan, ido nai toruwor nabo akai ŋina keŋ.

¹⁶ “‘Ani italeuni ituŋanan ŋalup ŋuna a ekal keŋ ŋadi toruwor ŋuna ke Ekapolon, etubunio alotyae a ŋikinyom a ŋulu itaanakinio nen. Ŋicekelya ŋulu ke esilipa ŋitomon aŋuna a ŋakiloi a ŋatomoniarei aŋuna a ŋikinyom a ŋulu esibito erau.

¹⁷ Ani kitaleu ituŋanan ŋalup keŋ alokaru a ŋolo itiyaere ŋasuban ŋuna a ŋikaru a ŋatomonikan, mam etyae ece iyatakinio nalup ŋun.

¹⁸ Nai ani kitaleu iŋes ŋalup keŋ ekaku kitiyae ŋasuban ŋuna a ŋikaru a ŋatomonikan, etubuni esacaradoti etyae a ŋalup ŋun kimarak tari etyae ŋolo a ŋikaru ŋulu idoŋito todol apaki ŋina itiyaere ŋasuban ŋuna a ŋikaru a ŋatomonikan. Ani edoli ekaru ŋol, kitiditeunae nai etyae a ŋalup a ŋun.

¹⁹ Ani kecamit ituŋanan ŋini abu inak ŋalup keŋ neni ke Ekapolon alakun ŋalup keŋ, emaikina kiyatak lotyae a ŋalup a ŋun ŋolo atubunitoe atutubet apei alotooma ŋikan, ido nai toruwor nabo ŋalup ŋuna keŋ.

²⁰ Ani pa kelaku iŋes ŋalup ŋun, kori kegyelaritae ŋalup ŋun neni a ice, nyepedoryo nabo jik alakun ŋalup ŋun.

²¹ Ani kipotokin ŋalup ŋun alokaru a ŋolo a ŋatomonikan neni ke Ekapolon eruwor ŋalup ŋun ŋuna esegak ŋuna erae ainakinet neni a ŋisacaradotin.

²² Ani kitaleu ituŋanan neni ke Ekapolon ŋalup ŋuna sek egyelit iŋes, ŋuna sek nyerae ŋuna ke ekal keŋ,

²³ emaikina esacaradoti totubu etyae a ŋalup a ŋun ŋolo etacio akitodol ekaru ŋolo itiyaere ŋasuban ŋuna a ŋikaru a ŋatomonikan, ido emaikina ituŋanan ŋin totac etyae a ŋalup a ŋun akoloŋit ŋin ikwapei ibore ŋini eseg neni ke Ekapolon.

²⁴ Ani edoli ekaru ŋolo itiyaere ŋasuban ŋuna a ŋikaru a ŋatomonikan, emaikina kinyakakinae ŋalup ŋun neni a ituŋanan a ŋini sek agyelunere, a ŋini erae ilope ŋalup.

²⁵ Emaikina epite ŋolo etubunitere ŋicekelya ŋulu isitiyao anakibois a ŋina asegan, ecamunito ŋituŋa daadaŋ.

²⁶ “‘Emam ituŋanan emaikina yau ibarasit ŋinikiyae kitaleik neni ke Ekapolon, anerae erae sek ŋibaren ŋulukiyae ŋulu ke Ekapolon; kerae aate, kori amesek, erae ŋulu ke Ekapolon.

²⁷ Ani pa kejok ibarasit ŋinikiyae ŋin aŋuna ke Ekapolon, epedori ituŋanan agyelun iŋes aneni ke Ekapolon alotyae a ŋolo sek etubunitoe, kiyatak lobei ŋol atutubet apei alotooma ŋikan. Ani pa kepedori iŋes alakun ibarasit ŋin, emaikina togyelarae neni a ice alotyae a ŋolo sek etubunitoe.

²⁸ “‘Nai ibore daadaŋ ŋini ayakar ituŋanan, ŋini adau ituŋanan akitaleikin neni ke Ekapolon, kerae ituŋanan, ibarasit, kori ŋalup ŋadi ŋuna a ekal keŋ, nyemaikina togyelarae, kori tolakunae. Eseg ibore daadaŋ ŋini italeiyoritae neni ke Ekapolon.

²⁹ Nyemaikina ituŋanan ŋini adaun akitaleikin neni ke Ekapolon tolakunae, emaikina toarae.

³⁰ “‘Ŋainakineta ŋuna ilemete iyes anakwap daadaŋ aŋuna ke Ekapolon, kerae ŋikinyom kori ŋaraito a ŋikito, erae ŋuna ke Ekapolon; esegak ikes aneni ke Ekapolon.

³¹ Ani kecamit ituŋanan alakun aneni ke Ekapolon adio a ŋainakineta keŋ, emaikina kiyatak lotyae ka ainakinet a ŋin atutubet apei alotooma ŋikan.

³² Ani imarete iyes ŋaatuk, kori ŋamesekin kus, ibarasit ŋini ŋitomon daadaŋ ŋini imarakinio tomacarae emanit alokwap ebela ŋolo ke ekeyokon, eruwor ainakinet ŋina asegan neni ke Ekapolon.

³³ Nyemaikina ituŋanan emitakinit aanyun kejok, kori kerono ibarasit ŋin, kori emitakinit akilunyokin ibarasit ice. Ani kilunyok, eruwor ŋibaren ŋul daadaŋ ŋulu esegak aneni ke Ekapolon, ido nyemaikina tolakunae.’ ”

³⁴ Erae ŋun ŋakiciketa ŋuna abu Ekapolon inak neni a Moses alomoru Sinai aŋuna a Ŋisirael.