Ŋilep. 23 - Ebaibul

Ŋasuban ŋuna emaikina itiyaeneneo

¹ Tema Ekapolon neni a Moses,

² “Tolimok Ŋisirael ebe, ‘Erae ŋasuban nu ŋuna Ekapolon, ŋuna emaikina itiyaeneneo kaapei, ŋuna emaikina kiserakinae lotuŋa erae ŋuna esegak. Erae nu ŋasuban ŋuna atubunit ayoŋ kitiyae.

Ŋasuban ŋuna a Sabato, Paska ka ŋamugati ŋuna emam ŋakinyalet

³ “‘Kitiyata etic ŋirwa ŋikanikapei bon, nai akoloŋit ŋina a ŋakanikaarei erae ŋina a Sabato ŋina ka akieŋun. Erae akoloŋit ŋina asegan ŋina icunakinotor iyes iwapei kilipa. Nyemaikina iyes kitiyata etic edio aneni daadaŋ iboiyoto iyes. Erae akoloŋit ŋin Sabato ŋina ke Ekapolon.

⁴ “‘Erae nu ŋasuban ŋuna etubunit Ekapolon ŋuna asegak, ŋuna emaikina itiyaeneneo, ŋasuban ŋuna icunakinotor iyes iwapei kilipa.

⁵ Ani edoli elap ŋolo ke epei, ŋirwa a elap ŋitomon ka ŋiomwon, apaki ŋina edoiyorya akoloŋ, emaikina iyes tolemut ŋainakineta ŋuna a Paska neni ke Ekapolon.

⁶ Ani edoli ŋirwa ke elap a ŋol ŋitomon ka ŋikan, kitiyata neni ke Ekapolon ŋasuban ŋuna a ŋamugati aŋuna emam ŋakinyalet; tonyama ŋamugati ŋuna emam ŋakinyalet ŋirwa ŋikanikaarei.

⁷ Akoloŋit ŋina esyaunan alorwa a ŋul, tocunakinos iwapei kilipa irae ŋulu asegak; nyilot loticisyo kus akitiya.

⁸ Emaikina iyes alotooma ŋirwa ŋikanikaarei yaasi neni ke Ekapolon ŋainakineta kus ŋuna epeyo. Ani epete ŋirwa ŋikanikaarei alorwa a ŋul, tocunakinos iwapei kilipa irae ŋulu asegak. Nyilot loticisyo kus akitiya.’ ”

Ŋainakineta anaraito a ŋuna esyaunak

⁹ Tema Ekapolon neni a Moses,

¹⁰ “Tolimok Ŋisirael ebe, ‘Ani ilomarete iyes nakwap ŋina alosi ayoŋ ainakin iyes, ido tolema ŋikinyom ŋulu itaete iyes, emaikina iyes yaut neni ke esacaradoti ŋaraito ŋuna ilemunete iyes a nen ekiŋaren.

¹¹ Emaikina esacaradoti kikyaa ŋaraito ŋun alokiŋaren Ekapolon, ikotere iyes iruwor ŋulu ikicamunit Ekapolon; emaikina iŋes kikyaa ŋaraito ŋun akoloŋit ŋina esyaunan kelunyar Sabato.

¹² Akoloŋit ŋina ikyaarere ŋaraito kus, emaikina iyes toara imesek ŋini erae apolou keŋ ekaru epei, ŋini emam neni eŋwalit; toruwor amuronot neni ke Ekapolon ŋina epeyo.

¹³ Tolemutu imesek ŋin kaapei ka ŋainakineta a ŋikinyom ŋuna epeyo. Tolemutu ŋakirya ŋuna iguritoe ka akimyet ŋakiloi ŋaarei. Ejokyar eure a ŋainakineta a ŋun aneni ke Ekapolon. Yaasi daŋ kaapei ka ŋainakineta ŋun epiini ŋolo erae elita epei.

¹⁴ Nyemaikina iyes tonyama amugati adio, kori ekinyomit edio ŋolokitete epeitoe, kori ejon, akitodol akoloŋit ŋina iyauniata iyes ŋainakineta ŋun neni ka Akuj kus. Erae ŋun ŋakiro ŋuna etubunitoe ŋuna a ŋikaru ka ŋikaru ananyameta kus a daadaŋ ka aneni daadaŋ iboiyoto iyes.

Ŋasuban ŋuna a ŋisabito

¹⁵ “‘Ameun akoloŋit ŋina esyaunan kelunyar Sabato, akoloŋit ŋina iauniata iyes ŋainakineta ŋuna ikyaaryo, emaikina iyes kimarasi ŋisabito ŋikanikaarei tolunyar.

¹⁶ Emaikina iyes kimarasi ŋirwa ŋulu a Sabato akitodol ŋina elunyarotor ŋikanikaarei, kori ŋirwa ŋatomonikan; ido nai yaut ŋainakineta kus ŋuna a ŋikinyom a ŋulukitet neni ke Ekapolon.

¹⁷ Aneni iboiyoto iyes a daadaŋ, yautu ŋabopuloe ŋaarei emaikina ŋinabopulo itiyaunitae a ŋakirya a ŋuna erae ŋakiloi ŋaarei toyakas ŋakinyalet. Yautu ŋun erae ŋainakineta ŋuna ikyaaryo, anaraito a ŋuna ke ekiŋaren neni ke Ekapolon.

¹⁸ Yautu ŋabopuloe ŋun kaapei ka ŋikaalei ŋulumesekin ŋikanikaarei ŋulu nyeŋwalito, ŋulu erae apolou kec ekaru epei; yautu etaok epei ka ŋimeesekin ŋiarei. Eruwor ikes ŋainakineta ŋuna epeyo neni ke Ekapolon, kaapei ka ŋainakineta ŋuna a ŋikinyom ka ŋimaten. Eruwor ikes ŋainakineta ŋuna icunyio ŋuna ebob eure kec aneni ke Ekapolon.

¹⁹ Emaikina iyes toara ekoroe epei erae ainakinet aŋuna ka asecit ka ŋikaalei ŋiarei ŋulumesekin ŋulu erae apolou kec ekaru epei erae amuronot aŋuna ke ekisil.

²⁰ Emaikina esacaradoti kikyaa ŋikaalei ŋulumesekin ŋul alokiŋaren Ekapolon kaapei ka ŋamugati ŋuna a ŋikinyom a ŋulu ke ekiŋaren. Erae ikes ŋainakineta ŋuna asegak neni ke Ekapolon aŋuna ke esacaradoti.

²¹ Akoloŋin ŋin, emaikina kiserata ŋakiro ŋuna a ŋasuban, tocunakinos iwapei kilipa irae ŋulu asegak; nyilot loticisyo kus akitiya. Erae ŋun ŋakiro ŋuna etubunitoe ŋuna a ŋikaru ka ŋikaru ananyameta kus a daadaŋ ka aneni daadaŋ iboiyoto iyes.

²² “‘Ani ilemunete iyes ŋaraito ŋuna ka akwap kus, nyilema tari ŋuna eya lokukoru a ŋimanikorin kus kori nyidepa ŋulu ecakanakin kwap ilemete, kimyekisi ŋul aŋuna a ŋikulyak ka ŋigelaanotin. Arae ayoŋ Ekapolon Akuj kus.’ ”

Ŋasuban ŋuna a ŋarupepe

²³ Tema Ekapolon neni a Moses,

²⁴ “Tolimok Ŋisirael ebe, ‘Ani edoli ŋirwa ke elap epei, elap ŋolo a ŋikanikaarei, emaikina iyes kieŋut akoloŋit ŋin, tocunakinos iwapei irae ŋulu asegak, tokuta ŋarupepe itamunito ŋasuban a akoloŋit a ŋin.

²⁵ Nyilot loticisyo kus akitiya; yaasi ŋainakineta kus ŋuna icunyio neni ke Ekapolon.’ ”

Akoloŋit ŋina itiyaere amooki

²⁶ Tema Ekapolon neni a Moses,

²⁷ “Ani edoli ŋirwa ke elap ŋitomon, elap ŋolo a ŋikanikaarei, erae akoloŋit ŋin ŋina itiyaere amooki. Tocunakinos iwapei irae ŋulu asegak, kiredakisi akiron ka yaasi ainakinet ŋina epeyo neni ke Ekapolon.

²⁸ Nyitiyata etic edio akoloŋit ŋin daadaŋ, anerae erae akoloŋit ŋin ŋina itiyaere amooki, akoloŋit ŋina ikimookunere iyes alokiŋaren Ekapolon Akuj kus.

²⁹ Ituŋanan daadaŋ ŋini nyiredakini akiron akoloŋit ŋin daadaŋ, emaikina kiritarae alotuŋa keŋ.

³⁰ Aari ayoŋ alotuŋa ituŋanan daadaŋ ŋini itiyae etic edio akoloŋit ŋin daadaŋ.

³¹ Nyitiyata etic edio jik. Erae ŋun ŋakiro ŋuna etubunitoe ŋuna a ŋikaru ka ŋikaru ananyameta kus a daadaŋ ka neni daadaŋ iboiyoto iyes.

³² Erae akoloŋit ŋin ŋina a Sabato ŋina emaikina kieŋunere, ido itemokino iyes kiredakis akiron. Ameun eboŋ, ŋirwa ke elap a ŋol ŋikanikaomwon, akitodol ataboŋ ŋinace, emaikina iyes totamunito Sabato.”

Ŋasuban ŋuna a ŋisakaitei

³³ Tema Ekapolon neni a Moses,

³⁴ “Tolimok Ŋisirael ebe, ‘Ani edoli ŋirwa ke elap ŋitomon ka ŋikan, elap ŋolo a ŋikanikaarei, emaikina kisyakinae akitiya ŋasuban ŋuna ke Ekapolon ŋuna a ŋisakaitei, ido emaikina kitiyae ŋirwa ŋikanikaarei.

³⁵ Erae akoloŋit ŋina esyaunan ŋina icunakinotor iyes iwapei kilipa irae ŋulu asegak, nyitiyata ŋiticisyo kus.

³⁶ Alotooma ŋirwa ŋul ŋikanikaarei, yaasi ŋainakineta kus ŋuna icunyio neni ke Ekapolon. Ani edoli ŋirwa ŋikanikauni, tocunakinos iwapei kilipa irae ŋulu asegak, ido yaasi akoloŋit ŋin ŋainakineta ŋuna icunyio neni ke Ekapolon. Erae acunakin ŋin ŋina esidyon; nyitiyata etic edio.

³⁷ “‘Erae ŋasuban ŋun ŋuna etubunit Ekapolon, ŋuna emaikina iyes kinumunuma icunakinosi irae ŋulu asegak, apaki ŋina iyauniata neni ke Ekapolon ŋainakineta ŋuna epeyo. Ŋainakineta ŋuna epeyo, ŋuna a ŋikinyom, ŋamuronisya ka ŋainakineta ŋuna a ŋimaten, emaikina yaunae ŋainakineta ŋun edoli akoloŋit ŋina itemokinitoe aŋuna kec.

³⁸ Erae ŋasuban ŋun ŋuna iyatakina nasuban ŋuna a Sabato, a akoloŋit a ŋina ke Ekapolon ka erae ŋainakineta ŋun ŋuna iyatakina nainakineta kus, nainakineta daadaŋ ŋuna idaut iyes akiikin ainakin Ekapolon ka ŋainakineta kus daadaŋ ŋuna itemunete iyes anacamit kus.

³⁹ “‘Aŋun, ani edoli ŋirwa ke elap ŋitomon ka ŋikan, elap ŋolo a ŋikanikaarei, kidaut iyes akilem ŋikinyom kus, kitiyata ŋasuban neni ke Ekapolon ŋirwa ŋikanikaarei; akoloŋit ŋina esyaunan, erae ŋina ka akieŋun, ido akoloŋit ŋina edolioto ŋirwa ŋikanikauni, erae ŋina ka akieŋun.

⁴⁰ Ani edoli akoloŋit ŋina esyaunan, tolemutu ŋaraito ŋuna ajokak alokito a ŋulu apolok, tolemutu ŋaten a ŋiŋolya, ŋaten a ŋikuyono ŋuna elalak ŋakuii ka ŋatetelei ŋuna elomete anayona, ido tolelyana alokiŋaren Ekapolon Akuj kus ŋirwa ŋikanikaarei.

⁴¹ Kitiyata ŋasuban ŋun erae ŋuna ke Ekapolon ŋirwa ŋikanikaarei a ŋolokaru. Erae ŋun ŋakiro ŋuna etubunitoe ŋuna a ŋikaru ka ŋikaru ananyameta kus a daadaŋ a ŋuna eponito; kitiyata ŋun edoli elap ŋolo a ŋikanikaarei.

⁴² Kiboiyoto alosakaitei ŋirwa ŋikanikaarei; emaikina iyes daadaŋ ŋulu ikiuritae irae Ŋisirael kiboiyoto alosakaitei.

⁴³ Aŋun, eyenunete ŋipapae kus atemar abu ayoŋ esiboi Ŋisirael losakaitei apaki ŋina ayaunia ikes alo Ijipit. Arae ayoŋ Ekapolon Akuj us.’ ”

⁴⁴ Aŋun, abu Moses tolimok Ŋisirael ŋasuban daadaŋ ŋuna ke Ekapolon ŋuna amaikina ikes kitiyata.