Ŋilep. 22 - Ebaibul

Epite ŋolo isitiyaere ŋainakineta ŋuna asegak

¹ Tema Ekapolon neni a Moses,

² “Tolimok Aron ka ŋidwe keŋ ŋulusapa kisitiyata ejok ŋainakineta ŋuna asegak ŋuna eketaleikinito Ŋisirael ayoŋ, ikotere nyemunaasi ekiro kaŋ ŋolo asegan. Arae ayoŋ Ekapolon.

³ Tolimok ikes ebe, ‘Ananyameta a daadaŋ a ŋuna eponito, ani pa kitaleuno idio alopapae kon, ido toapu nainakineta ŋuna asegak ŋuna italeikinito Ŋisirael Ekapolon, emaikina ituŋanan ŋin totyakarae tojoŋo atakanu aneni kaŋ. Arae ayoŋ Ekapolon.

⁴ Ani keyai ipapait ka Aron idio ŋini eyakar edeke ŋolo ka amuny a akuwan, kori ibore idio anakuwan, nyemaikina iŋes tonyam ŋainakineta ŋuna asegak ŋun, akitodol ŋina italeunere. Eruwor daŋ iŋes ŋini itoroniyaritae erae ketapakin ibore idio ŋini kebu totapakin neni a ituŋanan a ŋini etwanit, kori ketapakin neni a ituŋanan a idio ŋini kebukuno ŋaokot ŋuna ka aur,

⁵ kori erae ketap ŋiboorei ŋulu elyato ŋulu epedorete akituruwor iŋes ŋini itoroniyaritae, kori ketap ituŋanan ŋini ituruwori iŋes ŋini itoroniyaritae, kori ibore ca daadaŋ ŋini itoroniyaritae.

⁶ Ipapait ka Aron daadaŋ ŋini etapi ŋulu imarunitae ŋul tari ipei, erubakini erae ŋini itoroniyaritae akitodol eboŋ. Nyemaikina iŋes tonyam ŋainakineta ŋuna asegak ŋun adio, mati mono kiloŋar.

⁷ Ani edoiyori akoloŋ, eruwor iŋes ŋini nyitoroniyaritae, ido ekaku, epedori akinyam ŋainakineta ŋuna asegak ŋun, anerae erae akimuj keŋ.

⁸ Nyemaikina iŋes tonyam ibore idio ŋini eryamunio etwanit, kori ŋini eryamunio etyaŋ ŋolo ka ariet kear, anerae ŋiboorei ŋul ŋulu itoroniyaritae. Arae ayoŋ Ekapolon.

⁹ Emaikina ŋisacaradotin kirica ŋakiro kaŋ, ikotere nyeruwor ŋulu iilit, ido totwaka anakibois a ŋina asegan aŋuna emunaaryata akibois ŋin. Arae ayoŋ Ekapolon ŋolo abu eturuwo ikes ŋulu esegak.

¹⁰ “‘Nyecamakinitae ituŋanan ŋini nyerae ŋini ke ekal a ŋisacaradotin enyami ŋainakineta ŋuna asegak ŋun, mam tari epito ŋolo ke esacaradoti, kori ituŋanan ŋini ilejileji lore keŋ.

¹¹ Nai ani kegyelu esacaradoti epito, kori apito, kori keuritae epito ŋol, kori apito ŋin alokal keŋ, enyami epito ŋol, kori apito ŋin akimuj ŋin.

¹² Ani kiita ituŋanan ŋini nyerae esacaradoti nakoku ke esacaradoti, nyemaikina nakoku ke esacaradoti ŋin tonyam ŋainakineta ŋuna asegak.

¹³ Nai, ani ekaku keruwor nakoku ke esacaradoti ŋin apuserut, kori kelaki, ido tomam ŋidwe, toboŋu akiboi lore a papa keŋ lopite ŋolo sek eboiyo eriŋa erae apese, emaikina iŋes tonyam akimuj ŋina enyami papa keŋ. Nyecamakinitae ŋituŋa ŋulu nyerae ŋisacaradotin enyamete akimuj ŋin.

¹⁴ Ani kebucakin ituŋanan idio akinyam ŋainakineta ŋuna asegak, emaikina ituŋanan ŋin kiyatak atutubet apei alotooma ŋikan a etyae a ainakinet ŋina anyam iŋes, ido inak neni ke esacaradoti ainakinet ŋina asegan ŋin.

¹⁵ Mam ituŋanan emaikina kinyasu ŋainakineta ŋuna asegak ŋuna eyaununeete Ŋisirael ainakin neni ke Ekapolon kec,

¹⁶ inak ikes aryamun akiilit ŋina itelemuni ikes ainakinet ŋina ka akiilit aŋuna anyamyata ŋainakineta ŋuna asegak. Arae ayoŋ Ekapolon, ŋolo abu eturuwo ikes ŋulu esegak.’ ”

Ŋainakineta ŋuna ecamunitae

¹⁷ Tema Ekapolon neni a Moses,

¹⁸ “Tolimok Aron ka ŋidwe keŋ ŋulusapa ta Ŋisirael daadaŋ ebe, ‘Ani eyauni Esiraelit edio, kori igelaanot ŋini iboi alo Isirael ainakinet, kerae akisiyookinio ŋuna ekoŋit iŋes, kori ainakinet keŋ a ilope ŋina a elemunit iŋes anacamit keŋ, ŋina einakinit Ekapolon erae ŋina epeyo,

¹⁹ emaikina iyes tocamut erae kerae imoŋ ŋini emam neni eŋwalit, kelemunitae anaatuk, kori anamesekin kori anamee.

²⁰ Nyiinakis neni ke Ekapolon ibarasit ŋini eyai neni eŋwalit, anerae nyecamunio ŋin aŋuna kus.

²¹ “‘Ani keyau ituŋanan idio ainakinet ŋina ke ekisil neni ke Ekapolon, ŋina erae akisiyookinio ŋuna ikoŋit iŋes, kori ainakinet keŋ a ilope ŋina elemunit iŋes anacamit keŋ, ŋina elemunit iŋes anaatuk, kori anakinei, ecamunio erae kejok ka kemam neni eŋwalit.

²² Ibarasit daadaŋ ŋini emudukana, kori ŋini ewanan, kori itelitoe, kori ŋulu etuboritae iwace anakuwan keŋ, kori ŋini ipi akuwan, kori ŋini eyai emitina, nyemaikina iyes inakis erae ainakinet neni ke Ekapolon, kori kiwuakis kidiama namuroet erae ainakinet ŋina epeyo aŋuna ke Ekapolon.

²³ Ipedorete iyes ainakin Ekapolon ainakinet ŋina ka acamit kus, emoŋ, kori emesek ŋolo eoya, kori euruwuana akeju apei, nai nyecamakinio ŋin erae kerae ainakinet ŋinakisiyookinet ŋuna ikoŋito iyes.

²⁴ Nyiinakis neni ke Ekapolon ibarasit ŋini ewanan ŋitou, ŋini ekonyitae, kori idoŋitoe, kori ŋini eusitoe. Nyitiyata ŋakiro ŋun anakwap kus,

²⁵ ido nyicamut ŋibaren ŋulu ikote ŋul eaunete ŋigelaanotin inakis Ekapolon erae akimuj neni ka Akuj kus. Nyecamunio ŋibaren ŋul aŋuna kus, anerae iŋwalitae, ido eyakatar neni eŋwalit.’ ”

²⁶ Tema Ekapolon neni a Moses,

²⁷ “Ani eurunio itaok, kori imesek, kori imeot, emaikina toruko ka toto keŋ ŋirwa ŋikanikaarei. Ani epete ŋirwa ŋikanikauni ka ŋice, ecamakinio ibarasit eruwor ainakinet neni ke Ekapolon ŋina epeyo.

²⁸ Nai nyemaikina toarae itaok, kori imesek kaapei ka toto keŋ akoloŋit apei.

²⁹ Ani iyaarete iyes ainakinet ŋina ka alakar neni ke Ekapolon, toara iyenete atemar ecamakinio aŋuna kus.

³⁰ Emaikina tonyamae akoloŋit ŋinapei ŋin, nyimyekis akiriŋ keŋ adio kiwalak. Arae ayoŋ Ekapolon.

³¹ “Alopite a ŋol, iwuapete iyes ŋakiciketa kaŋ ka iricete ikes. Arae ayoŋ Ekapolon.

³² Nyemaikina iyes tomunaasi ekiro kaŋ ŋolo asegan. Emaikina ayoŋ akacamunito ŋituŋa kaŋ Ŋisirael arae ŋolo aseg. Arae ayoŋ Ekapolon, ŋolo abu eketuruwo iyes ŋulu isegak.

³³ Ayoŋ abu okoyau iyes anakwap a Ijipit, ikotere aruwor Akuj kus. Arae ayoŋ Ekapolon.”