Ŋilep. 21 - Ebaibul

Ŋitalyo aŋuna a ŋisacaradotin

¹ Tema Ekapolon neni a Moses “Tolimok ŋisacaradotin, ŋidwe ka Aron ŋulusapa ebe, ‘Mam esacaradoti emaikina tomunaar bon aŋuna elosyo neni eyai iyenet keŋ ŋini etwanit,

² alemar mati erae iyenet keŋ ŋini ke ekal ikwapei: Toto keŋ, papa keŋ, nakoku keŋ, lokoku keŋ, lokaato keŋ;

³ nyemaikina esacaradoti tolot neni etwanitor nakaato keŋ ŋina eriŋa erae apese, emunaar esacaradoti erae kelot nen.

⁴ Nyemaikina esacaradoti toruwor ŋolo itoroniyaritae aŋuna alosyo neni etwanitor iyenet keŋ ŋini erae ikamuran, ido tomunaar bon.

⁵ Nyemaikina ŋisacaradotin elukanarete ŋitim anakyes kec, kori ikebete nawaetin a ŋipeneka kec, kori eduŋuduŋuyete ŋawat kec.

⁶ Emaikina ikes erae ŋulu esegak aneni ka Akuj kec, ido nyemaikina ikes kiyanya ekiro ka Akuj kec, anerae ikes eayeneneete neni ka Akuj ŋainakineta ŋuna epeyo, akimuj ŋina ka Akuj kec, aŋun, emaikina ikes erae ŋulu esegak.

⁷ Nyemaikina ikes kiita ŋaberu ŋuna erae ŋamalaae, kori ŋuna sek iryamakina ka ŋikilyok, kori ŋuna sek elakitae, anerae emaikina ŋisacaradotin erae ŋulu esegak aneni ka Akuj kec.

⁸ Emaikina iyes kitopoloorito ŋisacaradotin erae ŋulu esegak, anerae ikes eayeneneete akimuj ŋina ka Akuj kus. Kitopoloorito ikes erae ŋulu esegak, anerae ayoŋ Ekapolon ŋolo eketuruwonori iyes ŋulu isegak, arae ŋolo aseg.

⁹ Ani kemunaar nakoku ke esacaradoti, toruwor amalaat, etajamuwa ŋituŋa papa keŋ; emaikina iŋes kicunyarae.

¹⁰ “‘Esacaradoti daadaŋ ŋolo itopolooryo topolok ŋuluce, ŋolo iosakinio akimyet nakou keŋ ituruworyo ŋolo enapenene ŋilowi ŋulu ke esacaradoti, nyemaikina iŋes kimyek ŋitim keŋ pa ikyerara, kori tocili ŋilowi keŋ.

¹¹ Nyemaikina iŋes toloma nakibois ŋina eyai ituŋanan ŋini etwanit; nyemaikina iŋes toruwor ŋolo itoroniyaritae tari kerae ituŋanan ŋin papa keŋ, kori toto keŋ.

¹² Nyemaikina iŋes torotok anakibois a ŋina asegan a ŋina ka Akuj keŋ, kori tomunaa akibois ŋina asegan ŋina ka Akuj keŋ, anerae aponi iŋes kitalei toruwor esacaradoti, kiosakinae akimyet ŋina ka Akuj keŋ. Arae ayoŋ Ekapolon.

¹³ Emaikina aberu ŋina iisi iŋes erae ŋina sek nyiryamakina ka ekile.

¹⁴ Nyemaikina iŋes kiit apuserut, kori aberu ŋina elakitae, kori aberu ŋina sek iryamakina ka ekile, kori amalaat, nai emaikina kiit aberu ŋina sek nyiryamakina ka ekile, ŋina erae ŋina alotuŋa keŋ.

¹⁵ Erae ŋun ikotere nyeruwor ŋidwe keŋ ŋulu ejamuwaritae alotuŋa keŋ. Arae ayoŋ Ekapolon, ŋolo abu eturuwo iŋes ŋolo eseg.’ ”

¹⁶ Tema Ekapolon neni a Moses,

¹⁷ “Tolimok Aron ebe, ‘Ananyameta a ŋuna eponito, mam ipei daŋ alopapae kon a ŋulu eŋwalit iwadio, ŋini emaikina toapu neni kaŋ, yau akimuj ŋina ka Akuj keŋ.

¹⁸ Mam ekile edio ŋolo eŋwalit iwadio, ŋolo emaikina toapu neni kaŋ; mam ekile edio ŋolo emudukana, kori eŋwalit, kori eŋotor akuwan keŋ, kori ŋolo emunaara akuwan keŋ;

¹⁹ mam ekile ŋolo eŋwalit akeju, kori akan,

²⁰ kori ŋolo eyai aruk, kori ŋolo earit auruwuanut, kori ŋolo emunaara iwace anakonyen, kori ŋolo eyakar edeke ŋolo ipyono, kori ŋiipu, kori ŋolo idoŋitoe.

²¹ Nyemaikina ipapait ka Aron ipei daŋ ŋini eyai adio a ŋakiro a ŋun toapu neni ke Ekapolon, yau ainakinet ŋina epeyo neni ke Ekapolon, anerae eya neni keŋ adio a ŋakiro ŋuna imarunitae ŋun, nyemaikina iŋes toapiya neni ke Ekapolon, ya akimuj ŋina ka Akuj keŋ.

²² Epedori ipapait ŋin akinyam akimuj ka Akuj ŋina asegan nooi, kaapei ka ŋamuja ŋunace ŋuna asegak.

²³ Nai nyemaikina iŋes toapiya nanaŋga ŋina aloeema, kori toapiya namuroet, anerae eŋwalit iwace anakuwan keŋ, erae ŋun ikotere iŋes nyemunaa ŋakiboisyo kaŋ ŋuna asegak. Arae ayoŋ Ekapolon ŋolo eturuwonori ŋakiboisyo ŋun ŋuna esegak.’ ”

²⁴ Aŋun, abu Moses tolimok Aron ka ŋidwe keŋ ŋulusapa ŋakiro ŋun, tolimok daŋ Ŋisirael daadaŋ.