Ŋilep. 19 - Ebaibul

Ŋikisila ŋulu ka asegis ka akiyookino

¹ Tema Ekapolon neni a Moses,

² “Tolimok Ŋisirael daadaŋ ebe, ‘Toruworos ŋulu asegak, anerae aseg ayoŋ Ekapolon Akuj kus.

³ Emaikina ŋinituŋanan alokidiŋ kus kitopoloorite toto keŋ ka papa keŋ, ido totamunite akoloŋit ŋina a Sabato. Arae ayoŋ Ekapolon Akuj kus.

⁴ Nyilipa neni a ŋakujo a ŋunacaryo, kori nyitiyaut anasuwa ŋitorubei a ŋakujo kus. Arae ayoŋ Ekapolon Akuj kus.

⁵ “‘Ani iarete iyes ainakinet ŋina ke ekisil erae amuronot neni ke Ekapolon, toara alopite a ŋolo ecamuni Ekapolon aŋuna kus.

⁶ Emaikina ainakinet ŋin tonyamae akoloŋit ŋinapei ŋin, kori akoloŋit ŋina etupakini ŋin; ibore daadaŋ ŋini epiyanun pena ŋirwa ŋiuni, emaikina kicunyae.

⁷ Ani ibore idio anainakinet a ŋin ŋini enyamyo kepena ŋirwa ŋiuni, erae nen asiilyo, ido nyecamuni Ekapolon ŋun.

⁸ Ituŋanan daadaŋ ŋini enyami ainakinet ŋin adio kepena ŋirwa ŋiuni, emaikina kisicanae, anerae amunaa ainakinet ŋina asegan neni ke Ekapolon; emaikina ituŋanan ŋin kiritarae alotuŋa keŋ.

⁹ “‘Ani ilemunete iyes ŋikinyom alomanikorin kus, nyilema tari ŋulu eyakasi nawaetin emanikor, kori nyiboŋokis akidep tari ŋulu ecakanakina kwap.

¹⁰ Nyemaikina iyes isokataete emanikor kus ŋolo ke epiini, kori ilosete akidep ŋaraito a epiini ŋuna ecakanakina kwap. Kimyekisi ŋul aŋuna a ŋulu a ŋican ka ŋigelaanotin. Arae ayoŋ Ekapolon Akuj kus.

¹¹ “‘Nyikoŋo; nyimodyanakinosi make ka nyirworosi alyokonu.

¹² Nyikoŋo alokiro kaŋ akidiŋ, ido a nen kiyenya ekiro ka Akuj kus. Arae ayoŋ Ekapolon.

¹³ “‘Nyitunae ŋikidunyetkon, kori nyikoko. Nyidid akitac ŋikelejilejak kiwala akwap nyetaca.

¹⁴ Nyicenete ŋulu ekiŋimaka, kori nyiwuanak lorot ibore ŋini ibusokini ŋimudukan, nai kitopoloo Akuj kon. Arae ayoŋ Ekapolon.

¹⁵ “‘Kitiyata ŋuna iyookino apaki ŋina itubioto ŋakiro, nyikisyonioto ŋulu a ŋican apaki ŋin, kori nyiwara akitojoka aneni a ŋulu erae ŋikabarak, nai totubonokisi ŋikidunyetkus alotooma akiyookino.

¹⁶ Nyirimit irworor ŋuluce alokidiŋ ŋituŋa kon. Nyitiya ibore idio aŋuna ka aryamunia epoida ketwana ikidunyet kon. Arae ayoŋ Ekapolon.

¹⁷ “‘Nyimanit ŋiyeneta kon alotau kon. Tolimok ŋikidunyetkon itoŋoiyarit atemar idyakarito, erae ŋun ikotere nyeruworosi ikes ŋulu esecito.

¹⁸ Nyiwara akinyaŋ ŋakiro, kori akimanit ŋituŋa kus, nai tomina ikonikidunyet ikwa ŋina iminar iyoŋ akonikuwan. Arae ayoŋ Ekapolon.

¹⁹ Kiwuapa ŋakiro ŋuna atubunit ayoŋ. Kiuryasi ŋibaren kus ŋulu egelegelya ŋikabilae nyesuposi. Nyiekis ŋikinyom kus ŋulu egelegelya lomanikor epei. Nyinap ŋilowi ŋulu edonyunitoe alolowi a ŋiarei a ŋulu egelegelya.

²⁰ “‘Ani kiryamakin ekile ka aberu ŋina erae apito, ŋina sek eikinitae ekile ece, nai toriŋa nyelakuna, kori nyimyekina iŋes tolot tojoŋo araakau apito, emaikina mono kiŋitatei ŋakiro ŋun. Nyemaikina ikes toarae, anerae ariŋa aberu ŋin erae apito.

²¹ Nai emaikina yau ekile ŋol neni ke Ekapolon emesek ŋolo erae ainakinet aŋuna ka akiilit, yau lopuke ŋolo ke eema a ŋolo ilipere.

²² Emookuni nai esacaradoti alokiŋaren Ekapolon ekile ŋol anasecit keŋ ke emesek a ŋol a ŋolo erae ainakinet aŋuna ka akiilit, ido isyonio ekile ŋol anasecit keŋ.

²³ “‘Ani kidaut iyes alomar nakwap ŋina akainakini ayoŋ iyes, ido todupakis ŋikito ca daadaŋ ŋulu a ŋaraito, kimyekisi ŋaraito ŋun erae ŋuna ikitaleo iyes akinyam. Emaikina ŋikaru ŋiuni todaun imyekinito iyes ŋaraito ŋun ikitaleo iyes akinyam; nyemaikina iyes tonyama ikes.

²⁴ Ani epete ŋikaru ŋiomwon, eruwor ŋaraito ŋun daadaŋ ŋuna esegak, ainakinet ŋina a ŋasuban a ŋuna ipurere Ekapolon.

²⁵ Nai ani epete ŋikaru ŋikan, emaikina iyes tonyama ŋaraito ŋun. Alopite a ŋol, iyatakinio nyikinyom ŋulu ilemete iyes. Arae ayoŋ Ekapolon Akuj kus.

²⁶ “‘Nyinyama akiriŋ a ityaŋ, kori a ibarasit a ŋini nyeŋolitae toitasi ŋaokot. Nyemaikina iyes toruworos ŋimurok, kori ŋikekukujak.

²⁷ Nyikeba ŋitim anamateŋen kus, kori ŋipeneka kus.

²⁸ Nyiduŋuduŋoto ŋawat kus etwani ituŋanan, kori nyigera ŋawat kus. Arae ayoŋ Ekapolon.

²⁹ “‘Nyisol nakoku kon, kituruwo iŋes amalaat, ikotere nyemalaan akwap daadaŋ kilelebun aronis.

³⁰ Totamunito Sabato kaŋ, ido kitopoloorito akibois kaŋ ŋina asegan. Arae ayoŋ Ekapolon.

³¹ “‘Nyilot neni a ŋimurok kori nyiwara ŋililae aŋuna ka akitumunaar ikes. Arae ayoŋ Ekapolon Akuj kus.

³² “‘Tonyoutu epote neni kus ŋituŋa ŋulu emojoŋito, kitoodiutu atemar itopoloorito iyes ŋulu emojoŋito ka itopoloorito iyes Akuj kus. Arae ayoŋ Ekapolon.

³³ “‘Ani kiboiyete iyes anakwap kus ka ituŋanan ŋinigelaanot, nyiteryamunito iŋes ŋican.

³⁴ Emaikina iyes totiŋito ituŋanan ŋin esibit erae ŋini a ekabila kus pei. Tominas iŋes ikwa imininia iyes make, anerae iraakasi paaran iyes daŋ ŋigelaanotin alo Ijipit. Arae ayoŋ Ekapolon Akuj kus.

³⁵ “‘Nyimodyanakis ŋituŋa ipimete aoyau a ibore, apotis a ibore, kori alalau a ibore a idio.

³⁶ Kisitiyata ŋakipimeta ŋuna iyookino, ŋakipimeta ŋuna ka apotis, ŋakipimeta a ibore a ŋini eliit. Arae ayoŋ Ekapolon Akuj kus, ŋina abu akoyau iyes alo Ijipit.

³⁷ Kiwuapa ŋakiro kaŋ ŋun daadaŋ ŋuna atubunit ayoŋ ka ŋikisila kaŋ daadaŋ, ido totamunito ikes. Arae ayoŋ Ekapolon.’ ”