Ŋilep. 12 - Ebaibul

Akitaleunun ŋaberu kedaut akidoun

¹ Tema Ekapolon neni a Moses,

² “Tolimok Ŋisirael ebe, ‘Ani kepoti aberu ido kidou ikoku ŋinisapat, emaikina alotooma etal torubak pa italeuno ŋirwa ŋikanikaarei ka pa eseg lopite ŋolo nyesegia iŋes ŋirwa ŋulu ayakar iŋes lolap.

³ Ani epete ŋirwa ŋikanikauni, emaikina idya ŋin kileŋerae.

⁴ Emaikina nai aberu ŋin kiboi ŋirwa ŋatomoniuni ka ŋiuni idarit akitaleuno. Nyemaikina iŋes etapi ibore idio ŋini italeuno, kori elomari loeema ŋolo ilipere, akitodol ŋina edaunotor ŋirwa ŋulu italeere iŋes.

⁵ Ani kidou aberu ŋin ikoku ŋinipese, erubakini aberu ŋin pa italeuno ŋisabito ŋiarei pa eseg, lopite ŋolo nyesegia iŋes ŋirwa ŋulu ayakar iŋes lolap. Emaikina iŋes kiboi ŋirwa ŋatomonikanikapei ka ŋikanikapei idarit akitaleuno.

⁶ “‘Ani edaun ŋirwa ŋulu italeere iŋes kidou isapat kori ipese, emaikina iŋes yau neni ke esacaradoti, lopuke ŋolo ke eema a ŋolo ilipere imesek ŋini nyedeparit apolou keŋ ekaru epei, erae ainakinet ŋina epeyo, yau daŋ temeleudi, kori akuri erae ainakinet aŋuna ka asecit.

⁷ Emaikina esacaradoti ya ŋainakineta ŋun kiŋaren Ekapolon, tomooku aberu ŋin; toruwor nai ŋina italeuno anakiro a ŋuna pa asegia iŋes. Erae ŋul ŋikisila aŋuna a ŋaberu a ŋuna idounete ikoku ŋinisapat, kori ŋinipese.

⁸ Ani pa kepedori aberu ŋin aryamun imesek, emaikina iŋes ya ŋakuryo ŋaarei, kori ŋatemeleudi ŋaarei, apei erae ainakinet ŋina epeyo ka ŋinace erae ainakinet aŋuna ka asecit, ido nai tomooku esacaradoti iŋes, toruwor ŋina italeuno.’ ”