Ŋilep. 10 - Ebaibul

Nadab ka Abiu

¹ Apaki ŋin, kepotu ŋidwe ka Aron ŋulusapa, Nadab ka Abiu tolemut ŋisipiryae ŋuna ka akim, kiwuakis ŋatotol ŋuna kenepete, ido kiwuakis ekinyate nen, yaasi neni ke Ekapolon. Nai pa arae akim ŋin ŋina etesegitae, anerae nyicika Ekapolon ikes akitiya ŋun.

² Aŋun, abu Ekapolon kiyaku akim tonomiya ikes, totwanikis kiŋaren Ekapolon.

³ Tema nai Moses neni ka Aron, “Arae ŋakiro ŋun ŋuna esileereunit Ekapolon ŋinibore abaakar ebe, ‘Itoodiun asegis kaŋ aneni, a ŋulu eketopoloorito ayoŋ ka eketopoloorete ayoŋ ŋituŋa daadaŋ.’”

Kililiŋ Aron totakin cek.

⁴ Tonyarau Moses Misael ka Elisapan, ŋidwe a Usiel ŋulusapa; arae Usiel mamae ka Aron, tema neni kec, “Potu kiŋaren ne, todakasi ŋiyeneta kus alokiŋaren akibois ŋina asegan, yaasi kiŋa alomar.”

⁵ Potu Misael ka Elisapan kiŋaren, todakasi ŋawat a Nadab ka Abiu kiŋa alomar, edakito a ŋisatyo a ŋikatwak a ŋul pei, lopite ŋolo alimokinitor Moses ikes.

⁶ Tema nai Moses neni ka Aron ka ŋidwe keŋ ŋulusapa Eleasar ka Isamar, “Nyimyekis ŋitim ijaanaete, ido nyicila ŋilowi kus, ani kitiyata iyes ŋun, itwakete iyes, ido eŋoikini Ekapolon ŋituŋa daadaŋ. Nai ecamakinitae Ŋisirael ŋuluce daadaŋ kigworo aŋuna ka atwanare a ŋin a ŋina etoruni nakim ŋina eyakuuni Ekapolon.

⁷ Nyilomasi kiŋa epuke ŋolo ke eema a ŋolo ilipere, ani kitiyata iyes ŋun, itwakete iyes, anerae ikitaleunitoe iyes ka akimyet a ŋina ke Ekapolon a ŋina iosere ŋituŋa.” Aŋun, apotu ikes kitiyata ikwapei alimokinitor Moses ikes.

⁸ Tema nai Ekapolon neni ka Aron,

⁹ “Nyemaikina iyoŋ ka ŋidwe kon ŋulusapa apaki ŋina ilomaryata loeema ŋolo ilipere tomata epiini, kori ŋagwe ŋadi ŋuna adwarak. Ani kitiyata ŋun, itwakete. Erae ŋol etal ŋolo a ŋikaru ka ŋikaru tari ananyameta a ŋuna eponito.

¹⁰ Emaikina iyoŋ toyenu ibore ŋini eseg ka ŋini isitiyao car, ibore ŋini nyitoroniyaritae ka ŋini itoroniyaritae,

¹¹ ido emaikina iyoŋ kitatam Ŋisirael ŋakiro daadaŋ ŋuna atubu Ekapolon ŋuna adau alimun aneni a Moses.”

¹² Tema Moses neni ka Aron ka ŋidwe keŋ ŋulusapa ŋulu edoŋito, Eleasar ka Isamar ebe, “Tolemutu ainakinet ŋina a ŋikinyom ŋina idoŋit anainakineta a ŋuna epeyo aŋuna ke Ekapolon, tonyama alodiyete namuroet emam ŋakinyalet, anerae erae ainakinet ŋina asegan nooi.

¹³ Emaikina iyes tonyama ainakinet ŋin anakibois a ŋina asegan, anerae erae ŋina ikityakakinitae iyoŋ ka ŋidwe kon ŋulusapa, anainakinet a ŋina epeyo aŋuna ke Ekapolon; epite ŋol iŋes ekecikitor Ekapolon ayoŋ.

¹⁴ Nai atorobu ka amuro ŋinerin ŋulu ikiyaanaryo, emaikina iyoŋ ka ŋidwe kon ŋulusapa tonyama kaapei ka ŋapesur anakibois a daadaŋ a ŋina italeunitoe, anerae adaun atyakakin ŋinerin ŋul neni kon ka ŋidwe kon anainakineta a ŋuna ke ekisil a ŋuna eyaunete Ŋisirael.

¹⁵ Emaikina yaunae neni kon amuro ŋina erae ekiner kon ka atorobu ŋina ikyaanaryo, yaunae kaapei ka ŋasepwa a ŋainakineta a ŋuna epeyo, ikotere kiyaanarae alokiŋaren Ekapolon. Eruwor ŋinerin ŋul ŋulu kon ka ŋidwe kon ŋikaru ka ŋikaru, lopite ŋolo adaunia Ekapolon alimun.”

¹⁶ Kiŋit Moses ikes ŋakiro ka ameot a ŋina alemunitae erae ainakinet aŋuna ka asecit, ido aponi tolimokinae iŋes atemar aponi kicunyae. Toŋoik Moses nooi Eleasar ka Isamar, ŋidwe ka Aron ŋulusapa ŋulu edoŋito, kiŋit ikes tema,

¹⁷ “Kaanukiro pa inyamyata iyes ainakinet aŋuna ka asecit ŋin anakibois a ŋina italeunitoe? Anerae erae ŋin ainakinet ŋina eseg nooi, ido adau Akuj ainakin iyes ainakinet ŋin alemarya asecit aneni a ŋituŋa, tomookut ikes alokiŋaren Ekapolon.

¹⁸ Nyeyauna ŋaokot ka ameot a ŋin nakibois ŋina alotooma jik anakibois a ŋina asegan. Amaikina iyes kire jik tonyamito ibarasit ŋin anakibois a ŋina asegan lopite ŋolo ekecikitor ayoŋ iyes.”

¹⁹ Toboŋok Aron Moses tema, “Apotu ikes nakoloŋit na yaut ŋainakineta kec, aŋuna ka asecit ka ŋina epeyo alokiŋaren Ekapolon, nai atakanut ŋakiro ŋuna ikote ŋun neni kaŋ. Ani mono kerae onyamite ayoŋ ainakinet ŋina ka asecit ŋin nakoloŋit na, kelakara mono Ekapolon aŋuna kaŋ a?”

²⁰ Ani iirari Moses ŋakiro ŋun, abu tocamu.