Ŋikol. 4 - Ebaibul

¹ Ŋikapolok, totiŋito ŋipi kus alopite a ŋolo ajokan; toyenete atemar eyai iyes daŋ Ekapolon nakuj.

Ŋakitatameta ŋuna esidyok

² Torubakisi jik ilipete ka totenito anakilip, tolakara neni ka Akuj.

³ Kilipeneneete aŋuna kosi daŋ, ikotere ikiinakini Akuj isua apaki ŋina ajokan ŋina limonokinet ŋakiro ŋuna imunono, ŋuna erae ŋakiro a Kristo, ŋuna erae ikes pei ayakar ayoŋ mabus.

⁴ Kilipete, ikotere eserae ayoŋ ŋun, alopite a ŋolo emaikina ayoŋ eseraa.

⁵ Itemokino iyes toosok alopitesyo a ŋulu iboiyoto iyes alokidiŋ ŋituŋa ŋulu nyeraakasi Ŋikristo. Kisitiyata ejok apaki daadaŋ ŋina iyakatar iyes.

⁶ Itemokino erwor kus jwi jwi tojok ka tobob ka itemokino iyes toyenete epite ŋolo emaikina toboŋonokinioto ŋinituŋanan ejok.

Ŋimalasyo ŋulu esidyok

⁷ Ikilimokini iyes Tuciko ŋakiro ŋuna akatapito ayoŋ daadaŋ. Erae iŋes lokaato ŋolo minat alotooma Ekapolon Kristo, ŋolo erae eketiyan ŋolo ikinyomitae isua, ŋolo ikitiyae kaapei ka isua etic ŋolo ke Ekapolon.

⁸ Ŋakiro ŋun iŋes eyakuunitor ayoŋ iŋes neni kus, alimokin iyes epite ŋolo iboiyere isua, ikotere nai ikisimukekis iyes ŋun.

⁹ Erukunete iŋes ka Onesimo, lokaato yok ŋolo minat alotooma Kristo, ŋolo ikinyomitae isua, ŋolo erae ekaatukot kus. Ikilimokinete ikes iyes ŋakiro daadaŋ ŋuna itiyasi a ne.

¹⁰ Iyakuunit Aristako ŋolo eyai mabus kaapei ka ayoŋ ŋimalasyo neni kus; Mariko daŋ lokaaya a Baranaba iyakuunit ŋimalasyo neni kus. (Idaut iyes ayenun ŋuna kitiya aŋuna ka akijaun Mariko erae kebu inaa.)

¹¹ Yesu daŋ ŋolo enyaritae Yusito iyakuunit ŋimalasyo. Ŋuluuni ŋul ikes bon eraakasi Ŋiyudayan ŋulu enupito neni a Kristo, ŋulu ikitiyae kaapei ka ayoŋ aŋuna ka Apukan ka Akuj ka ekesimukekinito ikes ayoŋ nooi.

¹² Ikimalae iyes Epapuras, ŋolo erae ekaatukot kus, eketiyan ŋolo a Yesu Kristo. Ikitamunit iŋes iyes nooi jwi jwi anakilip keŋ, ilipenene iŋes atemar ikisicat Akuj iyes ikwapei ŋulu iyenete ŋakiro ŋuna ka Akuj nooi ka ŋulu itiyaete anacamit keŋ.

¹³ Apedorit ayoŋ elope alimokin iyes epite ŋolo abunio iŋes kitiyaa ka agogoŋu aŋuna kus ka aŋuna a ŋituŋa a ŋulu eyakasi Laodikeya ka Ierapolis.

¹⁴ Ikimalaete iyes Demas ka Luka ŋolo minat ŋolo erae edakitar kosi.

¹⁵ Kimalakinae ŋikaitotoi alotooma Kristo ŋulu eyakasi Laodikeya, kimalata Nimpa daŋ ka ŋikanupak ŋulu iryamunun kai keŋ.

¹⁶ Ani kirikakis iyes akisyom abaruwa na, itemokino kiyakiyasi tosyomae anatukot a Ŋikristo a ŋina eyai Laodikeya. Nabo, itemokino iyes daŋ tosyoma abaruwa ŋina ikiyakikinete iyes ŋikanupak ŋulu eya Laodikeya.

¹⁷ Tolimokisi Arikipo ebe, “Itemokino iyoŋ kirikak etic ŋolo ke Ekapolon, ŋolo aponi ikiinakin iyoŋ akitiya.”

¹⁸ Ayoŋ Paulo egirit ŋimalasyo lu ka akan kaŋ ke elope. Nyikimuryak iyes aenonu kaŋ alomabus. Toyai neni kus ajokis ŋina ka Akuj.