Ŋikol. 3 - Ebaibul

¹ Adaun akiteyarun iyes kaapei ka Kristo, aŋun, itemokino kiwara ŋuna anakuj, neni iboiyo Kristo alokicoloŋ keŋ alowae a ŋolo aloteten a ŋolo ka Akuj.

² Totamunito ka kiitanito ŋuna eyakasi nakuj ama, meere ŋuna eyakasi kwap ne.

³ Anerae itwakito iyes ka iwuaitae akiyar kus kaapei ka Kristo alotooma Akuj.

⁴ Apaki ŋina etakanunia Kristo ŋolo erae akiyar kus, itakanunete iyes daŋ kaapei ka iŋes anapolou keŋ!

Ekuwane ŋoloŋorot ka ŋolokitete

⁵ Itemokino iyes kitoŋopiyasi ekibure ŋolo aronon ŋolo alotooma kus ikwapei amalao, asiilyanut, akitiya ŋuna a ŋileec, ekibure ŋolo aronon, arorokanut (anerae ikwaan arorokanut ka akilip akuj ace.)

⁶ Aŋuna a ŋakiro a ŋuna ikote nen, ebuni anyunyura ŋina ka Akuj neni a ŋulu nyepupete ŋakiro keŋ.

⁷ Koloŋ sek iyarete iyes ŋilopeyek alotooma ekibure ŋolo a ŋipitesyo a ŋul, apaki ŋina apolokinitotor ŋipitesyo ŋul akiyar kus.

⁸ Nai tokona itemokino iyes tolemasi ŋipitesyo lu daadaŋ anakiyar kus: aŋoit, anyunyura, ŋatameta ŋuna itoroniarito ŋuluce, akiyany Akuj kori ŋilam.

⁹ Nyimodyanakinosi make, ikwapei idauniata alemar ekuwane ŋoloŋorot kaapei ka ŋipitesyo keŋ

¹⁰ ka iryamut ekuwane ŋolokitete. Ekuwane ŋolokitete ŋol iŋes erubakinit Akuj akasuban keŋ itete kikwaanikinos ka iŋes, ikotere toyenuniata iyes iŋes ejok.

¹¹ Aŋakiro a ŋun, emam nabo atyaketait eyai kidiŋ Ŋiyudayan ka ŋulu nyerae Ŋiyudayan, kidiŋ ŋituŋa ŋulu ileŋeritae ka ŋulu nyileŋeritae, ŋulu a ŋikabilae a ŋice, ŋituŋa ŋulu emam akiyen, ŋipi ka ŋituŋa ŋulu elacakina, nai Kristo iŋes epol akilo daadaŋ ka eyai Kristo neni a daadaŋ.

¹² Ikwapei tokona iraakatar iyes ŋituŋa ŋulu ka Akuj, ŋulu ikiseu ka ŋulu emina iŋes, itemokino nai iyes kitoodiut akisyon, arimao, akitiditeuna, akiyapara ka atitinyikinit.

¹³ Todaŋas make ka kisyonios make ŋapakio daadaŋ ŋuna eyakar idio kus akitakadakinet neni a ŋinice. Itemokino kisyonios make, ikwapei adaunia Ekapolon akisyon iyes.

¹⁴ Anakiro a ŋun a daadaŋ, toyakatar amina ŋina erucokinit ŋipitesyo ŋul daadaŋ iwapei anakimorikina a ŋina iyookino.

¹⁵ Kimyekisi ekisil ŋolo a Kristo ikipuka iyes alotai kus--ekisil ŋolo aponere itonyaraunere iyes aruwor akuwan apei. Itemokino tolakaros neni ka Akuj.

¹⁶ Kimyekisi ŋakiro a Kristo anapedor ka anaosou kec kiboiyoto alotai kus; kitatamas ka tolimonokinos ŋun make anaosou a daadaŋ. Toeos Ŋieosyo a Daudi, ŋieosyo ŋulu ipurore Yesu ta ŋieosyo ŋulu ke Etau; toeikisi ka alakara neni ka Akuj alotai kus.

¹⁷ Ŋinibore daadaŋ itiyaete kori irworosi iyes, itemokino kitiyata alokiro ke Ekapolon Yesu, tolakara neni ka Akuj Papa alotooma Yesu.

Akiyar ŋina kitete ŋina ke ekal ke Ekristoit

¹⁸ Ŋaberu, topupete ŋikilyok kus, ikwa ŋina itemokino Ŋikristo kitiyata.

¹⁹ Ŋikilyok, tominas ŋaberu kus ka nyidedeŋikinito ikes.

²⁰ Ŋidwe, topupete ŋikauruunak kus alopitesyo a daadaŋ, anerae italakarito ŋun Akuj.

²¹ Atapapa, nyitoŋoa ŋidwe kus, ikotere nyeluŋakin ikes.

²² Ŋipi, topupete ŋikapolok kus ŋulu ka akwap a na alopitesyo a daadaŋ, meere apaki ŋina ikiteoto ikes iyes bon, anerae icamito iyes ikitojoka ikes iyes; nai kitiyata ka ainakina aŋuna ka akerit Ekapolon Yesu.

²³ Ibore ŋini itiyaete iyes daadaŋ, kitiyata ka agogoŋu kus a daadaŋ esibit itiyaete ŋuna ke Ekapolon, meere ŋuna a ŋituŋa;

²⁴ anerae iyenete iyes atemar Ekapolon iŋes ikiinakini iyes eropit ŋolo iŋadakinit iŋes aŋuna a ŋituŋa keŋ. Kristo iŋes erae Ekapolon ŋolo a kire, ŋolo ijaanakinete iyes.

²⁵ Ŋini daadaŋ itiyae aronis, isicanio emam atyakatyak aŋuna a ŋakiro a ŋuna aronok a ŋuna itiyae iŋes.