Ŋikol. 1 - Ebaibul

Emalas

¹ Ayoŋ Paulo, ŋolo arae ekiyakia a Yesu Kristo aŋuna ka acamit a ŋina ka Akuj, ka Timoteo lokaato yok,

² ikigirit abaruwa na neni a ŋituŋa a ŋulu ka Akuj a ŋulu eyakasi Kolosae a ŋulu ikinyoma alotooma akimorikina ka Kristo. Toyai neni kus ajokis ka ekisil aneni ka Akuj Papa yok.

Akilip ŋina ka alakari neni ka Akuj

³ Ikilakanari isua jwi jwi neni ka Akuj, Papa ke Ekapolon yok Yesu Kristo, apaki ŋina ilipere isua aŋuna kus.

⁴ Anerae ikiira isua ŋuna ka anupit kus neni a Yesu Kristo ka ŋuna ka amina a ŋina iyakatar iyes aŋuna a ŋituŋa a ŋulu ka Akuj a daadaŋ.

⁵ Iyakatar iyes anupit ka amina, anerae igenosi iyes ibore ŋini iŋadakinitae nakuj aŋuna kus. Ipotu iyes kiirasi ŋuna ka akigeno a ŋin apaki ŋina ikilimokinere iyes ekiŋaren ŋakiro ŋuna a kire ŋuna erae Ŋakiro ŋuna Ajokak.

⁶ Erubakinito Ŋakiro ŋuna Ajokak erayete ka epoloete ka ealakin nakwapin daadaŋ, lopite ŋolo etiyakinotor neni kus ameun akoloŋit ŋina iiraryata iyes ekiŋaren ŋuna ka ajokis a ŋina ka Akuj ka ipotu iyes toanyut epite ŋolo eyakatar ikes kire.

⁷ Ipotu iyes toyenut ŋuna ka ajokis a ŋina ka Akuj aneni ke Epapuras, a ŋolo minat, a ŋolo ikitiyae kaapei ka isua. Erae iŋes eketiyan ŋolo a Kristo ŋolo ikinyomitae, ŋolo itiyae aŋuna kosi.

⁸ Iŋes pei ikilimok isua daŋ ŋuna ka amina kus alotooma Etau ŋolo ka Akuj.

⁹ Aŋun, ameun anakoloŋit a ŋina eirarere isua ŋuna itiyaete iyes, ikilipanakini isua iyes jwi jwi. Ikilipi isua neni ka Akuj ikiinak iyes aosou ka ayenut daadaŋ, ŋina ebunit aneni ke Etau keŋ, ikotere nai toyenut ejok acamit keŋ.

¹⁰ Aŋun, ipedorete nai iyes akiyar alopite a ŋolo itopolooritotor Ekapolon ka ŋolo italakarit iŋes anakiro a daadaŋ. Eyauni akiyar kus arait ŋina erae ŋiticisyo ŋulu ajokak ka iyatakin ayenut kus Akuj.

¹¹ Agasi ayoŋ atemar ikitogogoŋ iyes apedor ŋina ka Akuj ŋina epol nooi, ikotere topedosi akidaŋidaŋ ŋiboro daadaŋ alotooma atitinyu ka alelyan.

¹² Tolakanaros neni ka Akuj Papa, ŋolo ikitemok iyes aryamun atyaketait a ŋarereŋisyo a ŋuna iŋadakinit Akuj aŋuna a ŋituŋa keŋ a Napukan keŋ a ŋina ka akica.

¹³ Abu iŋes ikilaku iwon anapedor a ŋina ka akiryonut ka ikilopa iwon Napukan a Lokoku keŋ a ŋolo minat,

¹⁴ ŋolo ikilakunia Akuj iwon, iŋes atemar, esyoni ŋasecisya yok.

Kristo ka etic keŋ

¹⁵ Erae Kristo etorube ŋolo ka Akuj a ŋina nyetakani. Erae iŋes ekiyai ŋolo ka Akuj Papa, akisyakinet ŋina a ŋisubuna a daadaŋ.

¹⁶ Anerae abu Akuj tosub alotooma keŋ ŋiboro daadaŋ ŋulu eyakasi kidiama ka ŋulu anakwap, ŋulu etakanete ka ŋulu nyetakanete, kaapei ka ŋipyan ŋulu eyakatar ŋapedorosyo, ŋikapolok, ŋikepukak ka ŋikawuokinitok akwap. Abu Akuj tosub akwap daadaŋ aneni keŋ ka aŋuna keŋ.

¹⁷ Ayai Kristo eriŋa nyesubuna ŋiboro daadaŋ ka anakimorikina ka iŋes, eyai ŋinibore neni itemokino toyai.

¹⁸ Iŋes erae akou ŋina ka akuwan keŋ; a ŋina erae Ŋikristo; iŋes erae akisyakinet, aponi kiteyarunae iŋes alokatwak, aŋun, erae iŋes ŋolo esyaunio akidoun nakiyar ŋina kitete; ikotere toruwor iŋes ŋolo iŋarenikinit ŋiboro daadaŋ.

¹⁹ Anerae abu Akuj alope tolakari tocamu atemar toyakaunor Lokoku keŋ epite daadaŋ ŋolo ikoni ŋolo keŋ.

²⁰ Abu daŋ iŋes alotooma Lokoku tolakari tocamu akisil ka ŋituŋa daadaŋ anakwapin. Abu Akuj kitiyau ekisil alotooma atwanare a Lokoku keŋ alomusalaba, ido abu kinyaku neni keŋ ŋiboro daadaŋ ŋulu alokwap ka ŋulu alokidiama.

²¹ Ilwaka koloŋ sek iyes nooi aneni ka Akuj ka iraakasi ŋimoi keŋ aŋuna a ŋakiro a ŋuna aronok a ŋuna itiyaete ka itamete iyes.

²² Nai tokona, aŋuna ka atwanare a Lokoku keŋ alokuwane a ituŋanan, abu Akuj kisil. Ipedorito tokona iyes ayakau kiŋaren keŋ iraakasi ŋulu keŋ, ŋulu isegak alotai, ŋulu emam asecit.

²³ Itemokino nai iyes torubakis icasito ananupit kus, nyiryaŋiryaŋanakin anakigeno a ŋina a Ŋakiro a ŋuna Ajokak a ŋuna ipotu iyes kiirasi, ŋuna adaun alimonokin lotuŋa daadaŋ anakwapin--ŋakiro ŋun araakar ayoŋ Paulo ekalimonokinan.

Etic a Paulo ikwapei eketiyan ŋolo a Ŋikristo

²⁴ Tokona, alakara ayoŋ aŋuna a ŋican a ŋulu aryamunit ayoŋ aŋuna kus, anerae alotooma ŋican ŋulu ka akuwan kaŋ, eŋarakinit ayoŋ akirikakin ŋuna ariŋa nyirikakina alocan a Kristo aŋuna a Ŋikristo, a ŋulu eraakasi akuwan keŋ.

²⁵ Abu Akuj eketuruwo ayoŋ eketiyan ŋolo a Ŋikristo, abu iŋes okoinaki ayoŋ etic lo akitiya aŋuna kus akiteyenun ŋituŋa daadaŋ ŋakiro ka Akuj.

²⁶ Ŋakiro ŋuna ka Akuj ŋun arae ŋuna emunonitae, ŋuna abu iŋes kiwua alotuŋa a daadaŋ ŋikaru ŋulu alunyarosi, nai tokona esileerek neni a ŋituŋa keŋ.

²⁷ Abu Akuj tocamu akisileerekin ikes alalau ka apolou ŋina a ŋakiro a ŋuna imunono a ŋun, ŋuna erae aŋuna a ŋituŋa a daadaŋ. Ŋakiro ŋuna imunono ikes Kristo alotooma kus, ŋolo erae akigeno ŋina ikiponia iwon akimor apolou ŋina ka Akuj.

²⁸ Aŋun, elimonokinio isua ŋakiro a Kristo neni a ŋituŋa daadaŋ. Alotooma aosou daadaŋ icikanakinio ikes, ikotere yaunere ŋinituŋanan neni ka Akuj erae ŋini epakit anakiro a ŋuna ka Akuj anakimorikina ka Kristo.

²⁹ Aŋakiro a ŋun, etiyae ayoŋ ka agogoŋu ka aŋirikinit alotooma apedor ŋina akainakinit Kristo ŋina eketepedorit ayoŋ akitiya ŋun.