Ŋikis. 6 - Ebaibul

Akiciket ŋina apolon nooi

¹ Erae tokona nu ŋakiciketa, ŋakiro ŋuna etubunitoe ka ŋikisila, ŋakiro ŋuna akalimoki ayoŋ Ekapolon akitatam iyes kiwuapa anakwap a ŋina eapi iyes alomar kituruwosi ŋina kus,

² Ikotere iyes ka ŋidwe kus ta ŋidwe a ŋidwe kus, itopoloorito Ekapolon Akuj kus ŋirwa ŋulu ka akiyar kus daadaŋ, kiwuapa ŋakiro ŋuna etubunit iŋes daadaŋ ka ŋakiciketa keŋ ŋuna ekeciki ayoŋ iyes akiwuap, ikotere tolalata ŋirwa a akiyar kus.

³ Aŋun, kiirasi, okoe Ŋisirael ka kiwuapa ŋakiro ka Akuj ejok, ikotere tomamukaun aneni kus ŋace ka ikotere ipitunete nooi anakwap a ŋina elelyaata ŋakile ka ao, lopite ŋolo ikiikinia iyes Ekapolon Akuj atapapaa kus.

⁴ Kiirasi, okoe Ŋisirael, Ekapolon Akuj yok iŋes bon erae Ekapolon.

⁵ Tominas Ekapolon Akuj kus a ŋitai kus a daadaŋ, a akiyar kus a daadaŋ ka agogoŋu kus a daadaŋ.

⁶ Kiricakisi alotai kus ŋakiro nu ŋuna akalimok ayoŋ iyes nakoloŋit na.

⁷ Tolimonokisi ikes neni a ŋidwe kus, kirworo ŋakiro ŋun neni kec alorerya kus ka aneni daadaŋ iyakaunosi iyes, kirworo ŋun apaki ŋina iperyoto ka ŋina ikyenyuniata.

⁸ Toenenakisi ŋakiro ŋun lokeperin kus erae emacar, toenenakis ikes loreetin kus

⁹ ka kigiranakisi lokekia a ŋakais kus ka lopukei kus.

Acoikinit akiŋer akiwuap ŋuna ka Akuj

¹⁰ Ani ikiyauni iyes Ekapolon nakwap ŋina abu iŋes kikoŋ neni atapapaa kus Aburaam, Isaka ka Yakob, atemar ikiinakini iyes, akwap ŋina eya ŋitaunio ŋulu ajokak ka topolok, akwap ŋina a ŋitaunio a ŋulu pa arae iyes idukete,

¹¹ ŋina a ŋakais aŋuna ileleba ŋiboro ŋulu egelegelya ŋulu pa arae iyes iwuakinete, ŋina a ŋakare aŋuna ebokitae aŋuna pa arae iyes ibokete, ŋina a ŋimanikorin a ŋulu ke epiini ka ŋulu a ŋikito ka Olipa a ŋulu pa arae iyes idupakinete. Ani imujete iyes kimwoko,

¹² tocoito nyikimuryak Ekapolon ŋolo ikiyauni iyes anakwap a Ijipit, anakwap a ŋina ka apitoonut.

¹³ Kitopoloorito Ekapolon Akuj kus, kitiyanakinete iŋes ka kikoŋo a ekiro keŋ bon.

¹⁴ Nyiwuapa ŋakujo ŋace, nyiwuapa adio a ŋakujo a ŋituŋa a daadaŋ a ŋulu iboiyete alodiyete kus,

¹⁵ anerae Ekapolon Akuj kus ŋina irukito kaapei ka iyes erae ŋina alilyan. Ani kiwuapa ŋakujo ŋace, eŋoi Ekapolon Akuj kus neni kus ka ikimunyari iŋes iyes anakwap.

¹⁶ Nyitemo Ekapolon Akuj kus, lopite ŋolo itemitotor iŋes alo Masa.

¹⁷ Emaikina iyes kiwuapa ejok ŋakiciketa ke Ekapolon Akuj kus, kiwuapa ŋakiro ŋuna etubunit iŋes ka kiwuapa ŋikisila ŋulu ikicik iŋes iyes akiwuap.

¹⁸ Kitiyata ŋuna ejokak ka ŋuna iyookino alokiŋaren Ekapolon kus, ikotere ejokak ŋakiro aneni kus ka ikotere ilomarete ka ituruworete akwap ŋina ajokan ŋin ŋina kus, akwap ŋina abu Ekapolon kikoŋ neni atapapaa kus ainakin iyes.

¹⁹ Iritari Ekapolon ŋimoe kus daadaŋ alokiŋaren kus lopite ŋolo ikiikinitor iŋes iyes.

²⁰ Ani ikiŋisete iyes ŋidwe kus alorwa a ŋulu epote ebe, “Nyo apolou a ŋikisila, a ŋakiro a ŋuna etubunitoe ka ŋakiciketa ŋuna ikicik iyes Ekapolon akiwuap?”

²¹ Ilimokinete iyes ŋidwe kus ebe, “Araakae paaran isua ŋipi a Parao alo Ijipit, nai abu Ekapolon ikiyau isua alo Ijipit ka apedor keŋ a ŋina etiron.

²² Abu Ekapolon kitiya iteo isua ŋakiro ŋuna apolok ka ŋuna etubulok ta ŋakujuwuanisya neni a ŋituŋa a Ijipit, neni a Parao ka neni a ŋituŋa a ekal keŋ daadaŋ.

²³ Abu iŋes ikiyau isua alo Ijipit, ikotere ikiyaunia isua nakwap ka ikiinak isua nakwap ŋina abu iŋes kiik anakikoŋ neni atapapaa yok.

²⁴ Abu nai Ekapolon ikicik isua akiwuap ŋakiro ŋuna etubunitoe daadaŋ, akitopoloorit Ekapolon Akuj kosi aŋuna ka arubakinia anajokis, ikotere ikiyoki iŋes isua ikiyari, lopite ŋolo ikiyakar tokona.

²⁵ Ani kiwuapi isua ŋakiciketa daadaŋ alokiŋaren Ekapolon Akuj kosi, lopite ŋolo ikicikia iŋes isua akitiya, ikiruwor isua ŋulu ikiyookino anakiro ikitiyae.”