Ŋikis. 5 - Ebaibul

Ŋakiciketa ŋunatomon

¹ Tonyarau Moses Ŋisirael daadaŋ, tosodi tolimok ikes tema, “Okoe Ŋisirael kiirasi ŋakiro ŋuna etubunitoe ka ŋikisila ŋulu akalimokini ayoŋ iyes nakoloŋit na, emaikina iyes toyenut ka kiwuapa ejok inakina.

² Abu Ekapolon Akuj yok ocamunos ka iwon alomoru Oreb,

³ pa abu Ekapolon tocamunos ka atapapaa yok nai ka iwon daadaŋ ŋulu ikiya ne ŋulu ikiyari tokona.

⁴ Abu Ekapolon kirwor neni kus alomoru iteete iyes arira ŋina ayai iŋes.

⁵ (Apaki ŋin awoi ayoŋ alokidiŋ Ekapolon ka iyes alimokin iyes ŋakiro ŋuna erworo Ekapolon, anerae ikuryaka iyes aŋuna ka arira ka nyeloto iyes kidiama emoru.”) Tolimu Ekapolon tema,

⁶ “Ayoŋ Ekapolon Akuj kus ŋina abu okoyau iyes anakwap a Ijipit, anakibois a ŋina iraakatar iyes ŋipi.

⁷ Nyiyakatar ŋakujo ŋace mati ayoŋ bon.

⁸ “Nyitiyaut aŋuna kus etorube a idiobore erae akuj kus, kerae etorube a ibore a ŋini eyai kidiama nakuj, kori a ŋini eyai kwap tooma ŋalup, kori a ŋini eyai nakipi ŋuna alokwap ŋalup.

⁹ Nyiryediko kilipa neni kec, anerae ayoŋ Ekapolon Akuj kus arae Akuj ŋina alilyan, esicani ayoŋ ŋidwe aŋuna ka asecit atapapa kec akitodol nanyamet ŋina a ŋauni ka ŋina a ŋaomwon a ŋulu akaŋerito ayoŋ,

¹⁰ nai etoodikini amina kaŋ ŋina nyiryaŋiryaŋa neni a ŋanyameta a ŋulu akaminasi ayoŋ, ido kiricito ŋakiciketa kaŋ.

¹¹ “Nyisitiyaete ekiro ke Ekapolon Akuj kus analyokonu, anerae nyeesikini Akuj akisican ituŋanan ŋini isitiyae ekiro keŋ analyokonu.

¹² “Totamunito akoloŋit ŋina a Sabato, ido kituruworito iŋes ŋina asegan lopite ŋolo ikicikitor Ekapolon Akuj kus iyes.

¹³ Kitiyata ŋiticisyo kus daadaŋ ŋirwa ŋikanikapei.

¹⁴ Nai akoloŋit, ŋina a ŋakanikaarei erae Sabato akoloŋit ŋina ke Ekapolon Akuj kus; akoloŋit ŋin, nyitiyata etic edio: Nyitiyata iyes, nyitiyaete tari ŋidwe kus ŋulusapa, kori ŋulupesur, kori ŋipito kus, kori ŋapito kus, kori ŋimoŋin kus, kori ŋisigirya kus, kori ŋibaren ca kus daadaŋ, kori ŋituŋa ŋulugelae ŋulu iboiyete alotaun kus, ikotere epito ka apito kus daŋ ieŋunete kaapei ka iyes.

¹⁵ Totamunito atemar irae koloŋ iyes ŋipi anakwap a Ijipit, ido abu Ekapolon Akuj kus ikiyau iyes anakwap a ŋin ka apedor keŋ a ŋina etiron ka agogoŋ. Aŋun, abu Ekapolon ikicik iyes atamunit akoloŋit ŋina a Sabato.

¹⁶ “Tokerite ŋinituŋanan papa keŋ ka toto keŋ, lopite ŋolo ikicikia Ekapolon Akuj kus iyes, ikotere tolalata ŋirwa ŋulu iboiyoto iyes, ido tomam ŋace aneni kus anakwap a ŋina ikiini Ekapolon Akuj kus.

¹⁷ “Nyiar

¹⁸ “Kori nyilom

¹⁹ “Kori nyikoko

²⁰ “Kori nyisudo ŋakiro neni a ŋikidunyet kus.

²¹ “Kori nyiŋobel ŋinituŋanan aberu a ekidunyet keŋ. “Kori nyiburak akai a ikidunyet keŋ, kori nyiŋobel akai a ikidunyet keŋ, kori emanikor keŋ, kori epito keŋ, kori apito keŋ, kori emoŋ keŋ, kori esigirya keŋ, kori ibore ca daadaŋ ŋini erae ŋini a ikidunyet keŋ.”

Moses ekemorikinan Akuj ka ŋituŋa anacamunet a ŋina ka Akuj

²² Abu Ekapolon tolimu ŋakiro ŋun ke etoil a ŋolo apolon neni ka atukot kus a daadaŋ alomoru; abunit etoil ŋol anarira, alodou ka anakiryonut a ŋinakiryonon cuc, ido abu nyiatak ŋakiro ŋace. Abu iŋes kigir ŋakiro ŋun namoru ŋunadapal ŋaarei, ido okoinak ayoŋ.

²³ Apaki ŋina iiraryata iyes etoil ŋolo abunit anakiryonut a ŋina eryono cuc, tonoki akim alomoru, ipotu iyes potu neni kaŋ, apotu ŋikarikok a ŋikabilae ka ŋikasikou kus potu neni kaŋ,

²⁴ ido ipotu iyes temasi, “Kiŋolikisi, ikitoodik Ekapolon Akuj kus iyes akica ka apolou keŋ ka eirar isua etoil keŋ ŋolo abunit anarira. Nakoloŋit na eŋolikin isua atemar epedori Akuj akirwor neni a ituŋanan, ido erubakini ituŋanan ŋin eyari.

²⁵ Aŋun tokona, kaanukiro emaikina isua ikitwaki? Epedori arira na ŋina apolon amunyar isua ikitwaki isua erae kiirar nabo etoil ŋolo ka Akuj,

²⁶ anerae ituŋanan ani ŋinapei koloŋ abu kiira etoil ŋolo ka Akuj a ŋina eyari torubak eyari, lopite ŋolo eirarere isua?

²⁷ Tolot diyete Ekapolon, iyoŋ elope kiira daadaŋ ŋuna elimuni Ekapolon Akuj kosi; tosodi ikilimok iyoŋ isua ŋuna daadaŋ, ikilimokini Ekapolon Akuj yok iyoŋ, ido iiraryo isua ka itiyao ŋuna elimuni iŋes.”

²⁸ Abu Ekapolon kiira ŋakiro kus apaki ŋina irworotor iyes neni kaŋ, ido abu Ekapolon okolimok ayoŋ tema, “Eira ayoŋ ŋakiro a ŋituŋa ŋul, ŋakiro ŋuna ikilimokis ikes iyoŋ; iyookinito ikes anakiro a daadaŋ a ŋuna alimut ikes.

²⁹ Okoe kerae ca toyakatar ikes atametait ŋina ikoni ŋin, ŋina ka amina ayoŋ ka akiwuapit ŋakiciketa kaŋ daadaŋ jwi jwi, ikotere ejokyata ŋakiro aŋuna kec ka aŋuna a ŋidwe kec ŋikaru ka ŋikaru!

³⁰ Ape tolimok ikes ebe, ‘Toboŋosi loeemae kus.’

³¹ Nai iyoŋ, towo a ne alodiyete kaŋ, tosodi akalimokini ayoŋ iyoŋ ŋakiciketa daadaŋ, ŋakiro ŋuna etubunitoe ka ŋikisila ŋulu emaikina iyoŋ kitatam ikes, ikotere iwuapete ikes anakwap a ŋina ainakini ayoŋ ikes toruwor ŋina kec.”

³² Aŋun, emaikina iyes pa iŋayaŋayato, kitiya lopite ŋolo adaunia Ekapolon Akuj kus alimun, nyimyekis akitiya ŋuna iyookino alokiŋaren Ekapolon.

³³ Emaikina iyes kiwuapa jik ŋakiro ŋuna ikicik iyes Ekapolon Akuj kus akiwuap, ikotere iboiyete emam ŋace ka ikotere iboiyete apaki ŋina aoyan anakwap a ŋina ipote iyes akituruwor ŋina kus.