Ŋikis. 4 - Ebaibul

Kicik Moses ŋituŋa kiwuapa ŋakiro

¹ Aŋun, nai tokona, iyes Ŋisirael kiirasi, kiwuapa ŋakiro ŋuna etubunitoe ka ŋikisila ŋulu eketatami ayoŋ iyes, ikotere iyes iyarete, ido tolomasi ka kiboikinos nakwap ŋina ikiinit iyes Ekapolon Akuj atapapaa kus.

² Nyemaikina iyes kiyatakis ŋakiro ŋadi nakiro ŋuna ekecik ayoŋ iyes, kori tolemasi ŋakiro ŋadi anakiro a ŋun, nai kiwuapa ŋakiciketa a Ekapolon Akuj kus, ŋuna tokona ekeciki ayoŋ iyes.

³ Ipotu iyes ŋikulepek kiŋolikis ŋuna abu Ekapolon kitiya alo Baal-Peor, epite ŋolo abunio Ekapolon tomunyarya alotuŋa kus ŋulu daadaŋ ewuapito ŋakiro a Baal a ŋina alo Peor,

⁴ tosodi iyes ŋulu ipotu torubakis ewuapito ŋuna ke Ekapolon Akuj kus, eriŋa iyarete tari tokona.

⁵ Kiirasi, lopite ŋolo ekecikia ayoŋ Ekapolon Akuj kaŋ, eketatami ayoŋ iyes tokona ŋikisila ka ŋakiro ŋuna etubunitoe, ikotere iyes iwuapete ŋun anakwap a ŋina eapi iyes alomar ka akiboikin.

⁶ Emaikina iyes kiwuapa ikes ejok, anerae itoodiunete ŋun aosou kus ka apedor ŋinayenunet ŋakiro aneni a ŋituŋa a ŋakwapin, ido ani iirarete ikes ŋuna a ŋikisila a ŋul, etemarete ikes, “Kire jik erae ŋituŋa lu ŋulu aosok ka ŋulu eyakatar apedor ŋinayenunet ŋakiro!”

⁷ Emam ŋituŋa ŋulu ka akwap ka adio ŋulu itopolooritae, ŋulu eyakatar akuj ŋina eapi aneni kec lopite ŋolo eapiya Ekapolon Akuj yok aneni yok apaki daadaŋ ŋina enyaraere iwon iŋes.

⁸ Emam ŋituŋa a akwap ka adio ŋulu eyakar ŋakiro ŋuna etubunitoe, ŋikisila ŋulu iyookino ikwa ŋakiciketa nu ŋuna tokona alosi ayoŋ ainakin iyes nakoloŋit na.

⁹ Nai tocoikinito ka kiricunito akiyar kus, ikotere ŋuna iŋolikis iyes a ŋakonyen kus, nyikimuryakis, kori nyebucar anatameta kus ŋirwa daadaŋ ŋulu ka akiyar kus, kiteyenikisi ŋidwe kus ka ŋidwe a ŋidwe kus.

¹⁰ Totamunito epite ŋolo koloŋ iwuatar iyes alokiŋaren Ekapolon Akuj kus alo Oreb, apaki ŋina akalimokinia iŋes ayoŋ ebe, “Tocunak ŋituŋa aŋuna kaŋ, olimok ayoŋ ikes ŋakiro kaŋ, ikotere ayenunete akitopoloorit ayoŋ ŋirwa daadaŋ ŋulu eyariata ikes anakwap ka topedosi akitatam ŋidwe kec ŋakiro ŋun.”

¹¹ Totamunito epite ŋolo iponiata iyes towua anakeju ke emoru apaki ŋina arira akim adolitor kidiama torapuwarite edou ŋolo kiryonon cuc emoru.

¹² Abu nai Ekapolon kirwor neni kus eyai narira. Ipupete iyes ŋakiro keŋ, nai pa iteete iyes iŋes, ipupete iyes etoil bon.

¹³ Abu iŋes itolimok iyes acamunet keŋ ka iyes ŋina ikicik iyes akiwuap, acamunet ŋin iŋes ŋakiciketa ŋunatomon, ŋuna abu iŋes kigir namoru ŋunadapal ŋaarei.

¹⁴ Apaki ŋin, abu Ekapolon ekecik ayoŋ akitatam iyes ŋikisila ka ŋakiro ŋuna etubunitoe, ikotere iwuapete iyes ikes anakwap a ŋina eapi iyes alomar ka akiboiyo.

¹⁵ Ikwaŋina pa iŋolikinitotor iyes ŋasima keŋ apaki ŋina erworor Ekapolon neni kus alo Oreb eyai narira, tocoito nu ka kiricunito akiyar kus,

¹⁶ ikotere nyitiyaut aŋuna kus etorube a akuj ŋolo eyakar ŋasima ŋadi, kerae ŋuna a ekile, kori a aberu,

¹⁷ kori ikwaan ka etyaŋ edio ŋolo eyai nakwap, kori ikwaan ka ikenyit idio ŋini a ŋabebenuk ŋini epori,

¹⁸ kori ikwaan ka ibore idio ŋini elyat alokwap, kori ikwaan ka ekolya edio ŋolo eyai nakipi tooma ŋakipi.

¹⁹ Tosodi ani ireorete iyes kidiama kiŋolikis akoloŋ, elap ka ŋikacer ka ŋiboorei daadaŋ ŋulu eyakasi kidiama, tocoito ioliyorete ikisyakis akilip neni kec ka kitiyanakis ikes, erae ŋul ŋiboorei ŋulu akoraki Akuj ŋituŋa daadaŋ ŋulu a ŋakwapin a daadaŋ.

²⁰ Nai abu Ekapolon ikiyau iyes alo Ijipit aneni ikisicanitere iyes nooi, ikotere iruworosi ŋituŋa keŋ a elope, lopite ŋolo iraakatar ŋulu keŋ tokona.

²¹ Abu Ekapolon okoŋoik ayoŋ aŋuna kus, abu kikoŋ atemar nyadokari ayoŋ ekekwaye a ŋolol Yorodan, oloma nakwap ŋina ajokan ŋina ikiinakinit iyes Ekapolon Akuj kus aruwor ŋina kus.

²² Atwani ayoŋ anakwap a na, nyadokari ekekwaye Yorodan, nai idokarete iyes ekekwaye Yorodan kituruwosi akwap ŋina ajokan ŋin ŋina kus.

²³ Aŋun, tocoikinito nai, nyikimuryak acamunet ŋina ipotu iyes tocamunotor ka Ekapolon, nyitiyaut aŋuna kus etorube a akuj eyakar ŋasima a idiobore, awou Ekapolon Akuj kus iyes akitiya ŋun,

²⁴ anerae ikwaan Ekapolon Akuj kus ka akim ŋina ikimunyari, erae Akuj ŋina elilyana.

²⁵ Ani iyakaunotor iyes ŋidwe ka ŋidwe a ŋidwe kus ka kidaut akiboi anakwap a ŋin ekaoyan, ido kitiyata aronis toyeut ŋitorubei a ŋakujo a ŋadi, ido kitiyata ŋuna aronok alokiŋaren Ekapolon Akuj kus, tosodi kitoŋoa iŋes,

²⁶ anyarae ayoŋ nakuj ka nakwap kisuudata ŋakiro kus nakoloŋit na ikitoroniarito iyes, ido imunyarosi iyes daadaŋ alotooma apaki ŋina euruwuana anakwap a ŋina elomaryo iyes kidokasi ekekwaye Yorodan ituruworete akwap ŋin ŋina kus, nyiboiyete iyes a nen ekaoyan, nai ikimunyaryo iyes daadaŋ.

²⁷ Ikielari Ekapolon iyes nakwapin a ŋituŋa a ŋulugelae, ŋidikudyo bon alotooma kus idoŋete nakwapin ŋuna ikirikori Ekapolon iyes.

²⁸ Aina ipote iyes akitiyanakin ŋakujo ŋace ŋuna erae ŋituŋa itiyaunito, ŋiboorei ŋulu ecieunitae anakito ka anamoru, ŋulu nyiteete, nyepupete, nyimujete ka nyiŋuunete.

²⁹ Iwarete iyes aina Ekapolon Akuj kus ka iryamunete iyes iŋes erae kiwara iyes iŋes a ŋitai kus a daadaŋ ka a akiyar kus a daadaŋ.

³⁰ Apaki ŋina iyakaunotor iyes locan, ŋina itiyakinotor ŋakiro ŋun daadaŋ neni kus alorwa a ŋulu eponito, iboŋunete iyes neni ke Ekapolon kiwuapa ŋakiro keŋ.

³¹ Aŋuna eraakar Ekapolon Akuj kus Akuj ŋina esyonon, nyikimyekini iŋes iyes, kori nyikimunyari, kori nyimuryakini iŋes acamunet ŋina abunio iŋes tocamunotor ka atapapaa kus, ŋina abu iŋes kikoŋ neni kec.

³² Kiŋitanaros tokona ŋakiro ŋuna a akanuwan eriŋa iyes nyidouno, kiŋitanaros ŋuna akoloŋ sek ŋinapei anakoloŋit a ŋina asubunia Akuj ituŋanan anakwap, kiŋitanaros ameun alokisal a epei a akwap tari ŋoloce, eya mono ŋakiro ŋuna apolok nooi ŋuna ikote nu ŋuna atakanut, kori eya mono ŋakiro ŋuna ikwaan ka nu ŋuna eiraritae a?

³³ Eya mono ŋituŋa ŋinapei koloŋ ŋulu apotu kiirasi Akuj irworo eyai narira lopite ŋolo iiraryata iyes, ido kidoŋo eyarete ikwa iyes a?

³⁴ Kori eya mono ŋituŋa a akwap adio ŋulu abu Akuj tolemu anakwap a ace aŋuna keŋ a ŋakikatanakineta, a ŋakitoodyanakineta, a ŋaumonokineta, a ejie, a apedor a ŋina etiron, agogoŋu ka a ŋiticisyo a ŋulu apolok nooi a ŋulu etubulok, lopite ŋolo etiyaa Ekapolon Akuj kus ŋun daadaŋ aŋuna kus alo Ijipit, iteete iyes a?

³⁵ Abu Akuj ikitoodik iyes ŋakiro ŋun ikotere iyeununete iyes atemar erae Ekapolon Akuj, emam akuj ace eyai mati iŋes bon.

³⁶ Abu iŋes ikisiira iyes etoil keŋ ŋolo abunit alokidiama, ikotere iyes iwuapete ŋuna iyookino. Abu iŋes ikitoodik iyes arira keŋ ŋina apolon nooi, ido ipupete iyes etoil keŋ ŋolo abunit anarira.

³⁷ Tosodi aŋuna amina Akuj atapapaa kus, abu ekaku toseu ŋiletok kec. Abu ikiyau iyes alo Ijipit irukito ka iŋes a apedor keŋ a alope,

³⁸ abu kirita aŋuna kus ŋituŋa a ŋakwapin ŋulu alalak ka ŋulu agogoŋ akilo iyes, ikotere ikiyauni iyes nakwapin kec ikiinak iyes ŋakwapin ŋun toruworos ŋuna kus, lopite ŋolo eraakatar ŋuna kus tari tokona.

³⁹ Aŋun, toyenutu tokona ka tonupa alotai kus atemar erae Ekapolon Akuj ŋina alokidiama, alokwap ka alotooma akwap; emam Akuj ace eyai.

⁴⁰ Kiwuapa ŋakiro keŋ ŋuna etubunitoe ka ŋakiciketa keŋ ŋuna ekecik ayoŋ iyes nakoloŋit na akiwuap, kiwuapa ikes aŋuna ka alakara kus ka aŋuna ka alakara a ŋiletok kus, ikotere iyes iboiyete akaoyan anakwap a ŋina elosi Ekapolon Akuj kus ainakin iyes toruwor ŋina kus ŋikaru ka ŋikaru.

Ŋitaunio alo Kide Yorodan ŋulu adoonokinio.

⁴¹ Abu nai Moses totyaka alo Kide Yorodan ŋitaunio ŋiuni,

⁴² ŋulu apedori ituŋanan ŋini eari ŋinice pa iredakinit, kori pa sek imanit adokin lotaunio ŋul pei, ikotere nyeari.

⁴³ Ŋitaunio ŋul ikes lu: Beser ŋolo ayai naloŋisat nakwap ŋina amam neni amukur ŋina arae akwap a ŋituŋa a ekabila a Ruben, Ramos, etaun ŋolo ayai Gilead nakwap a ŋituŋa a ekabila a Gad ka Golan etaun ŋolo ayai Basan nakwap a ŋituŋa a ekabila a Manase.

Ŋuna a Ŋikisila

⁴⁴ Erae lu ŋikisila ŋulu abu Moses inak Ŋisirael.

⁴⁵ Erae nu ŋakiro ŋuna elimunitoe ka ŋuna etubunitoe ta ŋikisila, ŋakiro ŋuna abu Moses tolimok Ŋisirael apaki ŋina aponiata alo Ijipit,

⁴⁶ eriŋa eya ekekwaye Yorodan nakadipaalat ŋina iteosi ka Bes-Peor, anakwap a erwosit Sikon a ŋolo a Ŋiamori, a ŋolo epukat alo Esibon, a ŋolo abu Moses ka Ŋisirael kilout apaki ŋina aponiata alo Ijipit.

⁴⁷ Apotu Ŋisirael kikamasi akwap a erwosit Sikon ka akwap a erwosit Og a ŋolo a Basan, ŋirwosi ŋuluarei ŋulu a Ŋiamori ŋulu aya Kide Yorodan.

⁴⁸ Apotu Ŋisirael kikamasi akwap ŋin daadaŋ ameun alo Areor alotaun a ŋolo eyai diyete ayonae Arinon tari lomoru Sirion (iŋes Erimon)

⁴⁹ ka akwap ŋina ka Araba daadaŋ alowae a ŋolo alo Kide Yorodan akitodol nanam ŋina ka Araba nakeju a emoru Pisiga.