Ŋikis. 34 - Ebaibul

Totwana Moses, tonukae akuwan keŋ nakwap ŋina a Moab

¹ Abu nai Moses torotok anadipoe a Moab, kitipeiyo lomoru Nebo, tari naita Pisiga ŋina iteosi ka Yeriko. Abu Ekapolon a nen kitoodik Moses akwap daadaŋ ameun alo Gilead tari Dan.

² Kitoodik iŋes akwap a Naputali daadaŋ, akwap a Epuraim ka akwap a Manase ka akwap a Yudaya daadaŋ tari nanam ŋina alo To,

³ kitoodik iŋes Negeb, adipo ŋina a akadipaalat a Yeriko a etaun a ŋolo a ŋikito a ŋidukan tari Soar.

⁴ Tolimok Ekapolon Moses tema, “Erae ŋin akwap ŋina abu ayoŋ ekoŋ neni ka Aburaam, a Isaka ka Yakob abala, ‘Ainakini ayoŋ iŋes neni a ŋiletok kus’; ekesiŋolik ayoŋ iyoŋ iŋes, nai nyidoli iyoŋ ama.”

⁵ Abu nai Moses ŋolo arae eketiyan ŋolo ke Ekapolon totwan a nen anakwap a Moab, lopite ŋolo alimunitor Ekapolon.

⁶ Aponi tonukae akuwan keŋ nakadipaalat ŋina anakwap a Moab ŋina ayai neni eteosi ka Bes-Peor, nai mam ituŋanan eyeni neni eyai alyal keŋ tari tokona.

⁷ Arae ŋikaru a Moses amiat ka ŋatomoniarei apaki ŋina atwania iŋes, akyenyi iŋes ejok ka ariŋa egogoŋ akuwan.

⁸ Apotu Ŋisirael kigworo aŋuna a Moses anadipoe a Moab, ŋarwa ŋatomoniuni, ekaku a ŋirwa a ŋul, todaun nai akigworo aŋuna a Moses.

⁹ Kilelebun etau ŋolo ka aosou neni a Yosua a lokoku a Nun, anerae abu Moses kidokok ŋakan keŋ neni keŋ ka apotu Ŋisirael kiwuapa ŋakiro keŋ itiyaete lopite ŋolo ecikitor Ekapolon Moses.

¹⁰ Mam nabo apaki ace ŋina ayakar ekadwaran Isirael ŋolo ekoni Moses ŋolo abu kirworo ka Ekapolon iteosi.

¹¹ Mam icetuŋanan ekwaan ka iŋes ŋolo abu kitiya ŋakujuwuanisya ka ŋaumonokineta ŋuna abu Ekapolon kiyaki iŋes akitiya anakwap a Ijipit itoroniyarit Parao, ŋiketiyak keŋ daadaŋ ka akwap keŋ daadaŋ.

¹² Mam ituŋanan ice abu kitiya ŋiticisyo ŋulu ka apedor, kori ŋulu etubulok ŋulu abu Moses kitiya iteete Ŋisirael daadaŋ.