Ŋikis. 30 - Ebaibul

Ŋakiikineta ŋuna ka Akuj

¹ “Ani kedaut ŋakiro ŋun daadaŋ akitiyakin neni kus, ŋakiro ŋun ikes ŋarereŋisyo ka ŋilam ŋulu akalimok ayoŋ iyes, ani kitamut iyes ikes anakwapin a daadaŋ a ŋuna ikiritari Ekapolon Akuj kus iyes,

² ido toboŋut neni ke Ekapolon Akuj kus, tosodo iyes kaapei ka ŋidwe kus kiwuapa ŋakiro ŋuna ka Akuj a ŋitai kus a daadaŋ ka a akiyar kus a daadaŋ, lopite ŋolo ekecikia ayoŋ iyes nakoloŋit na,

³ ebuni nai Ekapolon akinyakakin iyes ŋarereŋisyo kus ka ikisyon iyes, ikicunu nabo iyes anakwapin a ŋuna aris iŋes kikiela iyes.

⁴ Tari kikirikoritae nakisaleta a akwap, ikicununi iyes Ekapolon Akuj kus, ikinyaku iyes nakwap kus,

⁵ ikiyauni iyes Ekapolon Akuj kus nakwap ŋina erae ŋina atapapaa kus ka eruwor akwap ŋin ŋina kus, ikitabari iŋes iyes ilounete ka akilo atapapaa kus,

⁶ “Nabo daŋ, ikiinakini Ekapolon iyes ka ŋiletok kus ŋitai ŋulu iwuapito ŋakiro keŋ, ikotere iminakinete iyes Ekapolon Akuj kus a ŋitai kus a daadaŋ ka a akiyar kus a daadaŋ ka toyara.

⁷ Iwuaakini Ekapolon Akuj kus ŋilam ŋul daadaŋ neni a ŋimoe kus ka neni a ŋulu ikitidiŋito ka ikisicanete iyes.

⁸ Iwuapete nai nabo iyes ŋakiro ŋuna ke Ekapolon, iricito ŋakiciketa keŋ daadaŋ ŋuna ekecik ayoŋ iyes nakoloŋit na,

⁹ ido iyatakini Ekapolon ŋarereŋisyo kus nooi alotooma ŋiticisyo daadaŋ ŋulu itiyaete iyes, iterereŋi ŋidwe kus, ŋitak ka ŋikaalei a ŋibaren kus ka ŋikinyom ta ŋaraito kus, anerae ejoikini nabo Ekapolon akiterereŋ iyes lopite ŋolo eterereŋitor atapapaa kus.

¹⁰ Itiyakin ŋun erae kiwuapa iyes ŋakiro ŋuna ke Ekapolon Akuj kus, anakiricit ŋakiciketa keŋ ka ŋikisila ŋulu igiritae lokitaabo lo ŋolo a ŋikisila, anerae iboŋut iyes neni ke Ekapolon Akuj kus a ŋitai kus a daadaŋ ka a akiyar kus a daadaŋ.”

Akisimukekin aseun akiyar

¹¹ “Kire jik, ŋakiciketa ŋun ŋuna adau ayoŋ ekecik iyes nakoloŋit na, nyegogoŋ aneni kus ka daŋ nyikikuruwori iyes akiwuap.

¹² Nyeyakasi ŋun kidiama ŋidouwon, ido itemasi iyes, ‘Ŋae elosi kidiama nakuj aŋuna kosi, ikiinu isua ŋakiciketa ŋun ikotere isua eirasi, ido ericakisi ikes?’

¹³ Nyeyakasi tari lowae ye anam, ido itemasi iyes, ‘Ŋae elosi lowae ye anam aŋuna kosi ikiiun isua ŋakiciketa ŋun ikotere isua eirasi, ido ericakisi ikes?’

¹⁴ Mam, eapiyete ŋakiro ŋun aneni kus, eyakasi nakituka kus ka lotai kus, ikotere iyes iricakinete ikes.

¹⁵ “Kiirasi, nakoloŋit na ewuak ayoŋ kiŋaren kus akiyar ka ŋarereŋisyo, atwanare ka akinyasuno.

¹⁶ Ani kiwuapa iyes ŋakiciketa a Ekapolon Akuj kus, ŋuna ekecik ayoŋ iyes nakoloŋit na anamina Ekapolon Akuj kus, iwuapito ŋakiro keŋ ka iricito ŋakiciketa keŋ, ŋikisila keŋ ka ŋakiro keŋ ŋuna etubunit iŋes, iyarete nai iyes ka ipitunete, ido ikiterereŋi iyes Ekapolon Akuj kus anakwap a ŋina eapi iyes alomar akituruwor ŋina kus.

¹⁷ Nai kiŋero iyes akiwuap ŋakiro ka Akuj, towout akiirar, ido tocamut akitooliyoro, kilipa neni a ŋakujo ka kitiyanakis ikes,

¹⁸ akalimokini ayoŋ iyes nakoloŋit na atemar imunyarosi iyes, nyiyarete iyes apaki ŋina aoyan anakwap a ŋina idokarete iyes alokekwaye Yorodan alomar kituruwosi ŋina kus.

¹⁹ Anyarae ayoŋ nakuj ka nakwap kisuudata ŋuna iseunete iyes nakoloŋit na, ewuak ayoŋ kiŋaren kus akiyar ka atwanare, arereŋu ka ŋilam. Toseutu tokona akiyar, ikotere iyes iyarete ka ŋiletok kus,

²⁰ iminasi Ekapolon Akuj kus, iwuapito ŋakiro keŋ ka imiidikina neni keŋ, anerae erae ŋun akiyar aneni kus ka erae ŋirwa ŋulu alalak ŋulu ka akiyar kus, ikotere iboiyete anakwap a ŋina abu Ekapolon kikoŋ ainakin neni atapapaa kus Aburaam, Isaka ka Yakob.”