Ŋikis. 29 - Ebaibul

¹ Erae nu ŋakiro ŋuna ka acamunet a ŋina abu Ekapolon kicik Moses tocamunos ka Ŋisirael anakwap a Moab kiyatakin nacamunet ŋina abu iŋes tocamunotor ka Ŋisirael alo Oreb.

Kikiteteunae Acamunet alo Moab

² Abu Moses tonyarau Ŋisirael daadaŋ, tema neni kec, “Ipotu iyes kiŋolikis ŋakiro daadaŋ ŋuna abu Ekapolon kitiya anakwap a Ijipit neni a Parao, neni a ŋikapolok a ŋulu epukatotor iŋes ka nakwap keŋ daadaŋ,

³ ipotu iyes kiŋolikis ŋakikatanakineta ŋuna apolok, ŋakujuwuanisya ka ŋaumonokineta ŋuna apolok.

⁴ Nai akitodol nakoloŋit na eriŋa Ekapolon nyeinakina iyes aosou ka ŋatameta ŋunayenunet ŋakiro, kori ŋakonyen ŋuna kiŋolikinet ŋakiro ŋuna itiyakin, kori ŋaki ŋuna kiiraret ŋakiro ŋuna adaut akitiyakin nakiyar kus.

⁵ Abu ayoŋ okorik iyes ŋikaru ŋatomoniomwon analoŋisat. Nyenyamuna ŋilowi anawat kus ka nyenyamuna ŋamuk anakejen kus;

⁶ Nyenyama iyes amugati ka nyemata iyes epiini, kori ŋagwe ŋuna adwarak, ikotere iyenuniata iyes atemar arae Ekapolon Akuj kus.

⁷ Apaki ŋina adolunere iwon nakibois na, apotu erwosit Sikon ŋolo a Esibon ka erwosit Og ŋolo a Basan ikitijikis iwon, nai aponi iwon kilounae ikes.

⁸ Aponi iwon kikamarae akwap kec, ido okorakisi ŋituŋa a ekabila a Ruben ka ŋituŋa a ekabila a Gad ta atutubet apei a ŋituŋa a ekabila a Manase toruwor ŋina kec.

⁹ Aŋun, kiwuapa ejok ŋakiro ŋuna ka acamunet, ikotere itiyaete a aosou ŋakiro daadaŋ.

¹⁰ “Akoloŋit na, icunakina iyes ne kiŋaren Ekapolon Akuj kus, iyes ka ŋikarikok a ŋikabilae, iyes ŋikasikou ŋikapolok ka iyes Ŋisirael daadaŋ,

¹¹ icunakina iyes ne ka ŋidwe kus, ŋaberu kus ka ŋigelaanotin ŋulu iboiyete ka iyes, ŋiketiyak kus ŋulu eyepete ŋakito ka ŋulu eokete ŋakipi aŋuna kus,

¹² icunakina iyes ne aŋuna ka akijaun acamunet ke Ekapolon Akuj kus, acamunet ŋina ikoŋitor Akuj aŋuna yok, ŋina icamunotor iyes ke Ekapolon Akuj kus nakoloŋit na;

¹³ ikotere ikituruwori iŋes iyes nakoloŋit na ŋituŋa keŋ ka toruwor iŋes Akuj kus, lopite ŋolo eikinitor ka ekoŋitor neni atapapaa kus Aburaam, Isaka ka Yakob.

¹⁴ Ewuakini ayoŋ acamunet na ŋina ikoŋitor Akuj aŋuna yok, meere ka iyes make ŋulu iwuasi alokiŋaren Ekapolon Akuj kus nakoloŋit na,

¹⁵ nai iwuakini Ekapolon acamunet na tari aŋuna a ŋulu nyikiya ka iwon nakoloŋit na ne.

¹⁶ Iyenete iyes epite ŋolo eboiyere iwon anakwap a Ijipit ka epite ŋolo aponere iwon kitoroi kidiŋ ŋakwapin a ŋituŋa.

¹⁷ Iŋolikis iyes ŋiboro kec lu ŋulu eŋeritoe: Ŋitorubei a ŋakujo ŋulu etiyaunitae a ŋamoru ka ŋakito, a esilipa ka egolid, ŋitorubei ŋulu aya nakwap kec.

¹⁸ Acepaki eyai kidiŋ kus ekile, kori aberu, kori ekal, kori ekabila, ŋolo ebatar etau keŋ anakiwuapit Ekapolon Akuj yok aŋuna ka akitiyanakin ŋakujo a ŋituŋa a ŋul. Nyemaikina eyai kidiŋ kus ituŋanan ŋini ikokini ekitoe ŋolo eyai adwaris, ido yau ŋican.

¹⁹ Ŋulu daadaŋ iirarete ŋakiro a akikoŋiet a na, ido kitojokas make etamete alotai kec ebe, ‘Mam ŋace apote neni yok, tari kikiwuapit iwon ŋipitesyo yok ŋulu aronok.’ (Eyaunete ŋul ŋican neni a ŋulu iyookino ka ŋulu nyiyookino),

²⁰ nyecamuni Ekapolon akisyon ikes, anerae eŋoikini Ekapolon ikes nooi, erirauni aŋoit keŋ lopite ŋolo eriraunia akim, eryamunete nai ikes ŋilam daadaŋ ŋulu igiritae lokitaabo lo, ido ikisari Ekapolon ŋirorwa kec anakwap.

²¹ Esetari Ekapolon ikes alokabilae a Ŋisirael a daadaŋ toruworos ŋulu isicanio, lopite ŋolo elimunitere alolam a daadaŋ a ŋulu ka acamunet a ŋulu igiritae lokitaabo ŋolo a ŋikisila.

²² Iŋolikinete ŋidwe kus ŋulu ka anyamet a ŋina ebuni epite ŋolo kinyasunere akwap ŋin ka ŋican ŋulu kebu Ekapolon kisicania ŋituŋa ŋulu kiboiyete a nen, iŋolikinete ŋigelaanotin ŋulu epote anakwapin a ŋuna alwanak ŋakiro nu:

²³ Iŋolikinete ikes ŋalup a akwap a ŋin ŋuna kenom keruwor esulpa ka acumbi, iŋolikinete emam ibore itakinitae, emam ibore erupunit, pa epedorito akitolomun ŋikito, ikwaan ka akinyasuno a Sodoma ka Gomora, Adama ka Seboim ŋitaunio ŋulu abu Ekapolon kinyasu anoŋoit keŋ a ŋina aryenyaan,

²⁴ eumokinete ikes kaapei ka ŋituŋa a ŋakwapin ebasi, ‘Kaanukiro etiyakinia Ekapolon ŋakiro nu nakwap na? Anukiro kitoŋoiyete iŋes nooi?’

²⁵ Iboŋokinete ikes ŋakiŋiseta ŋun temasi, ‘Erae ŋun anerae apotu ikes toŋero acamunet ŋina ke Ekapolon Akuj atapapaa kec, acamunet ŋina abu iŋes tocamunotor ka ikes apaki ŋina ayaunia iŋes ikes anakwap a Ijipit.

²⁶ Apotu ikes toŋero Ekapolon, tosodi kitiyanakis ŋakujo ŋace, kilipa neni kec, arae ŋun ŋakujo ŋuna sek pa ayenete ikes ka awounit Ekapolon ikes akilip neni kec,

²⁷ aŋun, abu Ekapolon toŋoik akwap, kimyek toryamu ŋilam ŋulu igiritae lokitaabo lo.

²⁸ Abu Ekapolon kirita ikes anakwap kec anaŋoit keŋ, anadedeŋu keŋ ka ananyunyura keŋ, ido kirita ikes nakwap ace, lopite ŋolo eyakatar ŋakiro tokona.’

²⁹ Erae ŋakiro ŋuna imunono ŋuna ke Ekapolon Akuj yok, nai ŋakiro ŋuna isileereunitoe, erae ŋuna yok ka ŋuna a ŋidwe yok ŋikaru ka ŋikaru, emaikina iwon ewuapa ŋakiro daadaŋ ŋuna a ŋikisila a ŋul.”