Ŋikis. 28 - Ebaibul

Ŋarereŋisyo aŋuna ka akiwuapit ŋakiro

¹ “Ani kiwuapa iyes ŋakiro ŋuna ke Ekapolon Akuj kus ka kiwuapa ejok ŋakiciketa keŋ daadaŋ, ŋuna ekeciki ayoŋ iyes akiwuap nakoloŋit na, ikituruwori Ekapolon Akuj kus iyes ŋituŋa ŋulu iloito ŋituŋa a ŋakwapin a daadaŋ anakwap.

² Ani Kiwuapa iyes ŋakiro ŋuna ke Ekapolon Akuj kus iryamunete iyes ŋarereŋisyo nu ka eruwor ŋuna kus:

³ ‘Ikiterereŋi Ekapolon iyes alotaunio kus ka alomanikorin kus.

⁴ “‘Iterereŋi Ekapolon ŋidwe kus, ŋikinyom kus ka ŋaraito kus, ŋibaren kus, ŋatak ka ŋikaalei kus.

⁵ “‘Iterereŋi Ekapolon ŋibukito kus ka ŋiboro ŋulu emunaare ŋakirya.

⁶ “‘Ikiterereŋi Ekapolon iyes ilomarete kiŋa ka ilomunete tooma lorerya kus.

⁷ “‘Ikiinakini iyes Ekapolon akiloun ŋimoe kus ŋulu ikitijikinete iyes; epote ikes akitijikin iyes itorunito lowae epei, nai ebwaŋasi ikes kitoro lowaetin ŋulu alalak.

⁸ Iterereŋi Ekapolon ŋikito kus ka ŋiticisyo kus daadaŋ ŋulu itiyaete iyes; ikiterereŋi iyes Ekapolon Akuj kus anakwap a ŋina ikiinit iŋes iyes.

⁹ Ikituruwori Ekapolon iyes ŋituŋa keŋ ŋulu asegak, lopite ŋolo ekoŋio iŋes neni kus. Itiyakini Ekapolon Akuj kus ŋun erae kiwuapa iyes ŋakiciketa keŋ ka kiwuapa ŋakiro keŋ.

¹⁰ Eyenunete ŋituŋa a akwap a daadaŋ atemar irae iyes ŋituŋa a Ekapolon, ido ikikerete ikes iyes.

¹¹ Ikiinakini Ekapolon iyes ŋiboro ŋulu alalak, elalaketa ŋidwe kus, elalata ŋitak ka ŋikaalei a ŋibaren kus, elalata ŋikinyom ka ŋaraito kus anakwap a ŋina abu Ekapolon kikoŋ neni atapapaa kus ainakin iyes.

¹² Eŋaari Ekapolon aŋuna kus kidiama neni ebuneneo akiru kiyaku akiru, nakwap kus anapaki a ŋina itemokino, ido kiterereŋ ŋiticisyo daadaŋ ŋulu itiyaete iyes. Idenikinete iyes neni a ŋituŋa a ŋakwapin a ŋuna alalak, nai nyideniunete iyes aneni kec idiobore.

¹³ Ikituruwori Ekapolon iyes ŋulu ipolokinito ŋituŋa ŋuluce, meere ŋulu ikipolokinitoe, ikiturubakini Ekapolon iyes ipolokinito ŋuluce, meere ŋulu ikipolokinitoe. Itiyakin ŋun erae kiwuapa iyes ejok ŋakiciketa ŋuna ke Ekapolon Akuj kus ŋuna ekecik ayoŋ iyes akiwuap nakoloŋit na

¹⁴ ka erae pa kimyekis iyes akiwuap ŋakiro keŋ erae pa kimyekis iyes akitiya ŋuna iyookino alokiŋaren Ekapolon erae pa kilipa ka kitiyanakis ŋakujo ŋace.’ ”

Tocoito, nyiŋero akiwuap ŋakiro

¹⁵ “Ani pa kiwuapa iyes ejok ŋakiro ŋuna ke Ekapolon Akuj kus kirica ŋakiciketa keŋ ka ŋikisila keŋ, ŋakiro ŋuna etubunit iŋes ŋuna ekecik ayoŋ iyes akiwuap nakoloŋit na, iryamunete nai iyes ŋilam lu daadaŋ:

¹⁶ “Ikilami Ekapolon iyes alotaunio kus ka alomanikorin kus.

¹⁷ “Ilami Ekapolon ŋibukito kus ka ŋiboro ŋulu emunaere ŋakirya.

¹⁸ “Ilami Ekapolon ŋidwe kus ka ŋikinyom kus ta ŋaraito kus, ŋibaren kus, ŋitak ka ŋikaalei.

¹⁹ “Ikilami Ekapolon iyes apaki ŋina ilomaryata kiŋa ka ŋina ilomuniata lorerya kus.

²⁰ “Ikiyakikini Ekapolon iyes ŋican, akuryanu ka akadanakin aloticisyo a daadaŋ a ŋulu ikatakinete iyes akitiya, tari ŋina imunyarotor iyes todaunos atipei, aŋuna a ŋiticisyo kus a ŋulu aronok, anerae ikiesikis iyes ayoŋ.

²¹ Imyekini Ekapolon edeke torubak aneni kus, tari ŋina ikimunyarya edeke ŋol iyes anakwap a ŋina ilosete iyes alomar akituruwor ŋina kus.

²² Ikisicani Ekapolon iyes a edeke a ŋolo ikididiiyari, a edeke a ŋolo itomwani akuwan, a edeke a ŋolo itubui akuwan; ikisicani Ekapolon iyes a amwanis ka aonite, a eremonu ka ebuta a ŋimanikorin kus. Erubakinete ŋakisicaneta ŋun aneni kus tari ŋina imunyarotor iyes daadaŋ.

²³ Nyilimi akiru jik ka eoni akwap kus deu ikwa asuwat.

²⁴ Ilocokini Ekapolon akiru kus toruwor apuwa, ido apuwa bon ebuni nakwap kus alokidiama tari ŋina imunyarotor iyes.

²⁵ “Ikimyekini Ekapolon iyes ikilout ŋimoe kus, ilosete iyes akitijikin ikes itorito lowae epei nai ibwaŋasi iyes kitoro lowaetin ŋulu alalak. Iruworosi iyes ŋituŋa ŋulu ikijamuwaritae alotuŋa a ŋakwapin a daadaŋ.

²⁶ Eruworosi ŋawat kus akimuj ŋina a ŋikeny a ŋulu enyamete ŋawat a ŋituŋa ka ŋina a ŋityaŋ a ŋulu enyamete ŋawat a ŋituŋa, ido emam ituŋanan itwarari ikes aneni kus.

²⁷ Ikisicani Ekapolon iyes a ŋilepunoe a ŋulu esicanitere ŋituŋa a Ijipit ka a ŋajemei a ŋuna erae etoku, a ŋiipu, akipiere a ŋawat, mam nyiŋaleunete iyes alodekesyo a ŋul.

²⁸ Ikisicani Ekapolon iyes a ŋikerep, a amuduko ka a ŋibiler,

²⁹ imudumudosi iyes naparan lopite ŋolo imudumudotor ŋimudukanotin, nai nyipedorete iyes aryamun neni kitoro, ido erubakinete ŋituŋa ikibolyatar iyes ka ikikokoyete, emam ituŋanan ŋini ikiŋarakini iyes.

³⁰ Ikiikinio iyes akiit ŋapesur, nai ituruworete ŋituŋa ŋice ikes ŋaberu kec, idukokinete iyes ŋakais, nai nyiboikinosi iyes tooma kec. Idupakinete iyes ŋikito a epiini lomanikorin kus nai, nyinyamete iyes ŋaraito kec.

³¹ Earyo ŋimoŋin kus iteete iyes, nai nyinyamete iyes akiriŋ kec, ekokoiyaryo ŋisigirya kus iteete iyes, ido nyikinyakakinio iyes. Einakinio ŋamesekin kus neni a ŋimoe kus, emam ituŋanan ikiŋarakini iyes akinyakun.

³² Einakinio ŋidwe kus ŋulupesur ka ŋulusapa neni a ŋituŋa a ŋice, iteete iyes, iteonorete iyes a ŋinakoloŋit, eyaanaryo nai nyipedorete akiretakin

³³ Enyamete ŋituŋa ŋulu nyiyenete iyes ŋaraito a akwap kus ka ibore daadaŋ ŋini itiyaunito iyes a ŋakan kus, erubakinio ikijamuwaritae ka ikisicanitae iyes,

³⁴ Ikirumete iyes ŋikerep aŋuna a ŋakiro a ŋuna iŋolikinete iyes.

³⁵ Itolomuni Ekapolon anakejen ka anakuŋin kus ŋilepunoe ŋulu eŋwalak, ŋulu nyiŋaleunioto iyes, elomunete ŋilepunoe ŋul ameun aneni dapal a akeju tari nakou.

³⁶ Ikiyai Ekapolon iyes kaapei ka erwosit ŋolo iseunete iyes akipuka iyes nakwap ŋina nyiyenete iyes, kori ŋina pa ayenete atapapaa kus, neni itiyanakineta iyes ŋakujo ŋuna itiyaunitae a ŋakito ka ŋamoru.

³⁷ Iruworosi iyes ŋulu ikijamuwaritae, ŋulu isiilyaka ka ŋulu ikirworore alotuŋa a daadaŋ a ŋakwapin a ŋuna ikiyai iyes Ekapolon.

³⁸ “Iekinete iyes ŋikinyom ŋulu alalak lomanikorin kus, nai ilemunete ŋidikudyo, anerae irikari emaase ikes.

³⁹ Idupakinete iyes ŋikito a epiini ŋulu alalak, kiyoko ikes ejok, totubo daŋ ejok, nai nyimasete iyes epiini, kori nyilemunete ŋaraito a epiini anerae irikari ekurut ikes.

⁴⁰ Iyakaunotor iyes ŋikito ka olipa nakwap kus daadaŋ, nai nyiosakinosi iyes akimyet, anerae eraraunosi ŋaraito ka olipa daadaŋ kwap eriŋa nyekoko.

⁴¹ Iyakaunotor iyes ŋidwe ŋulusapa ka ŋulupesur, nai nyerubakinete ikes erae ŋulu kus, anerae erikoryo ikes nakwapin.

⁴² Irikari emaase ka esipiran ŋikito ka ŋaraito a akwap kus daadaŋ.

⁴³ Erubakini apolou a ŋigelaanotin a ŋulu iboiyete ka iyes iata, ido irubakinete iyes irae ŋulu ikinyakio anapolou.

⁴⁴ Ikidenikinete ikes iyes ŋiboro, kec nai nyidenikinete iyes ikes, iruworosi iyes ŋulu ikipolokinitoe, meere ŋulu ipolokinito ŋuluce.

⁴⁵ “Iryamunete iyes ŋilam ŋul daadaŋ, ikiwuapete ka eyakaun neni kus tari ŋina imunyarotor iyes, anerae nyiwuapa iyes ŋakiro ŋuna ke Ekapolon Akuj kus, anakiricakinit ŋakiciketa keŋ ka ŋikisila keŋ ŋulu abu iŋes ikicik iyes akiricakin.

⁴⁶ Idoŋete ŋilam ŋul eyakasi neni kus ka neni a ŋiletok kus erae ŋakitoodyanakineta ka ŋaumonokineta aneni kus ŋikaru ka ŋikaru.

⁴⁷ “Aŋuna pa itiyanakiniata iyes Ekapolon Akuj kus ka alelyanu ka alakara a ŋitai aŋuna ka ajokis a daadaŋ a ŋina abu iŋes ikiinak iyes,

⁴⁸ a ŋakiro a ŋun, ipote iyes akitiyanakin ŋimoe kus ŋulu ebuni Ekapolon ikiyakuun akitijikin iyes, itiyanakinete iyes ikes ikinyamit akoro ka akure, ilerete ka imamukatar ibore idio. Ikisicani iyes Ekapolon tari ŋina ikimunyarya.

⁴⁹ Eyauni Ekapolon ŋituŋa ŋulu ikitijikinete iyes ŋulu ka akwap a ŋina alwanan a ŋina eyai lokisal a akwap, eyauni Ekapolon ŋituŋa ŋulu nyipupete iyes aŋajep kec, iuwaun ikes neni kus lopite ŋolo iuwaunor egole kwap.

⁵⁰ Epote ŋituŋa ŋul erae ŋulu aryenyaanak, ŋulu nyitopoloorito ŋikasikou, kori nyerimaaka aneni a ŋidwe.

⁵¹ Emunyarete ŋituŋa ŋul ŋitak ka ŋikaalei a ŋibaren kus, ŋikinyom ka ŋaraito kus tari ŋina imunyarotor iyes, nyimyekis aŋuna kus kerae ŋikinyom, epiini, akimyet, kori ŋitak a ŋaatuk kus, kori ŋikaalei a ŋakinei kus tari ŋina ikimunyaryata ikes iyes.

⁵² Ikirikaunete ikes iyes alotaunio kus a daadaŋ akitodol ŋina eritakiniata kwap anakwap kus a daadaŋ ŋarwatatain ŋuna aoyak ŋuna ewuatere ŋitaunio kus ka ŋaduketa ŋunajiet ŋuna eya nen ŋuna sek ikinyomito iyes. Ikirikaunete ikes iyes anakwap kus a daadaŋ a ŋina ikiinak Ekapolon Akuj kus iyes.

⁵³ Apaki ŋina irikaunitotor ŋimoe ŋitaunio kus, ipapanunete iyes iitanite ibore ŋini imujete, ido togeikis akinyam ŋidwe kus ŋulusapa ka ŋulupesur ŋulu ikiinak iyes Ekapolon Akuj kus.

⁵⁴ Tari ekile ŋolo sek eyenio atemar ejok ka erimaana alokilyok kus a daadaŋ, imiki lokaato keŋ, aberu keŋ ŋinaminat ka ikoku keŋ ŋini idoŋit akimuj,

⁵⁵ nyeinakini ikes daadaŋ ediokiner a ŋawat a ŋidwe keŋ a ŋulu enyami iŋes, anerae mam icebore idoŋit neni keŋ, itiyae iŋes ŋun aŋuna apapanunia, anerae ikirikaunito iyes ŋimoe ka ikigolokinito tooma ŋitaunio kus.

⁵⁶ Aberu daŋ ŋina sek ejok nooi ka erimaana anaberu kus, ŋina pa erimonori iwace aŋuna ayakar ibore daadaŋ, imiki lokile keŋ ŋolominat akimuj, tari lokoku keŋ a alope ka nakoku keŋ a alope,

⁵⁷ atyaŋ ŋina idounio iŋes ka ŋidwe ŋulu ariŋa iŋes idouni, anerae enyami iŋes ikes anakimunono aŋuna emamukar ibore ice ŋini epedori iŋes akinyam, itiyae iŋes ŋun aŋuna apapanunia, anerae ikirikaunito iyes ŋimoe kus, ikigolokinito tooma ŋitaunio kus.

⁵⁸ Ani pa kiwuapa iyes ejok ka kirica ŋakiro daadaŋ ŋuna a ŋikisila a lu, ŋuna igiritae lokitaabo lo, itopoloorito ekiro ŋolo ka apolou, ŋolo etubulon, ŋolo a Ekapolon Akuj kus,

⁵⁹ Ikisicani Ekapolon iyes ka ŋidwe kus a ŋican a ŋulu apipilak a ŋulu nyedaunosi aneni kus ka a ŋidekesyo a ŋulu nyiŋaleunioto iyes.

⁶⁰ Eyauni iŋes neni kus daŋ ŋidekesyo ŋulu esicanitere ŋituŋa a Ijipit, ŋidekesyo ŋulu apotu ikitubulo iyes ka erubakinete ŋidekesyo ŋul aneni kus.

⁶¹ Eyauni Ekapolon neni kus ŋidekesyo ka ŋican ŋulu egelegelya, tari pa kigiritae lokitaabo ŋolo a ŋikisila a lu, akitodol ŋina imunyarotor iyes.

⁶² Tari sek kilalak iyes nooi ikwa ŋikacer ŋulu alokidiama, idoŋete iyes ikudyoko, anerae nyiwuapa iyes ŋakiro ŋuna ke Ekapolon Akuj kus.

⁶³ Ikwaŋina abunio tojoik Ekapolon ikitobar iyes ka akitipitun iyes toruworos ŋituŋa ŋulu alalak, ejoikini Ekapolon ayaun akinyasuno ka amunyaro neni kus. Ikimunyaryo iyes anakwap a ŋina ilosete iyes akituruwor ŋina kus.

⁶⁴ Ikielari Ekapolon iyes nakwapin, idolete iyes nakisaleta ŋuna ka akwap, itiyanakinete iyes a nen ŋakujo ŋuna itiyaunitae a ŋakito ka ŋamoru, ŋakujo ŋuna nyeyenuna iyes ŋinapei, kori atapapaa kus.

⁶⁵ Anakwapin a ŋun, nyiyakaunotor iyes alakara, mam akibois eruwor ŋina kus ikiinakini iyes Ekapolon a nen aruwor ŋulu iilit ŋitai, ŋulu a ŋipapan ka iyaloloŋete.

⁶⁶ Irubakinete iyes iŋayaŋayato aŋuna ka kiyar kus, ŋulu ikibulit nakwaare ka naparan ka ŋulu nyiyenete ŋuna itiyakin nakiyar kus.

⁶⁷ Aŋinataparacu iitanete iyes ataboŋ ka a ŋinataboŋ iitanete iyes ataparacu, anerae ilelebun ekabule lotai kus aŋuna a ŋakiro a ŋuna iteete iyes.

⁶⁸ Ikinyakari Ekapolon iyes a ŋameeli Ijipit, tari sek kelimunit iŋes atemar nyiboŋorete nabo iyes inaa. Iitanete iyes a nen agyelaro neni a ŋimoe kus ikwapei ŋipi ka ŋapi, nai mam ituŋanan ikigyeli iyes.”