Ŋikis. 26 - Ebaibul

Ŋaraito ŋuna ke ekiŋaren ka atutubet apei alotooma ŋitomon a ŋiboro

¹ Ani idolete iyes nakwap ŋina ikiinit Ekapolon Akuj kus iyes aruwor ŋina kus, ido kidaut akituruwor iŋes ŋina kus ka kidaut akiboikin nen,

² emaikina iyes tolemut alokinyom a daadaŋ ŋaraito ŋuna esyaunak ŋadi ŋuna itaunete iyes anakwap a ŋina ikiini iyes Ekapolon Akuj kus, kiwuakis lobukit, yaasi nakibois ŋina eseuni Ekapolon Akuj kus aruwor neni ilipere iŋes.

³ Elosi ŋinituŋanan kus neni esacaradoti a ŋolo eyai lotic apaki ŋin, tolimokis iŋes ebe, “Akoloŋit na, ilimokini iyoŋ Ekapolon Akuj kon atemar adau ayoŋ adolun nakwap ŋina abu Ekapolon kiik atapapaa kosi ainakin isua.”

⁴ Ani ijaari esacaradoti ebukit anakan kon, ido kiwuak kwap kiŋaren Namuroet ŋina ke Ekapolon Akuj kus,

⁵ emaikina ŋinituŋanan tolimu ŋakiro nu alokiŋaren Ekapolon Akuj kus, “Arae papaa kaŋ Earameanit ŋolo koloŋ erimit, abu iŋes totiyaar Ijipit kiboi a nen erae egelaanot, akudyoko ŋituŋa keŋ, nai apotu ikes tolalata, toruworos ŋituŋa ŋulu agogoŋok ka ŋulu arwok.

⁶ Ani ikitiŋete isua Ŋijipitian ka aryenyeo ka ikisicanete isua aŋuna ikitiŋakiniata akitiya ŋiticisyo ŋulu agogoŋok,

⁷ aponi isua kigworokinoe Ekapolon Akuj atapapaa kosi, ido abu Ekapolon kiira akigworo kosi, kiŋolik ŋican kosi, kiŋolik ŋiticisyo ŋulu ikireikinitae isua ka akisicanio ŋina ikisicanitere isua.

⁸ Abu Ekapolon ikiyau isua alo Ijipit a apedor keŋ a ŋina etiron ka akiŋarakinet ka a ŋiticisyo a ŋulu apolok nooi a ŋulu etubulok ka ŋakitoodyanakineta ka ŋaumonokineta,

⁹ ido ikiyau isua nakibois na ka ikiinak isua akwap na ajokan na ŋina eleleata ŋakile ka ao.

¹⁰ Aŋun, tokona, okoe Ekapolon ayau ayoŋ ŋaraito ŋuna esyaunak ŋuna a akwap ŋina ikiinak iyoŋ ayoŋ.” Iwuakinete nai iyes ŋainakineta kus kiŋaren Ekapolon Akuj kus, ido kijuuroto kipuro Ekapolon Akuj kus.

¹¹ Ekaku itiyaete iyes ŋasuban, iyes kaapei ka ŋilepi ka ŋigelaanotin ŋulu iboiyete ka iyes, imujete akimuj daadaŋ ŋina ikiinak iyes Ekapolon Akuj kus ka lotuŋa a ŋikalya kus.

¹² Ani kidaut iyes alemun ŋatutubeta ŋapeipei alotooma ŋitomon a ŋikinyom kus alokaru a ŋolo a ŋiuni (a ŋolo erae ekaru ŋolo elemununuyere atutubet apei alotooma ŋitomon) ka kidaut ainakin neni a ŋilepi, a ŋigelaanotin, a ŋikokyok ka neni a ŋapuseru ikotere, imujete ikes daŋ akimuj ŋina itemokino alotaunio kus,

¹³ ilimunete iyes nu alokiŋaren Ekapolon Akuj kus, “Adaun isua alemar anakais kosi atutubet apei a ŋikinyom kosi ŋina italeoritae, adaun isua ainakin ikes neni a ŋilepi, neni a ŋigelaanotin a ŋulu eboiyete alotaunio kosi, neni a ŋikokyok ka neni a ŋapuseru, iwuapitae ŋakiciketa kon daadaŋ ŋuna ibu iyoŋ ikiicik isua akiwuap, nyeŋero isua, kori nyimuryakina isua akiwuap ŋakiciketa kon daadaŋ.

¹⁴ Nyenyama isua adio a atutubet a ŋina italeoritae, nyinyama isua ikes, apaki ŋina egworore, nyelemara isua ikes apaki ŋina ikitoroniyaritere, nyeinakina isua ikes adio erae ainakinet neni a ŋikatwak. Ewuapi isua ŋakiro ŋuna ke Ekapolon Akuj kosi, etiyae daadaŋ ŋuna ikicik iŋes isua akitiya.

¹⁵ Kiŋoliu anakibois kon a ŋina asegan, kiŋoliu anakuj, kiterereŋ ŋituŋa kon Ŋisirael ka ŋalup a akwap a ŋina ikiinak iyoŋ isua, lopite ŋolo ibunio iyoŋ kikoŋio neni atapapaa kosi, kiterereŋ akwap kosi ŋina eleleata ŋakile ka ao.”

Akitatam ŋina esidyon

¹⁶ Akoloŋit napei na ikicik iyes Ekapolon akiwuap ŋakiro ŋuna etubunitoe ŋun ka ŋikisila ŋul, kiwuapa ikes ejok a ŋitai kus a daadaŋ ka a akiyar kus a daadaŋ.

¹⁷ Nakoloŋit na, icamunosi iyes ke Ekapolon; aruwor iŋes Akuj kus ka itiyaete iyes ŋuna ecamit iŋes, iwuapitae ŋakiro ŋuna etubunit iŋes, ŋakiciketa, ŋikisila ka iwuapitae ŋakiro keŋ.

¹⁸ Nakoloŋit na, icamunosi iyes ke Ekapolon, iruworosi iyes ŋituŋa keŋ ŋulu emina iŋes nooi, lopite ŋolo ikiikinia iŋes iyes ka iwuapete iyes ŋakiciketa keŋ;

¹⁹ ikotere ikituruwori iŋes iyes ŋituŋa ŋulu iloito ŋituŋa a ŋakwapin a daadaŋ ŋulu asubuni iŋes, iruworosi iyes ŋulu ikipuritoe, ŋulu arwok ka ŋulu ikitopolooritae ka iruworosi iyes ŋituŋa ŋulu asegak aneni ke Ekapolon Akuj kus, lopite ŋolo eikinitor iŋes.