Ŋikis. 24 - Ebaibul

Ŋikisila ŋulu ke ekiitanu ka elakit

¹ Ani kedau ekile akiit aberu, tojoŋo ekaku amina aberu ŋin aŋuna aryamunia iŋes idiobore anaberu a ŋin ŋini nyitalakarit iŋes, ido kigir iŋes abaruwa ŋina ke elakit, inak neni a aberu, kirita aberu alokai keŋ, torotok nai aberu daŋ tolot alokai a ekile a ŋol,

² tolot toruwor aberu a ekile a ece.

³ Ani nai pa keminaki ekile ŋolo a ŋiarei daŋ aberu ŋin, kigirak iŋes abaruwa ŋina ke elakit, inak neni ka aberu a ŋin, tosodi kirita iŋes alokai keŋ, (kori ani ketwana ekile keŋ ŋolo a ŋiarei),

⁴ nyecamakinitae ekile ŋolo abu tolak iŋes ekiŋaren ya nabo aberu ŋin toruwor aberu keŋ kedau akilom, anerae eŋerit Ekapolon ŋakiro ŋun, nyemaikina iyes iyaut ekaile ŋolo ka asecit nakwap ŋina ebuni Ekapolon Akuj kus ainakin iyes aruwor ŋina kus

Ŋikisila ŋice ŋulu egelegelya

⁵ Ani keriŋa ekile iisi aberu, nyemaikina iŋes tolot lojie, kori nyemaikina inakinae etic edio ŋolo etiŋiari iŋes. Emaikina iŋes kipasa alore keŋ ekaru epei, ikotere nyesilik aberu keŋ ŋina ariŋa iŋes iisi.

⁶ Mam ituŋanan emaikina ya aneni a ŋinice amoru ŋinakiryeet, kori atapemu aŋuna ideniyoritere ibore keŋ, anerae eriyan ŋun ka akiya ibore ŋini eyarya akiyar a ituŋanan aŋuna ka akikoŋiet.

⁷ Ani kikamun ituŋanan ŋini ekokoiyarit ituŋanan ŋini erae Esiraelit, akituruwor iŋes epito, kori agyelar, emaikina ituŋanan ŋini ekokoiyarit ŋinice toarae. Aŋun, ilemarete iyes aronis alokidiŋ kus.

⁸ Tocoito nyielun nen kus edeke ŋolo ka amuny ka akuwan. Emaikina iyes kiwuapa daadaŋ ŋuna ikilimokinete iyes ŋisacaradotin ŋulu erae ŋilepi, lopite ŋolo ecikitor ayoŋ ikes.

⁹ Totamunito ŋuna abu Ekapolon Akuj kus kitiya neni a Miriam apaki ŋina iwotuniata iyes alo Ijipit.

¹⁰ Ani kidenik iyoŋ ikidunyet kon ibore idio, nyemaikina iyoŋ tolot kai keŋ tokoda idiobore aŋuna ka amica.

¹¹ Kidaru alokiŋa, eriŋa ituŋanan ŋini ideniyorit ibore kon eyaunit ibore ŋini emaikina iyoŋ totiŋ mono.

¹² Ani kekulyakana ituŋanan ŋin, nyilot akiper nyinyakakina iŋes elou keŋ ŋolo abu iŋes ikiinak iyoŋ atiŋit mono aŋuna ka amica kon.

¹³ Emaikina iyoŋ kinyakak iŋes elou keŋ eriŋa akoloŋ nyedoiyoro, ikotere epedori ikidunyet kon akimukoror elou ŋol, ikiterereŋ iyoŋ, ido eruwor ŋun aneni kon ŋuna italakarito Ekapolon Akuj kon.

¹⁴ Nyemaikina iyoŋ iya apaki ŋina aoyan nyetaca ŋikelejilejak kon ŋulu ekulyakaka, kori ŋulu eyakatar akiitanit, kerae ikes Esiraelit, kori ŋigelaanotin ŋulu iboiyete anakwap kus alotaun kus a edio.

¹⁵ Emaikina iyes totaca ikes eropit kec a ŋinakoloŋit eriŋa akoloŋ nyedoiyoro, anerae ekulyakaka ikes ka erae lolejilej iŋes eyarikinito ikes, acepaki igworokinete ikes Ekapolon ikicenete iyes, ido iyakaunotor iyes ekaile ŋolo ka asecit.

¹⁶ Nyemaikina akiar ŋikauruunak aŋuna a ŋidwe kec, kori akiar ŋidwe aŋuna a ŋikauruunak kec, nai earyo ŋinituŋanan aŋuna a ŋadyakanareta keŋ a ilope.

¹⁷ Emaikina iyes totubo ŋakiro a ŋigelaanotin, kori ŋikokyok anakiyookino; nyiyaasi elou a apuserut erae ibore ŋini ekodaritae aŋuna ka amica.

¹⁸ Totamunito atemar iraakasi paaran iyes ŋipi alo Ijipit, ido abu Ekapolon ikilaku iyes a nen, aŋun ekeciki ayoŋ iyes akitiya ŋun.

¹⁹ Ani ilemunete iyes ŋikinyom kus ŋulu itakinito iyes lomanikorin kus, ido ikimuryak iyes atukot a ŋikinyom a ŋulu aris iyes kilemut, nyiboŋosi alemun ikes. Emaikina kimyekinae aŋuna a ŋigelaanotin, a ŋikokyok ka a ŋapuseru, ikotere ikiterereŋi Ekapolon Akuj kus iyes aloticisyo kus a daadaŋ a ŋulu itiyaete iyes.

²⁰ Ani kidaut iyes agyerun ŋaraito alokito kus a ŋulu ka Olipa, nyiloto agyerun daadaŋ ŋuna idoŋito lokito, eruworosi ŋun ŋuna a ŋigelaanotin, a ŋikokyok ka a ŋapuseru.

²¹ Ani kidaut iyes agyerun ŋaraito a epiini alomanikorin kus a ŋulu ke epiini, nyiloto agyerun ŋaraito ŋuna idoŋito, eruworosi ŋun ŋuna a ŋigelaanotin, a ŋikokyok ka a ŋapuseru.

²² Totamunito atemar iraakasi paaran iyes ŋipi anakwap a Ijipit, aŋun, ekeciki ayoŋ iyes akitiya ŋun.