Ŋikis. 23 - Ebaibul

Ŋulu etyakaritae anatukot a ŋituŋa a ŋulu ka Akuj

¹ Mam ituŋanan ŋini itokolupanitae, kori ŋini etuboritae ekulyakane ŋini epedori alomar natukot ŋina a ŋituŋa a ŋulu ke Ekapolon.

² Nyecamakinitae ŋidwe ŋululomuna elomarete natukot a ŋituŋa a ŋulu a Ekapolon. Tari kedol anyamet kec ŋina a ŋatomon, nyecamakinitae ŋiletok kec alomar natukot a ŋituŋa a ŋulu ke Ekapolon.

³ Emam Eamonait, kori Emoabit ecamakinitae alomar natukot ŋina a ŋituŋa a ŋulu ke Ekapolon. Tari kedol nanyamet ŋina a ŋatomon, nyecamakinitae ŋiletok kec alomar natukot a ŋituŋa a ŋulu a Ekapolon,

⁴ anerae nyisiryamuna ikes iyes eyaunito akimuj ka ŋakipi apaki ŋina iwotuniata iyes alo Ijipit, nabo daŋ apotu ikes kipaŋggaut aŋuna kus Balaam lokoku a Beor ŋolo abunit alo Pesor etaun ŋolo a Mesopotamia ikotere ikiceni iyes.

⁵ (Kikote neni daŋ, abu Ekapolon nyiira ŋakiro a Balaam, abu Ekapolon Akuj kus kilocok ŋicen toruwor arereŋu aneni kus, anerae ikimina iyes Ekapolon Akuj kus)

⁶ Ŋirwa daadaŋ ŋulu iyareta iyes nyicamut akisil ka ikes, kori nyitabara ikes.

⁷ Nyijamuwasi Ŋiedomi, anerae erae ikes ŋiyeneta kus. Nyijamuwasi Ŋijipitian, anerae irae iyes ŋigelaanotin apaki ŋina iboiyoto anakwap kec.

⁸ Epedorete ŋiletok kec ŋulu ka anyamet a ŋina a ŋauni alomar natukot ŋina a ŋituŋa a ŋulu ka Akuj.

Ŋikisila ŋulu ka asegis, a ŋitalyo ka ŋulu etiŋitere ŋituŋa

⁹ Ani iperikinito iyes ŋimoe kus, tocoito nyeyai idiobore ŋini epedorere akitoroniyarya iyes.

¹⁰ Ani kitoroniyar ituŋanan aŋuna abunio kiruja nakwaare, ido tobuko ŋaokot ŋuna ka aur, emaikina iŋes tolot aneni eperi ajore ka nyemaikina iŋes toboŋu neni eperi ajore.

¹¹ Ani eapuuni akoloŋ adoyor, emaikina iŋes kiloŋar ka ani edoiyori akoloŋ epedori iŋes aboŋor neni eperi ajore.

¹² Emaikina iyes toseut akibois apei ŋina iloseneneete akiŋarakin anawae aneni eperi ajore.

¹³ Ani ilosete iyes najore, totiŋito ibore ŋinibokaret akwap, ikotere ani ilosete iyes akiŋarakin, tobokareta akipany ŋina inukakinete ŋacin kus.

¹⁴ Kitiyata ŋun anerae irukito iyes ka Ekapolon Akuj kus iyakasi najore, ikotere ikiuni iyes ka ipotokini ŋimoe kus neni. Aŋun, emaikina neni iperete iyes eseg, ikotere nyiŋolik Ekapolon idiobore ŋini asiilyanan aneni kus, ido ikimyek iyes.

¹⁵ Ŋipi ŋulu esiunito neni kus aneni a ŋikulepek kec nyemaikina kinyakakinae neni a ŋikulepek kec.

¹⁶ Emaikina ikes kiboiyoto kaapei ka iyes anakibois a daadaŋ a ŋina eseunete ikes alotooma edio a ŋitaunio kus, neni ca daadaŋ ecamito ikes akiboiyo, nyisicana ikes.

¹⁷ Mam adiopese alodwe a Ŋisirael ŋina emaikina eruwor amalaat anakiboisyo a ŋuna ilipere ŋakujo, mam edya edio alodwe a Ŋisirael ŋolo emaikina eruwor emalaat anakiboisyo a ŋuna ilipere ŋakujo.

¹⁸ Nyiyaut ŋisiliŋa ŋulu etacitere ŋimalaae ka ŋamalaae Kai ŋina ke Ekapolon Akuj kus, akisiyookinio akikoŋiet adio. Erae ŋun daadaŋ ŋakiro ŋuna eŋerit Ekapolon Akuj kus.

¹⁹ Nyemaikina iyes Ŋisirael kiŋita aneni a Esiraelit a ŋoloce kiyatakinae ibore ice neni a ibore a ŋini ideniyoritae, kerae losiliŋa, kerae nakimuj, kori neni a ibore ca daadaŋ a ŋini ideniyoritae.

²⁰ Nai ipedorete akiitan aneni a egelaanot kiyatak ibore ice neni a ibore a ŋini ideniyorit iŋes, nai meere aneni a Esiraelit a ŋoloce, ikotere ikiterereŋi Ekapolon Akuj kus iyes alotooma ŋiticisyo kus daadaŋ ŋulu itiyaete iyes anakwap a ŋina eapi iyes alomar ka akituruwor ŋina kus.

²¹ Ani kikoŋ iyoŋ neni ke Ekapolon Akuj kon, nyidid akisiyookin iŋes, anerae kire jik iitanit Ekapolon iyoŋ kisiyook ŋun, ani pa kisiyook iyoŋ ŋun, iryamuni iyoŋ ekaile ŋolo ka asecit.

²² Nai ani pa kikoŋ iyoŋ ŋadikiro mam ekaile ŋolo ka asecit iryamuni.

²³ Ŋakiro daadaŋ ŋuna ilimuni iyoŋ, emaikina kisiyook jik, ikwapei ibunio iyoŋ kikoŋ neni ke Ekapolon Akuj kon a akituk kon a ilope.

²⁴ Ani kilot iyoŋ lomanikor a ikidunyet kon ŋolo ke epiini ipedori iyoŋ akinyam ŋaraito a epiini lotyae ŋolo icamit iyoŋ, nai nyiwuak ŋaraito ŋadi loborosit kon ya.

²⁵ Ani kilot iyoŋ lomanikor a ikidunyet kon ŋolo a ŋikinyom a ŋulu eriŋa nyelema, ipedori iyoŋ agiitun ŋikinyom, nai nyemaikina iyoŋ totub a ekileŋ ŋikinyom alomanikor a ikidunyet kon.