Ŋikis. 22 - Ebaibul

¹ Nyiteete emoŋ, kori amesek a ikidunyet kus eoliyorit, ido nyimitakis; emaikina iyes tomyaasi neni a ilope.

² Ani kiboi ilope aneni alwanan aneni iboiyo iyoŋ, kori pa kiyeni iyoŋ ilope a ibarasit a ŋini eolit, ya iŋes lore kon, kiboi a nen tari ŋina ebunio ilope atemar erae ŋini keŋ, tosodi emaikina iyoŋ kinyakak iŋes ibarasit keŋ.

³ Kitiyata ŋunapei irukwaunete esigirya a ikidunyet kus, kori elou a ikidunyet kus, kori ibore ca daadaŋ ŋini ecakari ikidunyet kus, ido torukaut iyes. Kiŋarak ikidunyet kon ŋinapaki daadaŋ iitanitor akiŋarakino.

⁴ Nyiŋolik emoŋ, kori esigirya a ikidunyet kon eperi alorot, ido nyimitak, emaikina iyoŋ kitonyou iŋes.

⁵ Nyecamakinitae ŋaberu enapito ŋilowi a ŋikilyok, ŋikilyok daŋ nyecamakinitae enapito ŋilowi a ŋaberu, anerae eŋerit Ekapolon Akuj kus ituŋanan daadaŋ ŋini itiyae ŋun.

⁶ Ani kirukwau iyoŋ akai a ikeny alokitoe a edio, kori alokwap eyakasi ŋicwi kori ŋabeyei, toyai ikenyit locwi keŋ, kori nabeyei keŋ, nyecamakinitae iyoŋ akiya ikenyit ka ŋicwi keŋ.

⁷ Kimyek toto a ŋicwi tolot, ido iya iyoŋ ŋicwi make, ikotere ejokyata ŋakiro aneni kon ka ikotere irubakini iyoŋ iyari apaki ŋina aoyan.

⁸ Ani idukokini iyoŋ akai ŋina kitete kiwuak arwatata kidiama kirimok akai kiryam, ikotere ani kimasun ituŋanan alokidiama kigagau, nyiyakaunor iyoŋ ekaile aŋuna atwania ituŋanan alokai kon erae kimasun ituŋana alokai kon.

⁹ Nyidupak ŋikito a epiini ka ekinyomit ece lomanikor epei, ani kitiya iyoŋ ŋun, itwaniari iyoŋ ibore daadaŋ ŋini idupakinit iyoŋ nen, ŋikinyom ŋulu iekinit iyoŋ kori ŋikito a epiini

¹⁰ Nyitata ienikinito emoŋ ke esigirya nayokot apei.

¹¹ Nyinapa ŋilowi ŋulu edonyunitoe kaapei a ŋajul a ŋamesekin ka a ŋiusyo a ŋulu amilimilak.

¹² Todonyokisi ŋikatelitel lokoonae ŋuluomwon ŋulu a ŋilowi kus a ŋulu erwatae.

Ŋikisila ŋulu ka akiryamanakin a ŋaberu ka ŋikilyok

¹³ Ani kiit ekile apese, nai ani kedau iŋes akiryamakin ka apese ŋin, toŋer akiboi ka iŋes,

¹⁴ tosodi kirwor itoroniyarit iŋes ka emunaarit koŋin ebala, “Abu ayoŋ eit apese na nai ani ikiryamakin ka ayoŋ, abu ayoŋ oryamu atemar nyerae iŋes apese ŋina nyiryamakina ka ekile ece.”

¹⁵ Elosete nai papa ka toto a apese a ŋin neni a ŋikasikou a etaun a ŋol, yaasi ibore ŋini etoodiunit atemar arae nakoku kec apese ŋina pa eryamakina ka ekile eriŋa ekile ŋolo isitakinit iŋes nyeruko ka apese ŋin.

¹⁶ Elimokini nai papa a apese ŋikasikou tema, “Abu ayoŋ oinak nakoku kaŋ neni a ekile a lo toruwor aberu keŋ, nai tokona aŋer ekile lo nakoku kaŋ.

¹⁷ Itoroniyarit ekile lo nakoku kaŋ ebala, ‘Nyeryamuna ayoŋ akitoodikinet ŋina itoodiunit atemar arae nakoku kon apese ŋina pa eryamakina ka ekile.’ Nai akitoodikinet ŋina itoodiunit atemar arae nakoku kaŋ apese ŋina pa eryamakina ka ekile iŋes na.” Epetakinete nai ŋikauruunak a apese a ŋin anaŋga ŋina eyakasi ŋaokot kiŋaren ŋikasikou ŋulu ke etaun.

¹⁸ Eayete nai ŋikasikou a etaun a ŋol ekile ŋolo aŋerit akiboi ka apese keŋ, ido kisicana;

¹⁹ totubokis iŋes alemun ŋisilipae amiat (ŋulu einakinete ikes neni a papa a apese,) anerae amunaa iŋes koŋin apese ŋina nyiryamakina ka ekile ŋina erae a Asiraelit, idoŋi apese ŋin erae aberu keŋ jik, nyemaikina iŋes tolak apese ŋin ŋirwa ŋulu ka akiyar a ekile a ŋol daadaŋ.

²⁰ Nai ani kiyookino ŋuna elimunit ekile ŋol ka pa keryamunitae akitoodikinet ŋina itoodiunit atemar kerae apese ŋin ŋina pa eryamakina ka ekile,

²¹ emaikina yaarae apese ŋin kiŋa epuke ŋolo a akai a papa keŋ, tosodi tocaka ŋikilyok a etaun iŋes a ŋamoru toara, anerae etiya iŋes ŋakiro ŋuna a ŋileec alo Isirael aŋuna abunio kiryamakinotor ka ekile eriŋa nyiita. Aŋun, ilemarete iyes aronis alotuŋa kus.

²² Ani keryamun ekile eperete ka aberu a ekile a ece, emaikina ikes daadaŋ toarae, aŋun ilemarete iyes aronis alo Isirael.

²³ Ani keyai apese ŋina nyiryamakina ka ekile, nai kiikinitetei sek alotiŋanu iŋes neni a ekile, tosodi kikamu ekile ece iŋes alotaun kiryamakinos ka iŋes,

²⁴ emaikina iyes yaut ikes daadaŋ ŋiarei lopuke ŋolo ke etaun a ŋol, tocaka ikes a ŋamoru toara. Earyo apese, anerae abu iŋes nyiworou ikotere eiunete iŋes ŋituŋa a ŋulu ke etaun, earyo ekile, anerae abu iŋes kiryamakinos ka apese a ekidunyet keŋ. Aŋun, ilemarete iyes aronis alokidiŋ kus.

²⁵ Nai ani kiryamunosi nariet ekile ka apese ŋina iikinitae ekile ece, tosodi ekile ŋol kikamu apese ŋin kitiŋak iŋes akiryamakin ka iŋes, ekile bon iŋes emaikina toarae.

²⁶ Nyitiyata ŋadi neni ka apese, emam aronis itiyat iŋes ŋina etubokinere iŋes atwanare, anerae ikwaan ŋakiro ŋun ka ŋuna a ituŋanan a ŋini itijikini ikidunyet keŋ toar.

²⁷ Ikwapei aryamunia ekile ŋol iŋes anariet, acepaki kebu apese ŋin kiworou ikotere eiunio, nai amam ituŋanan a nen ŋini apedori aiun iŋes.

²⁸ Ani keryamun ekile ka apese ŋina nyiryamakina ke ekile, ido nyiikinitae iŋes neni a ekile a edio, tosodi ekile ŋol kikamu apese ŋin kiryamakin ka iŋes ka toryamunae ikes anenipei itiyaete ŋun,

²⁹ emaikina ekile ŋol tolemu ŋisilipae ŋatomonikan, inak neni a papa keŋ ka apese, tosodi eruwor apese ŋin aberu keŋ jik. Aŋuna enyasunia ekile ŋol apese ŋin, nyecamakinitae iŋes tolak iŋes ŋirwa daadaŋ ŋulu ka akiyar keŋ.

³⁰ Nyecamakinitae ekile akituruwor aberu a papa keŋ ŋina keŋ, erae ŋun ajamuwar papa keŋ.