Ŋikis. 16 - Ebaibul

Ŋasuban ŋuna a Paska

¹ Totamunito elap ŋolo enyaritae Abib aŋuna ka akitiya ŋasuban ŋuna a Paska aŋuna a Ekapolon Akuj kus, anerae alolap a ŋolo enyaritae Abib, abu Ekapolon Akuj kus ikiyau iyes nakwaare anakwap a Ijipit.

² Emaikina iyes inakis neni ke Ekapolon Akuj kus amuronot ŋina a Paska, anamesekin ka anaatuk kus, kitiyata ŋun anakibois a ŋina eseuni Ekapolon Akuj kus kilipere enyaritae ekiro keŋ.

³ Ani inyamete iyes amuronot ŋin, nyinyama iŋes ka idiobore ŋini eyakar ŋakinyalet. Emaikina iyes tonyama ŋamugati ŋuna emam ŋakinyalet ka akiriŋ a amuronot a ŋin ŋirwa ŋikanikaarei, anerae ipotu iyes tolomut anakwap a Ijipit ikirikirasi nooi, aŋun emaikina iyes ŋirwa a akiyar kus daadaŋ totamunito akoloŋit ŋina irotokinioto iyes anakwap a Ijipit.

⁴ Nyemaikina kiŋolikinae ŋakinyalet ŋadi anakwap kus a daadaŋ alotooma ŋirwa ŋul ŋikanikaarei, nyemaikina akiriŋ a ŋibaren a ŋulu iarete iyes ataboŋ ŋina ka akaloŋit a ŋina esyaunan kiboi kiwalak.

⁵ Nyikicamakinitae iyes ainakin amuronot ŋina a Paska alotaun kus a edio a ŋolo ikiinakini Ekapolon Akuj kus iyes.

⁶ Nai inakisi anakibois a ŋina eseuni Ekapolon erae akibois ŋina ilipere enyaritae ekiro keŋ; nen ikicamakinitae iyes ainakinia amuronot ŋina a Paska eboŋ edoiyori akoloŋ, esaa ŋolo paaran irotokinioto iyes alo Ijipit.

⁷ Kipoto ka tonyama iŋes anakibois a ŋina eseuni Ekapolon Akuj kus; ido taparacu keŋ ipedorete aboŋor loeemae kus.

⁸ Irubakinete iyes inyamete ŋamugati ŋuna emam ŋakinyalet ŋirwa ŋikanikapei, ani edoli akoloŋit ŋina a ŋakanikaarei, emaikina tocunakin ŋituŋa aŋuna ka akilip, akoloŋit ŋin, mam etic emaikina kitiyae.

Ŋasuban ŋuna a ŋisabito

⁹ Kimarasi ŋisabito ŋikanikaarei, togeutu akimarari ŋisabito ŋikanikaarei ŋul akoloŋit ŋina isyakinere akilem ŋikinyom.

¹⁰ Tosodi, kinumunuma ŋasuban ŋuna a ŋisabito aŋuna a Ekapolon a Akuj kus, iyaununut ŋainakineta ŋuna ka acamit kus alotyae a ŋolo ka arereŋu a ŋina ipotu iyes toryamut aneni ke Ekapolon Akuj kus.

¹¹ Tolelyana alokiŋaren Ekapolon Akuj kus, iyes kaapei ka ŋidwe kus ŋulusapa ka ŋulupesur, ŋipi ka ŋapi kus, ŋilepi ŋulu iboiyete alotaunio kus ta ŋigelaanotin, ŋikokyok ka ŋapuseru ka ŋituŋa ŋulu iboiyete kaapei ka iyes. Kitiyata ŋun anakibois a ŋina eseuni Ekapolon Akuj kus kilipere enyaritae ekiro keŋ.

¹² Totamunito atemar iraakasi paaran iyes ŋipi anakwap a Ijipit ka kiricakisi ŋikisila lu ejok.

Ŋasuban ŋuna a Ŋisakaitei (Ŋilep 23:33-43, Ekim. 29:12-40)

¹³ Totamunito akitiya ŋasuban ŋuna a ŋisakaitei ŋirwa ŋikanikaarei kidaut iyes acunun ŋikinyom kus analosin kus ka epiini kus anacueta kus a ŋuna ke epiini.

¹⁴ Tolelyana anasuban kus, iyes kaapei ka ŋidwe kus ŋulusapa ka ŋulupesur, ŋipi ka ŋapi kus, ŋilepi, ŋigelaanotin, ŋikokyok ka ŋapuseru, ŋituŋa ŋulu iboiyete alotaunio kus.

¹⁵ kitiyata ŋasuban ŋun ŋirwa ŋikanikaarei aŋuna ke Ekapolon Akuj kus, anakibois a ŋina eseuni Ekapolon, anerae ikiterereŋi iyes Ekapolon Akuj kus a ŋaraito a daadaŋ a ŋuna iryamunete iyes ka aloticisyo kus a daadaŋ a ŋulu itiyaete iyes, ido ilelyanete iyes nooi.

¹⁶ Ŋarwa ŋauni alotooma ekaru emaikina ŋisapa kus daadaŋ potu kiŋaren Ekapolon Akuj kus nakibois ŋina ebuni Ekapolon aseun; ŋarwa ŋun ikes nu: Ŋarwa ŋuna a ŋasuban a ŋuna emam ŋakinyalet, ŋarwa ŋuna a ŋasuban a ŋuna a ŋisabito ka ŋarwa ŋuna a ŋasuban a ŋuna a ŋisakaitei, nyemaikina ikes potu neni a Ekapolon eororete ŋakan, emaikina ikes yaut idiobore.

¹⁷ Emaikina ikes daadaŋ inakis idiobore lotyae ŋolo epedoritotor ikes ka alopite a ŋolo iterereŋitor Ekapolon Akuj kus ikes.

Ŋikatubok ŋakiro ka ŋikapolok a ŋitaunio

¹⁸ Emaikina iyes toseut ŋikatubok ŋakiro ka ŋikapolok alokabilae kus a daadaŋ, alotaunio kus a daadaŋ a ŋulu ikiini Ekapolon Akuj kus iyes, ikotere etubete ŋakiro a ŋituŋa anakiyookino.

¹⁹ Tocoito ilocete ŋakiro ŋuna iyookino, totubete ŋakiro anakiyookino emam ariit ka ice, nyicamut ŋakaluŋuluŋui, anerae iteesikini akaluŋuluŋut ŋikaosok akitiya ŋuna iyookino ka iloci ŋakiro a ŋulu iyookino.

²⁰ Kiwara akiyookino ka emaikina iyes kiwara akiyookino bon, ikotere iboiyete ka ituruworete akwap ŋina ikiini Ekapolon Akuj kus ŋina kus.

Nyilipa neni a ŋakujo

²¹ Nyidupakis diyete Namuroet ŋina itiyaunete iyes a ŋuna ke Ekapolon Akuj kus apuŋure ŋina italeoritae,

²² nyidupakis tari epir ŋolo itiyaunitae a ŋamoru, etorube a akuj, eŋerit Ekapolon Akuj kus ŋiboro ŋul.