Ŋikis. 13 - Ebaibul

¹ Ani ketakanut alokidiŋ kus ŋikadwarak, kori ŋikerujak ŋulu edwarete ŋuna eponito itolimokis iyes ŋakitoodyanakineta a ŋakiro a ŋuna epote, kori ŋaumonokineta,

² ido kiyookinos ŋakujuwuanisya, kori ŋaumonokineta ŋuna alimunito ikes, ido temasi ikes, “Ewuapakisi ŋakujo ŋace (ŋuna nyeyenuna iyes) etiyanakisi ikes.”

³ Nyemaikina iyes kiwuapa ŋakiro a ŋikadwarak a ŋul, kori a ŋikerujak a ŋul, a ŋulu edwarete ŋuna eponito, anerae ikikatakinit Ekapolon Akuj kus iyes, ikotere eyenuni erae kiminasi iyes kire Ekapolon Akuj kus a ŋitai kus a daadaŋ ka a akiyar kus a daadaŋ.

⁴ Kiwuapa ŋakiro ŋuna a Ekapolon Akuj kus, kitopoloorito iŋes bon, kiwuapa ŋakiciketa keŋ, kiwuapa ŋakiro ŋuna elimunit iŋes, kitiyanakisi iŋes ka kimiidikinos neni keŋ.

⁵ Nai emaikina toarae ŋikadwarak ka ŋikerujak ŋul ŋulu edwarete ŋakiro ŋuna eponito ŋul aŋuna erworotor ŋakiro ŋuna ka akiteŋer iyes Ekapolon Akuj kus ŋina ikiyauni iyes anakwap a Ijipit a ŋina ikilakunia iyes anapitoonut. Aŋun ilemarete iyes aronis alokidiŋ kus.

⁶ Ani kikicocoya iyoŋ ituŋanan anakimunono, tari kerae lokaato kon kori lokoku a toto kon, kori lokaapa kon, kori lokoku kon, kori nakoku kon, kori aberu kon ŋina imina iyoŋ nooi, kori ekone kon ŋolo imina iyoŋ nooi, ikilimok iyoŋ tema, “Oloto elipa neni a ŋakujo,” (ŋakujo ŋuna nyeyenuna iyoŋ, kori atapapaa kon,

⁷ neni a ŋakujo a ŋadi a ŋituŋa a ŋulu iboiyete alodiye kus, keyapiyete, kori kelwaka aneni iboiyoto iyes, keyakasi lokisal epei ŋolo ka akwap kus, kori ŋoloce,)

⁸ nyemaikina iyes tocamut, kori topupokis ŋakiro a ituŋanan a ŋin. Nyisyonioto, kori nyirimakis iŋes.

⁹ Emaikina ituŋanan ŋini icocoyaryo kisyau akitereŋun ituŋanan ŋin, idio todoto ŋituŋa ŋuluce.

¹⁰ Tocaka iŋes a ŋamoru toara aŋuna acamitor akiteŋer iyoŋ Ekapolon Akuj kon ŋina ikiyauni iyoŋ anakwap a Ijipit anakwap a ŋina ka apitoonut.

¹¹ Iirarete nai Ŋisirael daadaŋ ŋakiro ŋun, ido tobul ka nyitiyae nabo ituŋanan ice aronis ŋina ikoni ŋin.

¹² Ani kiirasi iyes atemar eya lotaun edio ŋolo ikiinakini Ekapolon Akuj kus iyes akiboiyo,

¹³ ŋituŋa kus ŋulu itiyaete aronis, ŋulu arikokis ŋituŋa ŋulu iboiyete alotaun a ŋol akitiya ŋuna aronok ka elimonokinete ŋituŋa ebe, “Oloto elipa neni a ŋakujo a ŋace,” (ŋuna nyeyenuna iyes.)

¹⁴ Emaikina iyes kiŋitut ejok ŋakiro ŋun ka kimimaut ejok. Ani keyenun atemar itiyatae ŋakiro ŋuna ka asiilyo ŋun alokidiŋ kus,

¹⁵ emaikina iyes toara ŋituŋa ŋulu iboiyete alotaun a ŋol daadaŋ, tomunaasi etaun ŋol jik ka ibore daadaŋ ŋini eyai tooma keŋ, toara a ekileŋ tari ŋaatuk ŋuna eya lotaun ŋol.

¹⁶ Ŋiboro keŋ daadaŋ ŋulu iŋatunete iyes, emaikina tocunakis nalapatu ŋina alokidiŋ etaun ŋol, tosodi kicunyakis etaun kaapei ka ŋiboro daadaŋ ŋulu iŋatunete iyes nen, ikwapei ainakinet ŋina epeyo neni ke Ekapolon Akuj kus. Eruwor nen ereŋorot ŋoloruba ŋolo nyedukokinio nabo.

¹⁷ Nyiridasi a ŋakan kus idiobore ŋini emaikina tomunaarae, ikotere ejoŋoe Ekapolon aŋoikinit iyes, ikisyon iyes, ido anakisyon keŋ, ikitiput iyes lopite ŋolo ekoŋitor neni atapapaa kus.

¹⁸ Itiyakinosi ŋun erae kiwuapa iyes ŋakiro ŋuna elimuni Ekapolon aŋuna iwuapyata ŋakiciketa keŋ ŋuna ekecik ayoŋ iyes akiwuap nakoloŋit na ka torubak itiyaete ŋuna iyookino alokiŋaren Ekapolon Akuj kus,