Ŋikis. 12 - Ebaibul

Emaikina tomunaarae ŋakiboisyo ŋuna ilipyata ŋituŋa ŋakujo

¹ Erae nu ŋakiro ŋuna etubunitoe ka ŋikisila ŋulu emaikina iyes kiwuapa ejok anakwap a ŋina ikiinak iyes Ekapolon kus, Akuj atapapaa kus akiboiyo ŋirwa daadaŋ ŋulu ka akiyar kus anakwap.

² Emaikina iyes tomunaasi jik ŋakiboisyo daadaŋ ŋuna ilipyata ŋituŋa ŋulu ilosete iyes akiritar anakwapin kec, ŋakujo kec, ŋakiboisyo ŋuna eya kidiama ŋimoru, kidiama ŋikamukumukui ka kwap ŋikito ŋulu alibak daadaŋ.

³ Toritaanasi ŋamuroeta kec, toukonosi ŋipirin kec, kicunyasi a akim ŋitorubei a ŋakujo kec, kiteleteleosi ŋitorubei a ŋakujo kec, ikotere itoŋopiyarete ŋirorwa a ŋakujo a ŋun anakiboisyo kec.

⁴ Nyemaikina iyes kilipa neni ke Ekapolon a Akuj kus lopite ŋolo ilipyata ŋituŋa ŋul neni a ŋakujo kec.

⁵ Nai emaikina iyes kiwarut akibois ŋina eseuni Ekapolon Akuj kus anakiboisyo a ŋikabilae kus aruwor neni iboiyo iŋes ka neni ilipere enyaritae ekiro keŋ. Emaikina iyes toloseneneete nen,

⁶ yaanasi nen ŋainakineta kus ŋuna epeyo ka ŋamuronisya kus, atutubet apei alotooma ŋitomon a ŋiboro kus ka ŋainanakineta kus, ŋainakineta ŋuna ikoŋit ituŋanan ainakin neni ke Ekapolon, ŋainanakineta ŋuna eyauni ituŋanan a acamit keŋ, ŋikiyae a ŋaatuk kus ka a ŋamesekin kus.

⁷ Tosodi imujete iyes a nen aneni eyai Ekapolon Akuj kus, imujete iyes a nen kaapei ka ŋituŋa a ŋikalya kus, ilakara aŋuna a ŋakiro a daadaŋ a ŋuna itiyata iyes aŋuna ikiterereŋio Ekapolon iyes.

⁸ Nyitiyata, lopite ŋolo itiyaere iwon a ne tokona, lopite ŋolo itiyaa ŋinituŋanan ŋuna ecamit iŋes,

⁹ anerae eriŋa iyes nyedolo neni iyeŋuniata iyes ka nakwap ŋina ikiinit iyes Ekapolon Akuj kus.

¹⁰ Ani idokarete iyes ekekwaye Yorodan, kiboikinos nakwap ŋina ikikorakini iyes Ekapolon Akuj kus ka ani ikisiŋuni iŋes iyes alomoe kus alowaetin a daadaŋ, ido kiboikinos emam ŋace,

¹¹ emaikina nai iyes yaut ŋiboro daadaŋ ŋulu adau ayoŋ alimokin iyes nakibois ŋina eseuni Ekapolon Akuj kus akiboiyo, iyaunete iyes nen ŋainakineta kus ŋuna epeyo, ŋamuronisya kus atutubet apei alotooma ŋitomon a ŋiboro kus, ŋainakineta kus ka ŋainakineta kus daadaŋ ŋuna ajokak ŋuna ipotu iyes kikoŋo ainakin neni ke Ekapolon.

¹² Tosodi ilelyanete iyes alokiŋaren Ekapolon, iyes kaapei ka ŋidwe kus ŋulusapa ka ŋulupesur, ŋipi ka ŋapi kus ka ŋilepi ŋulu iboiyete alotaunio kus ŋulu emam akwap ekorakinitae ikes, kori eruwor ŋina kec.

Akibois ŋina eseunitae aŋuna ka akilipya

¹³ Tocoito iinakinete ŋainakineta kus ŋuna epeyo anakibois a adio a ŋina iŋolikinete iyes.

¹⁴ Nai emaikina iyes inakisi ŋainakineta kus anakibois a ŋina eseuni Ekapolon anakwap a ekabila kus a apei, emaikina iyes inakis a nen ŋainakineta kus ŋuna epeyo ka emaikina iyes kitiyata a nen ŋakiro daadaŋ ŋuna ikicik iyes Ekapolon akitiya.

¹⁵ Kikote neni daŋ apaki daadaŋ ŋina icamitotor iyes, ipedorete akiŋol ŋibaren kus, ido tonyama akiriŋ alotaunio kus a edio, lopite ŋolo ikiinakinitor iyes Ekapolon Akuj kus ikiterereŋit; epedorete ŋulu itoroniyaritae ka ŋulu nyitoroniyaritae akinyam akiriŋ ŋin, ikwaŋina enyamyata akiriŋ a agete, kori a atili.

¹⁶ Nai nyemaikina iyes tonyama ŋaokot, tobukokisi ikes nalup ikwa ŋakipi.

¹⁷ Nyemaikina daŋ iyes tonyama alotaunio kus atutubet apei alotooma ŋitomon a ŋikinyom kus, a epiini kus, a akimyet kus, a ŋikiyae a ŋaatuk kus ka ŋamesekin kus, ŋainakineta daadaŋ ŋuna ikoŋito iyes ainakin neni ka Akuj, ŋainakineta kus ŋuna iyaunete iyes ka acamit kus, kori ŋainakineta kus ca daadaŋ.

¹⁸ Emaikina iyes tonyama ŋul alokiŋaren Ekapolon Akuj kus anakibois a ŋina eseuni Ekapolon Akuj kus. Imujete iyes kaapei ka ŋidwe kus ŋulusapa ka ŋulupesur, ŋipi kus ka ŋapi kus ka ŋilepi ŋulu iboiyete alotaunio kus; ilelyanete iyes alokiŋaren Ekapolon Akuj kus aŋuna a ŋakiro a daadaŋ a ŋuna ipotu iyes kitiyata.

¹⁹ Tocoito ijamakinete ŋilepi ŋirwa daadaŋ ŋulu iboiyoto iyes anakwap kus.

²⁰ Ani iatakini Ekapolon Akuj kus akwap kus, lopite ŋolo ikiikinia iyes, ido tema ituŋanan, “Alosi ayoŋ akinyam akiriŋ adio,” aŋuna ikimuitor akinyam akiriŋ, epedori ituŋanan ŋin akinyam akiriŋ apaki daadaŋ ŋina imuitor.

²¹ Ani kelwana aneni kus akibois ŋina abu Ekapolon Akuj kus toseu toyakaun ekiro keŋ, ido toara iyes lopite ŋolo adaunia ayoŋ akicik iyes ibarasit anaatuk, kori anamesekin kus idio ŋini ikiinak Ekapolon iyes, ipedorete iyes akinyam iŋes alotooma ŋitaunio kus apaki daadaŋ ŋina icamitotor iyes.

²² Tonyama ibarasit ŋin ikwaŋina inyameta agete, kori atili, epedorete ŋituŋa daadaŋ akinyam akiriŋ ŋin kirae ŋulu nyesegak, kori ŋulu nyitoroniyaritae.

²³ Nai tocoito inyamete ŋaokot, anerae erae ŋaokot ibore ŋini kiteyari, akiyar, tosodi nyemaikina iyes tonyama ibore ŋini ikiteyari kaapei ka akiriŋ.

²⁴ Nyinyama jik ŋaokot, emaikina iyes tobukokis kwap ikwa ŋakipi.

²⁵ Nyinyama jik ŋaokot, ikotere iyakaunosi emam ŋace, iyes kaapei ka ŋidwe kus ŋulu epote ekaku kus, anerae ipotu iyes kitiyata ŋuna iyookino alokiŋaren Ekapolon.

²⁶ Nai ŋainakineta kus ŋuna italeoritae ka ŋainakineta kus ŋuna ikoŋito iyes ainakin neni ke Ekapolon, emaikina iyes iyaut nakibois ŋina eseuni Ekapolon.

²⁷ Emaikina iyes inakis ŋainakineta kus ŋuna epeyo akiriŋ kaapei ka ŋaokot namuroet ŋina ke Ekapolon Akuj kus, nai ŋaokot ŋuna a ŋamuronisya kus a ŋunace tobukokisi kwap diyete namuroet ŋina ke Ekapolon Akuj kus, ido ipedorete iyes akinyam akiriŋ.

²⁸ Tocoikisi akiwuap ŋakiro ŋun daadaŋ ŋuna adau ayoŋ alimokin iyes, ikotere emamukaun ŋace ŋikaru ka ŋikaru aneni kus ka aneni a ŋidwe kus a ŋulu epote ekaku kus, anerae ipotu iyes kitiyata ŋuna ajokak ŋuna iyookino alokiŋaren Ekapolon Akuj kus.

Nyilipa neni a ŋakujo

²⁹ Ani emunyari Ekapolon Akuj kus alokiŋaren kus ŋituŋa a ŋakwapin a ŋuna eapi iyes alomar ka akituruwor ŋuna kus, ani kidaut iyes akiritar ikes ka kiboikinosi nakwapin kec,

³⁰ kedaun amunyar ŋituŋa ŋul, tocoito nyikimodiyar, iyes kitiyata ŋuna etiyaete ŋituŋa ŋul, nyiŋitanarosi ŋuna a ŋakujo kec ibasi, “alipite mono kilipyata ŋituŋa ŋul neni a ŋakujo kec? Acamit ayoŋ daŋ akitiya lopite ŋolo etiyaata ikes.”

³¹ Nyemaikina iyes kitiyata ŋun neni ke Ekapolon a Akuj kus, anerae apotu ikes kitiyata neni a ŋakujo kec asiilyo daadaŋ ŋina eŋerit Ekapolon. Ewuanakinete ikes tari ŋidwe kec ŋulupesur ka ŋulusapa nakim aŋuna a ŋakujo kec.

³² Emaikina iyes kiwuapa ejok ŋakiro daadaŋ ŋuna ekecik ayoŋ iyes akitiya, nyiyatakis akirot adio nakiro ŋun, kori nyilemasi adio.