Ŋikis. 11 - Ebaibul

Ŋiropito ŋulu ka akiwuapit ŋakiro ŋuna ka Akuj

¹ Aŋun, emaikina iyes tominas Ekapolon Akuj kus, kitiyata jwi jwi ŋuna elimunit iŋes, ŋuna etubunit iŋes, ŋikisila keŋ ka ŋakiciketa keŋ.

² Totamutu nakoloŋit na atemar pa arae ŋidwe kus (eŋolikinito ka aryamunito ŋakiciketa ŋuna ke Ekapolon Akuj kus ŋuna ikitatamia iyes Ekapolon Akuj kus), nai arae iyes ŋulu emaikina tocamut iŋolikinito ailiil keŋ, apedor keŋ ŋina etiron ka agogoŋu keŋ,

³ ŋakujuwuanisya ka ŋiticisyo keŋ ŋulu abu iŋes kitiya alo Ijipit neni a Parao erwosit a Ijipit ka nakwap keŋ daadaŋ,

⁴ erae iyes iŋolikinito ŋuna abu Ekapolon kitiya neni a ŋasigarya a Ijipit, neni a ŋaŋolei kec ka neni a ŋagaari kec aŋuna eritae a ŋaŋolei ka epite ŋolo emyekinia Ekapolon ŋakipi ŋuna ka anam a ŋina Areŋan toburusiyasi Ŋijipitian apaki ŋina ikiwuapitotor ikes iyes ka abu Ekapolon tomunya ikes jik.

⁵ Iyenete iyes ŋuna abu Ekapolon kitiya neni kus analoŋisat akitodol ŋina iponiata iyes nakibois na,

⁶ iyenete iyes ŋuna abu Ekapolon kitiya neni a Dasan ka Abiram ŋidwe ŋulusapa ŋulu ka Eliab alokoku a Ruben, epite ŋolo aŋaaror akwap erukito ikes ka Ŋisirael daadaŋ, ido abu akwap kiliko Dasan ka Abiram kaapei ka ŋituŋa a ŋikalya kec daadaŋ, ŋiemae kec ka daadaŋ ŋulu ariito ka ikes.

⁷ Arae iyes ipotu kiŋolikis ŋakiro ŋuna apolok daadaŋ ŋuna abu Ekapolon kitiya.

⁸ Kiwuapa nai ŋakiciketa daadaŋ ŋuna ekecik ayoŋ iyes akiwuap nakoloŋit na, ikotere iryamuniata agogoŋu ŋinalomaret ka ŋinakikamaret akwap ŋina ilosete iyes akiboiyo alokekwaye Yorodan

⁹ ka ikotere iboiyete ekaoyan anakwap a ŋina abu Ekapolon kikoŋ neni atapapaa kus ainakin ikes ka ŋiletok kec, akwap ŋina elelyaata ŋakile ka ao,

¹⁰ anerae akwap ŋina eapi iyes alomar akiboiyo, nyikwaan ka akwap ŋina a Ijipit ŋina iponiata iyes, akwap ŋina idupanakinete iyes ŋikinyom kus, ido tobukonokis ŋakipi esibit imanikor ŋini ke edya.

¹¹ Nai akwap ŋina elosete iyes tooma keŋ akiboiyo, erae akwap ŋina a ŋikamukumukui ka ŋakadipaalae, akwap ŋina erae akiru itapalalit,

¹² akwap ŋina erae Ekapolon Akuj kus iyoki. Ite Ekapolon Akuj kus iŋes jik, ameun anakisyakinet a ekaru tari nadaunet a ekaru.

¹³ Ani ca kiwuapa iyes ŋakiciketa keŋ ŋuna ekecik ayoŋ iyes nakoloŋit na akiwuap, ŋakiciketa ŋuna ka amina Ekapolon Akuj kus ka akitiyanakin iŋes a ŋitai kus a daadaŋ a akiyar kus a daadaŋ,

¹⁴ iŋes nai eyaunia iŋes akiru nakwap kus anapaki a ŋina itemokino, akiru ŋina a ekiŋaren ka akiru ŋina ke ekaku, tosodi ilemete iyes ŋikinyom kus, epiini kus ka akimyet kus

¹⁵ ka ikiinakini iŋes iyes ŋinya ŋulu edakasi ŋibaren kus, ido imujete iyes kimwoko.

¹⁶ tocoito, anerae acepaki ikisuparyo iyes akitiyanakin ŋakujo ŋace ka akilip neni kec,

¹⁷ ani kitiyata iyes ŋun, ikiŋoikini Ekapolon iyes ka nyimyek akiru kilim ka nyepedo akwap akira ŋaraito, tosodi itwakete iyes atipei kimyekis akwap ŋina ajokan ŋina ikiinakinit Ekapolon iyes.

¹⁸ Emaikina iyes kirica ŋakiro kaŋ ŋun alotai kus ka anakiyar kus, emaikina iyes tonapa ikes alokeperin kus erae emacar ka toenianakis loreetin kus.

¹⁹ Kitatama ŋidwe kus ŋakiro ŋun, kirworo alorerya kus ka aneni daadaŋ iyakaunosi iyes, kirworo ŋun apaki ŋina iperyoto iyes ka ŋina ikyenyuniata.

²⁰ Kigira ŋakiro ŋun lokekia a ŋakais kus ka lopukei kus,

²¹ ikotere elalata ŋirwa kus ka ŋirwa a ŋidwe kus anakwap a ŋina abu Ekapolon kikoŋ ainakin neni atapapaa kus ŋirwa daadaŋ ŋulu eyakatar kidiama ka akwap neni eya.

²² Ani kiwuapa iyes ejok ŋakiciketa ŋuna ekecik ayoŋ iyes nakoloŋit na akiwuap, ŋakiciketa ŋuna ka amina Ekapolon Akuj kus, kiwuapa ŋakiro keŋ ka kimiidikinos neni keŋ,

²³ ebuni nai Ekapolon akiritar ŋituŋa a ŋakwapin alokiŋaren kus ka iritarete iyes ŋituŋa a ŋakwapin ŋulu alalak ka ŋulu egogoŋ akilo iyes.

²⁴ Akibois daadaŋ ŋina idolete iyes eruwor ŋina kus, egeuni akwap kus analoŋisat todol tari Lebanon ka ameun anaŋolol Eupurate todol tari nanam ŋina alo To.

²⁵ Mam ituŋanan epedori akitijikin iyes, iwuakini Ekapolon akuryanu ka ekabule lotuŋa a akwap a daadaŋ a ŋina idolete iyes, lopite ŋolo ikiikinia iŋes iyes.

²⁶ Kiirasi, nakoloŋit na ewuak ayoŋ kiŋaren kus arereŋu ka ŋicen.

²⁷ Iryamunete iyes arereŋu erae kiwuapa iyes ŋakiciketa ŋuna ke Ekapolon Akuj kus ŋuna ekecikak ayoŋ iyes nakoloŋit na

²⁸ ka iryamunete iyes ŋicen erae pa kiwuapa iyes ŋakiciketa ŋuna ke Ekapolon Akuj kus, ido toŋero akiwuap ŋakiro ŋuna ekecik ayoŋ iyes akiwuap nakoloŋit na, aŋuna ka akiwuap ŋakiro a ŋakujo a ŋuna nyiyenunito iyes.

²⁹ Ani ikiyauni iyes Ekapolon Akuj kus nakwap ŋina ilosete iyes alomar ka akiboiyo togatakisi arereŋu lomoru Gerisim ka togatakisi ŋicen lomoru Ebal.

³⁰ Ikwapei iyeniata iyes, eya ŋimoru ŋul ekekwaye Yorodan, elwaka ikes, eya lowae ŋolo alo To, nakwap ŋina a Ŋikanaani a ŋulu iboiyete alo Araba aneni iteosi ka Giligal diyete ekuyon ŋolo a More.

³¹ Ani idokarete iyes ekekwaye Yorodan, ilomarete akiboikin nakwap ŋina ikiinit iyes Ekapolon Akuj kus ka ani ikamarete iyes iŋes ka iboikinosi nen,

³² emaikina iyes kiwuapa ejok ŋakiro daadaŋ ŋuna etubunitoe ka ŋikisila ŋulu adau ayoŋ alimokin iyes nakoloŋit na.