Ŋikis. 1 - Ebaibul

Totamunae ŋakiro ŋuna apotu kitiyakin alo Oreb

¹ Erae nu ŋakiro ŋuna abu Moses tolimok Ŋisirael alokekwaye Yorodan, analoŋisat ka anadipo a ŋina iteosi ka Sup, anakibois a ŋina eyai kidiŋ Paran ka Topel, Laban, Aseros ka Disaab.

² (Alorot a ŋolo itori moru Seir elosi ituŋanan ŋirwa ŋitomon ka apei todol Kades-Barinea kenyou alo Oreb).

³ Ekaru ŋolo a ŋatomoniomwon, elap ŋolo a ŋitomon ka epei ŋirwa ke elap epei, kirwor Moses neni a Ŋisirael ikwapei ecikitor Ekapolon iŋes akirwor neni kec.

⁴ Abu Moses kirwor ŋakiro nu kedau iŋes akiloun erwosit Sikon ŋolo a Ŋiamori ŋolo epukat alo Esibon ka kedau akiloun erwosit Og ŋolo a Basan ŋolo epukat alo Asitaros ka alo Edirei.

⁵ alokekwaye Yorodan anakwap a Moab, abu Moses kisileereu ŋikisila lu:

⁶ Abu Ekapolon Akuj yok kirwor neni yok alo Oreb tema, “Iboiyoto iyes tokona ekaoyan alomoru a lo.

⁷ Togeutu tokona nabo awosit, toloto nakwap ŋina a ŋikamukumukui ŋina a Ŋiamori ka nakiboisyo nu ŋuna idunyasi ka akwap a Ŋiamori. Araba, akwap ŋina a ŋikamukumukui, Sepela, Negeb ka nakwap ŋina alodiyete anam ka nakwap ŋina a Ŋikanaani ka Lebanon todolo tari naŋolol ŋina apolon nooi ŋina enyaritae Eupurate.

⁸ Kiirasi akainak ayoŋ iyes akwap ŋin, toloto kikamasi akwap ŋin kituruwosi ŋina kus, akwap ŋina abu ayoŋ ekoŋ ainakin atapapaa kus Aburaam, Isaka ka Yakob ka neni a ŋiletok kec ekaku kec.”

Toseunae ŋikarikok a ŋikabilae

⁹ Kirwor nabo Moses tema, “Apaki ŋin, abu ayoŋ okolimok iyes otema, ‘Nyapedorit ayoŋ bon akidaŋidaŋ ŋakiro kus.

¹⁰ Adau Ekapolon Akuj akitipitun iyes, tokona ilalakyata iyes ikwa ŋikacer alokidiama.

¹¹ Elipi Ekapolon Akuj atapapaa kus kiyatak nabo ekimar kus ŋarwa aliput ka ikiterereŋ iyes ikwaŋina adaunia akiikin iyes.

¹² Nai ekokini ayoŋ adaŋidaŋi ŋakiro ŋuna a ŋiburasyo kus ai?

¹³ Toseutu aŋuna a ŋikabilae kus ŋituŋa ŋulu aosok, ŋulu epiiryaka ŋulu ejokak ŋipitesyo kec, toseutu ikes toruworos ŋikarikok kus.’

¹⁴ Tosodi ipotu ikiboŋokis ayoŋ temasi, ‘Ŋakiro ŋuna iyeunit iyoŋ, ejokak nooi.’

¹⁵ Aŋun, abu ayoŋ onyarau ŋikarikok a ŋikabilae kus, ŋikilyok ŋulu aosok ka ŋulu ajokak a ŋipitesyo, abu eturuwo ikes ŋikarikok kus, ŋikapolok a ŋalipulipui, ŋikapolok a ŋamiamiae, ŋikapolok ŋatomonikanikani, ŋikapolok ŋitomotomoe ka ŋikapolokinitok a ŋikabilae kus a daadaŋ.

¹⁶ Abu ayoŋ ecik ŋikatubok kus apaki ŋin otema, ‘Emaikina iyes kiirasi ŋakiro a ŋituŋa kus a daadaŋ a ŋulu isitasi, tomam ariit ka ipei akilo ŋinice ka emaikina iyes totubonokis ŋakiro aloikiiko anakiyookino aŋuna a ŋinituŋanan erae ŋini ka akwap kus, kori a ŋinigela.

¹⁷ Nyemaikina iyes iriito ka ituŋanan ipei apaki ŋina itubioto iyes ŋakiro, totubo ŋakiro eriyan aŋuna a ŋulu itopolooritae ka ŋulucaryo, nyemaikina ituŋanan idio ikitukuryan iyes, anerae erae atubokinet ŋina ka Akuj. Ŋakiro ŋuna egogoŋ iyes akitub iyautu neni kaŋ, ido opupok ayoŋ.’

¹⁸ Aŋun abu ayoŋ ekecik iyes apaki ŋin ka okolimok ŋakiro daadaŋ ŋuna emaikina iyes kitiyata.”

Towout Ŋisirael alomar nakwap ŋina ainakinit Ekapolon ikes.

¹⁹ Ikwapei abunio Ekapolon Akuj yok ikilimokinia iwon, aponi iwon towotokinae alo Oreb, totuboe aloŋisat daadaŋ ŋina apolon nooi ŋina a ŋican ŋina ipotu iyes kiŋolikis ewosyo iwon nakwap ŋina a ŋikamukumukui, nakwap ŋina a Ŋiamori akitodol ŋina adolere iwon Kades-Barinea.

²⁰ Abu ayoŋ okolimok iyes otema, “Idolut iyes nakwap ŋina a ŋikamukumukui, nakwap ŋina a Ŋiamori, ŋina ikiinakini Ekapolon Akuj yok iwon.

²¹ Kiirasi, adau Ekapolon Akuj kus ainakin iyes akwap; kitipeiyosi kituruwosi akwap ŋin ŋina kus, ikwapei adaunia Ekapolon Akuj atapapaa kus akiikin iyes, nyikuryaketa, kori nyikikadak.”

²² Ipotu iyes daadaŋ ipotu neni kaŋ temasi, “Eyakiyasi ŋikilyok ŋidi toloto kiŋaren aŋuna yok, akireb akwap yok, ido toboŋut yaut ŋakiro neni yok ŋuna a erot a ŋolo emaikina iwon etipeiyoryata ka ŋitaunio ŋulu ikilosi iwon alomar.”

²³ Ejok ayeunet ŋin aneni kaŋ, ido abu ayoŋ aseu alokidiŋ kus ŋikilyok ŋitomon ka ŋiarei, epei a ŋolokabila.

²⁴ Apotu ikes torotokis kitipeiyosi nakwap ŋina a ŋikamukumukui, ani edolete nakadipaalat Esikol, apotu ikes torebo nen

²⁵ ka apotu togerut ŋaraito ŋuna ka akwap a ŋin ŋuna apotu ikes totiyaunotor yaut neni yok; kinyakut daŋ ŋakiro neni yok, temasi, “Erae akwap ŋina ikiinakinit Ekapolon Akuj yok iwon akwap ŋina ajokan.”

²⁶ Nai pa icamito iyes akitipeiyor inaa. Ipotu iyes toŋero ŋuna ikicikit Ekapolon Akuj kus;

²⁷ ipotu iyes kiŋuruŋura aloeemae kus temasi, “Erae aŋuna ikitidiŋitor iwon Ekapolon iŋes ikiyaunia iŋes iwon alo Ijipit akipotokin iwon neni a Ŋiamori ikotere ikimunyarere iwon.

²⁸ Ai ikilosi iwon? Ikitubulo isua ŋakiro a ŋikaitotoi kosi ŋuna enyakunete ikes anakwap a ŋina alosito akireb ebasi ‘Egogoŋ ŋituŋa ŋulu iboiyete anakwap a ŋin ka eoyak akilo iwon ka daŋ epolok ŋitaunio kec eyakasi ŋaduketa ŋunajiet ŋuna aoyak nooi alokidiama; aponi daŋ isua kiŋolikinae ŋiletok a Ŋianakim.’ ”

²⁹ Abu ayoŋ okolimok iyes otema, “Nyikibul, kori nyikuryaketa aŋuna kec.

³⁰ Ekapolon Akuj kus ŋolo ikiŋarenikini iyes, iŋes ebuni ajiore aŋuna kus, lopite ŋolo abunio kitiyaa aŋuna kus alo Ijipit iteete iyes

³¹ ka analoŋisat aneni iponiata iyes kiŋolikis Ekapolon ikiuryarit iyes lopite ŋolo iuryaritor ituŋanan ikoku ŋinicici. Abu iŋes ikiurya iyes erot daadaŋ tari ŋina idolunioto iyes nakibois na.

³² Nai kikote neni daŋ, nyikinyomito iyes Ekapolon Akuj kus

³³ ŋolo ikiŋarenikinit iyes erot daadaŋ aryamun akibois ŋina ilomete iyes. Abu iŋes ikiŋarenik iyes nakwaare esibit arira a akim ka naparan esibit adis, ikitoodikinit iyes erot ŋolo emaikina iyes kiwuapa.”

Akisicanet aŋuna aŋerioto Ŋisirael Ekapolon

³⁴ Ani iirari Ekapolon ŋakiro kus, abu tonyunyur nooi kikoŋ tema,

³⁵ “Emam ipei daŋ a ŋituŋa a lu a ŋulu a anyamet a na a ŋina aronon a na ŋini edoli nakwap ŋina ajokan ŋina abu ayoŋ ekoŋ ainakin neni atapapaa kus,

³⁶ mati Kaleb bon lokoku a Yepune. Edoli iŋes nakwap ŋin, tosodi ainakini ayoŋ iŋes ka ŋiletok keŋ akwap ŋina abu iŋes kicak a ŋakejen keŋ, anerae abu iŋes torubak iwuapit ŋuna ke Ekapolon a etau keŋ a daadaŋ.”

³⁷ Abu Ekapolon toŋo neni kaŋ daŋ aŋuna kus tema, “Iyoŋ daŋ nyilomari nakwap ŋin.

³⁸ Yosua lokoku a Nun ekeŋarakiniton kon iŋes edoli nakwap ŋin, kisimukek iŋes, anerae iŋes ebuni akitolomar Ŋisirael nakwap ŋin toruwor ŋina kec.

³⁹ Nai ŋidwe kus ŋulucicik ŋulu sek itamete iyes atemar eŋataryo, ŋidwe kus ŋulu tokona nyeyenete ŋuna aronok ka ŋuna ajokak, ikes elomarete nakwap ŋin; ainakini ayoŋ ikes akwap ŋin ka ituruworete ikes akwap ŋin ŋina kec.

⁴⁰ Nai ani eruwor iyes toboŋosi naloŋisat toloto lowae ŋolo a Anam a ŋina Areŋan.”

⁴¹ Ipotu iyes ikiboŋokis ayoŋ temasi, “Aseci isua neni ke Ekapolon! Ikitenit tokona isua akitipeiyor ama, etijioto ŋituŋa a akwap a ŋin lopite ŋolo ikicikia isua Ekapolon Akuj kosi.” Aŋun, ipotu iyes daadaŋ toŋatakin kitemokinos aŋuna ke ejie itamete atemar, kori epatana akitipeiyor nakwap ŋina a ŋikamukumukui.

⁴² Abu Ekapolon okolimok ayoŋ tema, “Tolimok ikes ŋakiro nu, ‘Nyitipeiyosi ama ka nyiloto lojie, anerae nyikirukit ayoŋ ka iyes, ani kiloto iyes ikilounete iyes ŋimoe kus.’ ”

⁴³ Tari ŋina akalimokinitor ayoŋ iyes ŋakiro ŋun, ipotu iyes nyicamut. Ipotu iyes toŋero ŋakiro ŋuna kicikit Ekapolon, ido ipotu toloto aŋuna kus, kitipeiyosi nakwap ŋina a ŋikamukumukui.

⁴⁴ Apotu nai Ŋiamori ŋulu eboiyete anakwap a ŋin ikitijikis iyes, ikirita iyes lopite ŋolo ikirisya ao. Apotu itoar iyes ameun alo Seir tari Orima.

⁴⁵ Apaki ŋina iboŋunioto iyes, ipotu kigworo neni ke Ekapolon, abu Ekapolon towou akiirar akigworo kus, nyecamu tari apupokin ŋakiro kus.

Ŋikaru ŋulu ayakatar Ŋisirael naloŋisat

⁴⁶ Ani kidaut iyes akiboi alo Kades ŋirwa daadaŋ ŋulu ipotu iyes kiboiyoto a nen,