Ŋikiru. 99 - Ebaibul

Akipuro Akuj aŋuna ka asegis keŋ

¹ Erae Ekapolon Erwosit, aŋun emaikina ŋituŋa ekuryaka aŋuna keŋ. Iboi iŋes alokicoloŋ a ŋolo eyai kidiama Ŋisubuna ŋulu a ŋabebenuk, aŋun emaikina akwap emarani aŋuna keŋ.

² Ekapolon iŋes epol nooi alo Sion; itopolooritae iŋes akilo ŋituŋa daadaŋ.

³ Emaikina ŋituŋa kipuro ekiro kon ŋolo apolon nooi ŋolo ailiilon. Erae iŋes ŋolo Eseg!

⁴ Okoe Erwosit ŋolo etiron, imina iyoŋ akiyookino, idau iyoŋ akiwuakin akiyookino Isirael; idau iyoŋ ayaun akiyookino ka akitub ŋakiro anakiyookino.

⁵ Kipuro Ekapolon Akuj yok; kilipa neni ke Ekapolon alokiŋaren neni ipukator iŋes. Erae iŋes ŋolo Eseg!

⁶ Arae Moses ka Aron ŋice a ŋisacaradotin keŋ, arae Samuel daŋ epei a ŋulu elipete neni keŋ aŋuna a ŋituŋa; apotu ikes kilipa neni ke Ekapolon aŋuna a ŋituŋa, ido abu Ekapolon toboŋok ikes.

⁷ Abu Ekapolon kirwor neni kec eyai lodou; apotu ikes kiwuapa ŋakiro ŋuna abu iŋes totub ka ŋikisila ŋulu abu Ekapolon inak ikes.

⁸ Okoe Ekapolon Akuj kosi, ibu iyoŋ toboŋok ikes; ibu iyoŋ toruwor Akuj ŋina esyonon aneni a Ŋisirael, nai ibu iyoŋ kisican ikes aŋuna a ŋadyakanareta kec.

⁹ Kipuro Ekapolon Akuj yok, kilipa neni keŋ alomukura keŋ a ŋolo asegan, anerae erae Ekapolon Akuj yok ŋina asegan.