Ŋikiru. 98 - Ebaibul

Kipuro Ekatubon a ŋakiro a ŋituŋa ka akwap; (Ekiruk)

¹ Toeikisi eete ŋolokitete neni ke Ekapolon; anerae etiya iŋes ŋuna ka aumokin. Elou iŋes a apedor keŋ ka a agogoŋu keŋ a ŋina asegan.

² Adau Ekapolon alimor atemar elou iŋes; esileerek iŋes ŋituŋa a ŋakwapin apedor keŋ ŋina aiunan.

³ Abu Akuj nyilocok akiikinet keŋ neni a Ŋisirael, alotooma amina keŋ ŋina nyiryaŋiryaŋa ka akikinyoma keŋ. Aanyuwasi ŋituŋa daadaŋ anakwapin akiloun ŋina ka Akuj yok.

⁴ Ŋituŋa ka akwap a daadaŋ, toeikisi aŋuna ka alelyan neni ke Ekapolon! Kipuro iŋes a ŋieosyo ka acela ŋina ka alelyan!

⁵ Toeikisi ipurosi Ekapolon isitiyaete ŋaduŋgui, toeikisi iramete ŋaduŋgui ŋuna erwosi ejok.

⁶ Kisitiyata ŋarupepe ka ŋamomwar a ŋimeesekin, ieosi ka alelyanu alokiŋaren Ekapolon erwosit yok.

⁷ Anam ka ŋisubuna daadaŋ ŋulu eya tooma kon, kirurumakisi! Akwap ka ŋisubuna daadaŋ ŋulu eya neni kon, toeikisi!

⁸ Ŋaŋololin, toruutu esibit eramete ŋituŋa ŋakan ŋikamukumukui tolelyana kaapei;

⁹ tolelyana alokiŋaren Ekapolon, anerae ebunit iŋes atubokin ŋituŋa. Etubokini iŋes ŋituŋa anakiyookino, etubokini ŋituŋa anakiro a ŋuna a kire.