Ŋikiru. 95 - Ebaibul

Anyarit nakilip ka nakerit Akuj

¹ Potu, epuro Ekapolon; oeikisi ka alelyanu neni ka Akuj a ŋina erae akaiunan yok!

² Potu kiŋaren keŋ olakaros ka oeikisi ŋieosyo ŋulu ka alelyan ŋulukipuret iŋes,

³ anerae erae Ekapolon Akuj ŋina apolon, erae iŋes Erwosit ŋolo apolon ŋolo iloit ŋakujo daadaŋ.

⁴ Ipukat iŋes akwap daadaŋ, ameun alokwap ŋalup nooi tari nauni a ŋimoru daŋ.

⁵ Erae ŋanamyo ŋuna keŋ, anerae iŋes abu kitiya, akwap daŋ erae ŋina keŋ, iŋes abu tosub.

⁶ Potu, oryediko elipa iŋes; oryediko alokiŋaren Ekapolon, Ekasuban yok!

⁷ Erae iŋes Akuj yok; ikirae iwon ŋituŋa keŋ ŋulu iyoki iŋes, ŋamesekin ŋuna itani iŋes. Okoe, kiirasi ŋakiro ŋuna irworo iŋes ebe,

⁸ “Nyisyaaka ikwa atapapaa kus koloŋ alo Meriba, apaki ŋina ayakatar ikes naloŋisat ŋina a Masa,

⁹ neni aponiata ikes eketemo ka ekekatakis ayoŋ, tari ŋina aris keanyuniata ŋuna abu ayoŋ etiya aŋuna kec.

¹⁰ Ŋikaru ŋatomoniomwon, abu ayoŋ oŋer ŋituŋa a anyamet a ŋin, abu otema, ‘Okoe, erae ikes ŋituŋa ŋulu nyepupete ŋakiro! Ewounito akiwuap ŋakiro kaŋ.’

¹¹ Aŋun, ananyunyura kaŋ, abu ekoŋ otema, ‘Nyelomarete ikes jik nakwap ŋina amaikina ayoŋ esieŋunia ikes.’ ”