Ŋikiru. 9 - Ebaibul

Apedor ŋina ka Akuj ka akiyookino keŋ (Ekiruk a Daudi neni a ŋolo apolokinit aeore)

¹ Alakar ayoŋ neni ke Ekapolon a etau kaŋ a daadaŋ; alimori ayoŋ ŋiticisyo kon ŋulu ka aumokin.

² Alakar ayoŋ olelyan aŋuna kon; aeikini ayoŋ ŋieosyo ŋulu ka akipuro neni ke Ekapolon a ŋolo alokidiama nooi.

³ Ani apaki ŋina aboŋoryata ŋimoe kaŋ, apotu kibusokinos, tomunyaros alokiŋaren kon.

⁴ Idau iyoŋ akitub ŋakiro kaŋ, ido ikiryamu ayoŋ eyookino; idau iyoŋ akiboikin lokicoloŋ kon atubonokin anakiyookino.

⁵ Idau iyoŋ akitoŋooiyar ŋituŋa a ŋakwapin ka idau amunyar ŋulu aronok; ituruwo iyoŋ ikes ŋulu nyetamunio ŋikaru ka ŋikaru.

⁶ Adaunosi ŋimoe kosi jik; imunaa iyoŋ ŋitaunio kec jik, nyeriŋa nabo ikes etamunio jik.

⁷ Nai ipukat tokona Ekapolon ŋikaru ka ŋikaru; ewuak ekicoloŋ keŋ ŋolo etubio ŋakiro.

⁸ Etubokini iŋes ŋituŋa anakiyookino; ipukae iŋes ŋituŋa anakiyookino.

⁹ Neni ke Ekapolon iŋes eiunotor ŋulu isicanitae, neni keŋ eyakaun ikes eiuna alorwa a ŋulu a ŋican.

¹⁰ Ikikinyomete iyoŋ Ekapolon ŋulu eyenete ekiro kon, anerae nyimyekini iyoŋ Ekapolon ikes ŋulu epote neni kon.

¹¹ Kipuro a ŋieosyo Ekapolon ŋolo ipukat alo Sion; kiserakisi lotuŋa a ŋakwapin ŋuna adau iŋes akitiya;

¹² anerae isicani Akuj ŋinituŋanan ŋini isicani ŋituŋa keŋ; nyimuryakini iŋes akigworo kec.

¹³ Okoe Ekapolon, kiŋolik epite ŋolo ekesicanitotor ayoŋ ŋimoe kaŋ! Kisyoni ayoŋ, ido toiunae nyaloma natwanare,

¹⁴ ikotere ayoŋ aeikini ŋikipurisyo kon daadaŋ alopukei a ŋituŋa kon a ŋulu a Sion, olelyan a nen aŋuna ikiiunia iyoŋ ayoŋ.

¹⁵ Adaut ŋituŋa a ŋakwapin alomar nakipany ŋina abokete ikes pei; erum ŋakejen kec pei atibait ŋina ewuaito ikes.

¹⁶ Eyenen Ekapolon alotooma akiyookino keŋ; ikamunete ŋulu aronok ŋakiro kec ŋuna etiyata ikes.

¹⁷ Elosete ŋulu aronok daadaŋ nakibois a ŋikatwak, elosete ŋituŋa daadaŋ ŋulu eŋerito Akuj nen.

¹⁸ Nai etamunit Akuj ikes ŋulu a ŋican jwi jwi, nyedaun akigeno a ŋikulyak aneni ka Akuj ŋikaru ka ŋikaru.

¹⁹ Okoe Ekapolon, kitoodiu kare ca agogoŋu kon, nyicamak ŋituŋa kiturokinos; kimyek ŋituŋa a ŋakwapin totubokinae alokiŋaren kon.

²⁰ Okoe Ekapolon, kitubul ikes, kimyek ŋituŋa a ŋakwapin toyenut atemar erae ikes ŋituŋa koŋin ŋulu epote amunyar.