Ŋikiru. 89 - Ebaibul

Acamunet ŋina ka Akuj ka Daudi (Ekiruk a Asan a ŋolo arae Esirait)

¹ Okoe Ekapolon, aeikini ayoŋ ŋikaru ka ŋikaru ŋuna ka amina kon a ŋina nyiryaŋiryaŋa; eserae ayoŋ ŋuna ka akikinyoma kon neni a ŋanyameta a daadaŋ.

² Alimori ayoŋ atemar erae amina kon ŋina nyiryaŋiryaŋa ŋina itiirae ŋikaru ka ŋikaru; itiirae akikinyoma kon lopite ŋolo itiiraa kidiama.

³ Ibu iyoŋ tema, “Adau ayoŋ acamun ka ituŋanan ŋini abu oseu, adau ayoŋ akikoŋ neni a Daudi ke eketiyan kaŋ

⁴ ebe, ‘Eturuwori ayoŋ ŋipapae kon ŋirwosi ŋikaru ka ŋikaru ka erubakini apukan kec ŋikaru ka ŋikaru.’ ”

⁵ Okoe Ekapolon, kimyek ŋisubuna kon ŋulu anakuj ikipuro iyoŋ aŋuna a ŋiticisyo kon a ŋulu ka aumokin. kimyek ŋimalaikan ikipuro iyoŋ anatukot kec aŋuna a ŋiticisyo kon a ŋulu ka aumokin,

⁶ anerae ŋae ice ŋini eyai kidiama, ŋini epedoryo akisikwaan ka iyoŋ Ekapolon? Ŋae ikwaan ke Ekapolon alosubuna a ŋulu eya nakuj?

⁷ Itopolooritae Akuj nooi anatukot aŋisubuna a ŋulu eya nakuj; ilipete neni keŋ daadaŋ ŋulu irimokinito iŋes kidiŋ.

⁸ Okoe Ekapolon, Akuj ŋina a ŋajoresyo, ŋae eyakar apedor ikwa iyoŋ okoe Ekapolon? Irae iyoŋ Akuj ŋina ikinyoma ŋapakio daadaŋ.

⁹ Ipukat iyoŋ tari anam ŋina imorokokoete ŋakipi; ŋinibore imorokokounioto ŋakipi keŋ, itidiponokini iyoŋ ikes.

¹⁰ Ibu iyoŋ kinyaadiya Raab, ikwa esubuna ŋolo etwanit; idau iyoŋ akielar ŋimoe kon a apedor kon a ŋina etiron.

¹¹ Erae nakuj ŋina kon ka akwap daŋ erae ŋina kon; iyoŋ ibu tosub akwap ka ibore daadaŋ ŋini eyai tooma keŋ.

¹² Iyoŋ ibu tosub akwap alowae a ŋolo alo Kuju ka alowae a ŋolo alo Kwap; ipurosi iyoŋ ka alelyanu emoru ŋolo a Tabor ka Erimon lopite ŋolo eotor ŋituŋa neni kon.

¹³ Epol nooi agogoŋu kon, itopolooritae nooi apedor kon.

¹⁴ Itogogoŋito apukan kon akiyookino ka akitub ŋakiro a akiyookino eyakasi neni kon amina ŋina nyiryaŋiryaŋa ka akikinyoma.

¹⁵ Okoe Akuj elakara ŋituŋa ŋulu ayenut akipuro iyoŋ, ŋulu itojokit iyoŋ.

¹⁶ Elelyanete ikes aŋuna kon apaaran jwii; eeosi ikes aŋuna ijokya iyoŋ aneni kec;

¹⁷ anerae neni kon ebunitor arwonu ŋina ka agogoŋu kosi, ido anamina kon, ikiinanakini iyoŋ isua akilounun ŋimoe kosi;

¹⁸ anerae neni kon Ekapolon eryamunere isua aiuno. Iyoŋ Akuj ŋina asegan, ŋina a Ŋisirael irae erwosit kosi.

¹⁹ Ibu iyoŋ koloŋ kirwor anakiruja neni a eketiyan kon a ŋolo ekinyoma tema, “Ainak ayoŋ apedor neni ekajion a ŋolo eyenen nooi; ainak ayoŋ apukan neni ke epei a ŋolo abu oseu alotuŋa.

²⁰ Aryamu ayoŋ Daudi eketiyan kaŋ; eosak ayoŋ iŋes akimyet kaŋ ŋina asegan.

²¹ Erubakini agogoŋu kaŋ eyai neni keŋ jwi jwi itogogoŋi apedor kaŋ iŋes.

²² Nyilouni emoit edio iŋes, nyilounete iŋes ŋulu aronok.

²³ Amunyari ayoŋ ŋimoe keŋ alokiŋaren keŋ, ido oar ŋulu imanito iŋes.

²⁴ Eyakaunosi iŋes ka akikinyoma ka amina kaŋ ŋina nyiryaŋiryaŋa; iloununui iŋes ŋimoe keŋ a ekiro kaŋ.

²⁵ Anyaari ayoŋ akwap ŋina ibuni iŋes akipuka ameun ananam Mediteranian akitodol naŋolol Eupurate.

²⁶ Akanyarae iŋes ayoŋ etemari, ‘Irae iyoŋ papa kaŋ, Akuj kaŋ, ataaba ŋina aiunor ayoŋ.’

²⁷ Eturuwori daŋ ayoŋ iŋes lokoku kaŋ ŋolokiyae ka eturuwori ayoŋ iŋes erwosit ŋolo itopolooritae nooi alorwosi a ŋulu ka akwap.

²⁸ Eturubakini ayoŋ amina kaŋ ŋina nyiryaŋiryaŋa eyai neni keŋ ŋikaru ŋikaru, erubakini acamunet kaŋ eyai neni keŋ jik.

²⁹ Eturubakini ayoŋ ŋiletok keŋ erae ŋikepukak ŋikaru ka ŋikaru, erubakinete ŋipapae keŋ erae ŋikepukak ŋikaru ka ŋikaru.

³⁰ Nai ani kimyekis ŋipapae keŋ ŋikisila kaŋ, toloto pa iwuapito ŋuna alimunit ayoŋ,

³¹ ani keŋero ikes ŋuna atubunit ayoŋ, ido nyiwuapa ŋakiciketa kaŋ,

³² esicani ayoŋ ikes aŋuna a ŋasecisya kec; eteryamuni ayoŋ ikes ŋican aŋuna a ŋadyakanareta kec.

³³ Nai nyajoŋoe ayoŋ amina Daudi, kori nyemyekini akiwuap ŋuna adau akiikin iŋes.

³⁴ Arubakini ayoŋ ericit acamunet kaŋ ka iŋes ka ericit ŋakiikineta daadaŋ ŋuna adau ayoŋ akiikin iŋes.

³⁵ Adau ayoŋ akikoŋ, alokiro kaŋ a ŋolo asegan etemokin jik. nyerwori ayoŋ alyokonu neni a Daudi.

³⁶ Erubakini ete ŋiletok keŋ ŋikaru ka ŋikaru, erubakini apukan keŋ alokiŋaren kaŋ ŋirwa ŋulu ka akoloŋ daadaŋ;

³⁷ erubakini apukan keŋ lopite ŋolo eyakar elap, lopite ŋolo ecaya alokidiama.”

³⁸ Nai tokona, iŋoik ka iŋer iyoŋ erwosit kon; elelebun anyunyura neni kon aŋuna a erwosit kon a ŋolo iseu iyoŋ.

³⁹ Iŋer iyoŋ acamunet kon ka erwosit kon, ilema iyoŋ apolou aneni keŋ.

⁴⁰ Ibwaŋabwaŋaa iyoŋ ŋarwatatain ŋuna ke etaun keŋ; iperik kwap ŋaduketa ŋuna ejio iŋes, aruwor ŋacaryo.

⁴¹ Ekokoyete ŋituŋa daadaŋ ŋulu itorete nen ŋiboro keŋ; aruwor iŋes ŋolo ejamuwarito ŋikidunyetkeŋ.

⁴² Isilou iyoŋ ŋimoe keŋ iŋes; iteryamu iyoŋ ŋimoe keŋ daadaŋ alelyanu.

⁴³ Ituruwo iyoŋ ŋiboro keŋ ŋulujiet ŋicaryo isilou iyoŋ ŋimoe keŋ iŋes alojie.

⁴⁴ Ilema iyoŋ anakan keŋ ebela keŋ ŋolo ka apolou, ilema iyoŋ iŋes anaraakau erwosit.

⁴⁵ Itomojoŋ iyoŋ iŋes eriŋa apaki keŋ; isurum iyoŋ iŋes ŋileec.

⁴⁶ Okoe Ekapolon, iŋopi mono iyoŋ ŋikaru ka ŋikaru a? Apaki ŋina etya ai erubakinia aŋoit kon erirae ikwa akim?

⁴⁷ Totamunite mono iyoŋ epite ŋolo euruwuania akiyar kaŋ; totamunite mono iyoŋ atemar ibu iyoŋ itosub isua daadaŋ ikirae ŋituŋa ŋulu etwakeneneete!

⁴⁸ Ŋae epedori akiboi, ido nyetwana? Ŋae ebucar anapedor a ŋina ka akibois a ŋina a ŋikatwak?

⁴⁹ Okoe Ekapolon, ai mono etor amina kon ŋina nyiryaŋiryaŋa ŋina paaran, ŋina ibu iyoŋ anakikinyoma kon kiik Daudi?

⁵⁰ Okoe Ekapolon, kiŋolik epite ŋolo ekeyenyere ayoŋ eketiyan kon; kiŋolik epite ŋolo edaŋidaŋia ayoŋ alotau ŋiyany a ŋituŋa,

⁵¹ ŋiyany ŋulu ekeyanyata ayoŋ ŋimoe kon Ekapolon, ŋiyany ŋulu iyanyata ikes eseuna kon aneni daadaŋ itori.

⁵² Akipuro toyai neni ke Ekapolon ŋikaru ka ŋikaru. Amen! Amen!