Ŋikiru. 88 - Ebaibul

Akilip aŋuna ka akiŋarakino kidau apapanun (Ekiruk kori Eete a Ŋikoraitin neni a ŋolo apolokinit aeore)

¹ Okoe Ekapolon, Akuj ŋina irae akaiunan kaŋ, egworo ayoŋ neni kon apaaran jwii, ani nakwaare obu kiŋaren kon.

² Kiira akilip kaŋ; topupok akigworo kaŋ.

³ Anerae apotu ŋican ŋulu alalak nakiyar kaŋ, ido aapiya ayoŋ nakibois a ŋikatwak.

⁴ Ekemarakin ayoŋ neni a ŋituŋa a ŋulu elomarete nakipany ikikwaanikin ayoŋ ka ŋituŋa ŋulu emam agogoŋu.

⁵ Ikikwaanikin ayoŋ ka ŋituŋa ŋulu imyekinitae aneni a ŋikatwak, ikikwaanikin ayoŋ ka ŋituŋa ŋulu adaun akiar, ŋulu eya napanya, ikikwaanikin ayoŋ ka ŋituŋa ŋulu nyeriŋa iyoŋ itamunit, anerae nyeriŋa iyoŋ iŋarakinit ikes.

⁶ Ikiwuak iyoŋ ayoŋ nenicukul nooi anakipany. Neni irwono cuc, neni ecukul nooi.

⁷ Eyai anyunyura kon neni kaŋ nooi, ekeloŋiyasi ayoŋ ŋatyokisyo ŋuna eponito aneni kon.

⁸ Ikituruwo iyoŋ ayoŋ ŋolo akaŋerito ŋikonei kaŋ, ikituruwo iyoŋ ayoŋ ŋolo nyiburit ŋikonei kaŋ akiŋolikin; agolokino ayoŋ locan, emam epite ŋolo asiya;

⁹ aribiribokis ŋakonyen kaŋ aŋuna ka akiyaloloŋ. okoe Ekapolon, akanyarit ayoŋ iyoŋ a ŋinakoloŋit; ekyaarit ayoŋ ŋakan kaŋ elipi neni kon.

¹⁰ Itiyaenene mono iyoŋ ŋuna ka aumokin aŋuna a ŋikatwak a? Enyoununeete mono ŋikatwak ikipuro iyoŋ a?

¹¹ Elimonorete mono ŋulu adaun akinuk amina kon ŋina nyiryaŋiryaŋa, kori akikinyoma kon anakibois a ŋina a ŋikatwak a?

¹² Iteo mono ŋakujuwuanisya kon anakibois a ŋina iryono cuc, kori iteo mono ajokis kon anakwap a ŋina a ŋulu nyeriŋa etamunitae a?

¹³ Nai ekekaloik ayoŋ iyoŋ, okoe Ekapolon; elipi ayoŋ neni kon a ŋinataparacu.

¹⁴ Okoe Ekapolon, kaanukiro ikiŋeryo iyoŋ ayoŋ? Kaanukiro iwuaya iyoŋ ereet kon aneni kaŋ?

¹⁵ Ŋinapei anasoroko kaŋ, aryamunit ayoŋ ŋican ka akaapikinit atwanare; aryamu ayoŋ ŋican anakisicaneta kon, ido apapanu.

¹⁶ Ekenyaadiya ayoŋ anyunyura kon; eketapapanut ayoŋ ŋakisicaneta kon.

¹⁷ Apaaran jwii, ekerikaunito ayoŋ ŋun ikwa akalele; ekerimokinito ikes ayoŋ kidiŋ kec.

¹⁸ Ikituruwo iyoŋ ayoŋ ŋolo akaŋerito ŋikonei kaŋ ka ŋikidunyet kaŋ; akiryonut cuc bon erae arukitos kaŋ.