Ŋikiru. 85 - Ebaibul

Akilip aŋuna ka aryamun nabo arimao ŋina ka Akuj (Ekiruk a Ŋikoraitin neni a ŋolo apolokinit aeore)

¹ Okoe Ekapolon, isyonit sek iyoŋ akwap kon, inyakak iyoŋ ajokis neni a Ŋisirael.

² Idau iyoŋ akisyon aronis a ŋituŋa kon; isyoni iyoŋ ikes anasecisya kec a daadaŋ.

³ Idau iyoŋ ajoŋore anyunyura neni a ŋituŋa kon; ijoŋo iyoŋ aŋoikinit ŋituŋa kon a adedeŋu.

⁴ Torimakinae isua, okoe Akuj ŋina irae akaiunan kosi; tojoŋo aŋoikinit isua.

⁵ Irubakini mono iyoŋ ikiŋoikinit isua ŋikaru ka ŋikaru a? Iturubakini mono iyoŋ aŋoit kon ananyameta a daadaŋ a?

⁶ Nyikirimakini mono iyoŋ isua nabo, ikotere ŋituŋa kon elelyanete aŋuna kon a?

⁷ Okoe Ekapolon, kitoodikinae isua amina kon ŋina nyiryaŋiryaŋa, toiunae isua.

⁸ Apupokini ayoŋ ŋuna elimuni Akuj Ekapolon, anerae iikini; iŋes ekisil neni a ŋituŋa keŋ, neni a ŋulu ikinyomito iŋes neni a ŋulu ekiyete alotai kec tonupa Akuj.

⁹ Kire, etenit Akuj aiun ŋulu itopoloorito iŋes, ikotere erubakini apolou keŋ eyai nakwap yok.

¹⁰ Eyakaun amina ka Akuj neni a ŋulu ikinyoma, einakini Akuj ekisil neni a ŋulu iyookino,

¹¹ Eyakaun akikinyomit Akuj nakwap, ido eyauni Akuj anakuj akiyookino neni a ŋituŋa.

¹² Ikiinakini Ekapolon ibore ŋini ejok, ido tora akwap yok ŋikinyom ŋulu alalak.

¹³ Erubakini akiyookino eyai kiŋaren Akuj aŋuna ka akitemonokin neni itori iŋes.